演戏个故事
沪语朗读：徐蔚华
朗读者
演戏个故事
作者：童自荣
来源：中国配音网
改写：郭莉
朗读：徐蔚华
推荐：丁迪蒙
最近读到汪曾祺先生个一篇散文《观音寺》。文章讲，抗战个辰光，汪先生居然搭人家合作演出了话剧《雷雨》。我对搿种内容个文章，自然觉着邪气扎劲。
汪老文章里讲，演男主角周萍个迭位老兄，是个上场昏，一到台浪向，非但走错位置，还要忘记脱台词。伊倒是晓得勿好冷场，所以就中气十足个勒台浪瞎讲八讲，一歇歇听伊勒勒极叫：“鲁贵！鲁贵！”汪曾祺演个就是鲁贵，伊一听就心里叫苦：要死快了，人家剧本里根本勿是搿能安排个！但是既然叫侬了，也只好上台了。亏得汪老脑子活络，即兴编了几句台词，总算拿迭只漏洞对付过去了，台下观众一眼也呒没看出来。
汪先生文章勿动声色，文笔老辣，对我倒是有极大个触动，勾起了我交交关关回忆。
有人问我：进上海电影译制厂之前，侬演过戏伐？迭句言话拿我问牢了。阿是没演过？勿对，演过个。我个演戏“首秀”，还是跟我个艺术启蒙——沪剧紧密联系勒一道个唻。
上世纪六十年代初，我勒勒读高中，稀里糊涂拨人家拉进了学堂个沪剧兴趣小组。我以为大概就是唱唱沪剧小调，到农村劳动个辰光为农民朋友唱两段。想勿到伊拉胃口大得来，要排大戏——沪剧《星星之火》。兴趣小组个“女魔头”当仁不让，自然演第一主角肖桂英；承蒙伊特别看得起我，居然让我演一个日本老板个走狗，庄老四！哦哟，阿爹拉个娘！搿能一只货真价实个反派，也勿想想我是极其内向个小男生，上仔台两只脚侪要发抖个朋友！但是有啥办法呢？横竖横，既来之则安之，只好“化悲痛为力量”了。再讲，我也勿想辜负“女魔头”个器重，侬晓得伐？伊个嫡亲娘舅，就是大名鼎鼎个“碧落黄泉”王盘声啊！
性格内向个人，一般侪有天马行空个想象力。为了演好迭个庄老四，我先勒勒伊外表上头弄出眼花样。乃末我勒左眼浪向蒙一块黑布，赛过加勒比海盗，讲言话语气也是冷冰冰恶狠狠。因为要连演几天，听人家讲平常也要保持人物状态，所以我勒搿个几天总归眼露凶光，吓得班浪同学勿敢看我，断定我走火入魔了。本来班级里有个女生，对我好像还是有一点啥个意思个，从此之后，就断了迭只念头。哈哈，迭个就是我个舞台首秀。勿晓得我高中同学们还有印象伐？
高中毕业我考进上海戏剧学院表演系。毕业公演好算是我专业性质个“粉墨首登场”了。当时成立了两只剧组，一只叫《柜台内外》，我参加个一只叫《英雄工兵》，阿拉还到外地演出。我个角色是炊事班长，伊有一段戏中戏，是搭大家讲工兵英雄个事迹，葛末就要动点脑子了。想来想去，索介我就用唱来代替讲吧。我设想迭个人是北方大鼓书个爱好者，所以我就用京韵大鼓腔调来说唱。我没机会去登门学习，只好凭自家听广播节目个印象，自说自话编了曲谱。正式公演辰光，我头两句一唱，就完全进入角色，身心比彩排还要放松，自我感觉瞎好！啥人晓得一勿当心，说唱用个道具——一根细细长长个棒头，从手里飞仔出去。老天啊，众目睽睽下头，居然出了介大只洋相，我真是尴尬万分，当然，还有勿断个自责。其实老师同学侪呒没讲我啥，但是现场看戏个朋友到乃还印象深刻。我几个号头个努力侪付诸东流。之后我独怕上舞台，应该讲，跟搿趟演出是有老大关系个。
当然，勿管哪能讲，搞艺术工作，对我实在是一份幸运、一份幸福。配音也好，舞台演戏也好，哪怕唱一只歌，我侪蛮开心个。我心里明白，民间也有大量艺术人才，可惜伊拉得勿到机会圆梦，或者伊拉呒没人来发现，说勿定伊拉自家也勿晓得自家有搿份艺术天赋。葛末，做一个温暖个艺术爱好者也是邪气勿错个，要是有机会参与当然顶好。但愿大家侪开开心心，让阿拉一道勒勒艺术个天地里尽情遨游。
往期回顾：
图片来自网络