蒲汇塘和蒲汇塘路 / 开普饭

沪语朗读：渺渺如胭

朗读者

蒲汇塘和蒲汇塘路

作者：薛理勇

上海话改写：郭莉

推荐：丁迪蒙

　　徐家汇天主教堂南面有一条东西向马路——蒲汇塘路。顾名思义，搿条“蒲汇塘路”应该是以一条叫做“蒲汇塘”个河浜得名个。地图浪还真个可以寻到搿条蒲汇塘，西起松江淀浦河，向东经过小涞港、北横泾、新泾、七宝镇、虹桥镇，勒勒徐汇区宜山路附近改向东南流过去，最后流到龙华港。河浜里可以通行15到20吨个船只，勒勒上海市中心，算得上是一条蛮大个河浜了。

　　蒲汇塘个走向从过去到现在倒是也呒没啥个大变化。1836年，也就是清朝道光十六年，现在个宜山路附近造了一座水闸，名字叫“小闸”，伊影响了蒲汇塘个畅通，乃末大家又勒勒小闸西北，开挖了一条新个蒲汇塘下游水道，拿蒲汇塘水引向东南流，勒勒徐家汇附近并到肇嘉浜，从此“蒲、肇合流”。

因为蒲汇塘建造了水闸，船只经过此地，必须等开闸放船，乃末也就形成了一个小小个市镇，就叫做“小闸”或者“小闸镇”。一直到现在，一眼老人仍旧拿宜山路中山西路一带称之为“小闸”。小闸一带种植个南瓜、青萝卜侪是上海个优良品种。小闸出产个南瓜叫做“小闸南瓜”，皮色金黄，样子有眼像黄鼠狼，所以后来也叫做“黄狼南瓜”。如今搿搭还有一条“小闸镇街”，西起钦州路，东到中山西路，就是小闸镇留下来个痕迹。1957年，蒲汇塘一部分填脱，开筑了一条宜山路。还有一个记载，1854年2月18号，小刀会首领刘丽川勒勒小闸迭个地方，拨清军包围了，最后英勇牺牲。所以前几年有人提议，勒勒小闸建立一只刘丽川纪念碑，但是迭个倡议呒没啥人响应，所以也就呒没实现。

　　蒲汇塘是以河滩浪长满了蒲草而得名个。蒲草是一种常见个多年生草禾本植物，地下有横过来生长个茎，以前上海农民叫伊“野茭白”，可以吃，古人也用迭个来充饥，当伊粮食个。现在大概只有山东济南个餐厅里还有用“香蒲”烧出来个小菜，迭个是属于好物事个，所以价格不菲。

　　到了大热天，蒲叶当中抽出长长个苔，样子像古代武士手里拿个棒槌，顶端开出小花，勒勒花还呒没绽放辰光，掰开花蕊，花蕊里有金黄色细细叫个粉末，迭个可以当做食用颜料。以前，上海糕团店供应一种“松花团”，又叫“金团”，糕团表面有一层金黄色个粉，迭个据讲就是蒲草花蕊个花粉。

　　城里人难得有机会领略荒郊野外自然风光，更勿识几种野花野草。所以多数上海人是勿识蒲草个。但是，用蒲草做出来个日常生活用品还真勿少。从前交关地方农民着个草鞋，大多数侪是先用稻草搓成草绳，再编出鞋子，而上海地区有交关侪是用蒲草加上芦花，编出蒲鞋搭仔蒲靴，迭个鞋子保暖性邪气好，冬天着一双真是暖热适意得来。

　　老底子上海农民相信，七月初三是棉花生日。要是七月初三天气好，葛末今年棉花丰收；要是七月初三落雨，葛末今年棉花一定会减产。上海人用蒲草编织个“蒲包”来存放棉花，七月初三是晴天，蒲包就会销售一空，要是七月初三是阴雨天，大量蒲包就会积压卖勿动。搿种蒲包一直到二十世纪七十年代还看得到。

还有一种小一眼个蒲包，一般侪是用来装水产品个。从前到苏州、昆山地区旅游，秋高气爽，旅游者一定会买一眼大闸蟹带回来，大闸蟹就是用蒲包来装个。蒲包透气性好，拿蒲包淋湿脱，就可以让大闸蟹勒里向存活好几天。不过现在，蒲包已经被纸盒子代替了。