“翻译官”勿好当 / 开普饭

沪语朗读：俞颖

“翻译官”勿好当

（原题《难做“翻译官”》）

来源：新民晚报

作者：孔曦

沪语改写、讲述：俞颖

沪语修正：孔曦

指导推荐：丁迪蒙

一讲到翻译官，有眼岁数个上海人，大概侪会得想到电影《小兵张嘎》里向一只胖笃笃个翻译官。此地要讲个，是拿用普通闲话写个文章，改写成上海闲话个文字稿。搿桩事体看起来蛮便当，真个改写、改读个辰光，也蛮难个。有种介沪语播音员，可以直接拿过来读。搿种功底，一般个人是呒没个。

有辰光，有眼词语构成搭仔句子个语法，上海闲话搭普通闲话之间个差异，就像中文搭外文之间一样。譬如讲，勒上海市区个公交车浪，常庄响起迭能介个提醒：“（普通话）请给需要帮助的乘客让个座”。挨下来是沪语播报：“请拨需要帮助个乘客让个座”，搿就完全照抄普通闲话，听起来老勿适意个。同样是搿句闲话，松江区个公交车浪，沪语播报是：“请侬让只位子，拨需要照顾个乘客”。搿再是真正个上海闲话呀。就讲搿个“让”字，常庄用勒“让只位子”“谢谢侬，让一让”“阿拉是让让侬个噢”搿种口语当中。

真正过日脚个辰光，上海个小青年，会得拿普通闲话个语法，直接搬过来用。比方讲，“侬为啥勿让我去啦”？正宗个上海闲话，应该是“侬为啥勿拨我去啦”。

有人要讲，方言也要跟时代合拍。我觉着，勿关到啥个朝代，基本个语法勿好掼脱。勿然呢，日长世久，就会得动摇上海闲话个根基。至于读音个变化、普通闲话个词语直接拿过来用，倒还气得过。现在，只要认得新朋友，哪怕是勒勒讲上海闲话，也总归讲“加只wei信”。其实，正确个沪语发音，是“Vi信”，勿是“威信”。有意思个是，上海个中年人，“Vi波炉”，倒勿会得讲“wei波炉”个。还有“干干净净（应该是清清爽爽）”“通通红（血血红）”“偶然（千年难般）”……搿能介个例子，还是有交交关关。

也难怪个呀，早两年，阿拉个小囡，勒学堂里向，只许讲普通闲话；勒屋里向呢，也呒没讲上海闲话个环境了。爸爸妈妈、爷爷奶奶、外公外婆，侪围牢仔小囡讲洋泾浜普通闲话；打各种客服电话，难般碰着一个会得讲上海闲话个人，我是开心得来，像煞“（用普通话读）他乡遇故交”

还算好，保护、传承上海闲话，勿少有远见个上海人侪支持个。勿少人为了迭个目标，闷声勿响做事体，一做就做仔交关年数。

现在，“上海发布”微信公众号，会得定期介绍上海闲话里向个词语搭仔习惯性个讲法，推出上海闲话儿歌搭古诗词朗读；《新民晚报》个“上海闲话”专版，是沪语写作个一只平台；“夜光杯”微信公众号，也有用上海闲话读个文章了；半个号头一趟个农历节气，《新民晚报》新媒体频道“上海时刻”，侪会得推出一只短视频海报，讲搿个节气个特点搭仔习俗。一老一小个上海闲话，老个哑壳壳糯搭搭，小个刮辣松脆，老好听个。

搿两年，我登勒报纸高头个几篇文章，拨人家翻译成上海闲话。牵头个丁迪蒙老师，会得拿翻译好个稿子发拨我看一看，由我自家修正。就是勒勒迭个过程当中，我体会到，翻译是桩老勿容易个事体。有个词语翻译个辰光，意思要打折扣，好闲话糗闲话分勿清爽。所以讲，我老佩服伊眼真正个翻译家，搭从事保护、推广、传承个搿些老师相比，我迭个翻译官个难，勿算啥。

我觉着，上海闲话传得下去还是传勿下去，现在迭眼年纪轻个，责任老大个！譬如讲，除脱仔丁迪蒙、葛明铭、黄瑜涵搿一代老师，年纪轻个朱贞淼、张晨姝、曹凯搿眼人，也一直勒勤勤恳恳个做事体。

希望阿拉个小朋友，勒屋里向、勒学堂里向下课个辰光，可以讲讲上海闲话。更加希望，一代一代个上海人，侪会得讲正宗个上海闲话。哪怕跑到外地，跑到外国，沪语，总归是上海人之间通用个密码。