流浪猫小虎
沪语朗读：何秀萍
朗读者
流浪猫小虎
原创：程凌虚
改编、朗读：何秀萍
指导：丁迪蒙
流浪猫小虎是生出来只有几个号头个辰光拨我收养个。具体几个月我也勿晓得。
伊个辰光，我辣朋友开个一家饭店吃饭，伊邪气小心个辣门口头个垃圾桶里向捡鱼骨头吃。朋友讲，伊个母亲也是一只流浪猫，生下来就无家可归。伊个眼神搭侬老像个，侬就收养伊伐。结果呢，我用一把猫粮拿伊捉牢了。
刚刚到我屋里向，伊叫了一个夜到，喂伊吃物事也勿吃，野性十足，还抓伤了我爱人个手。我想，迭个大概是因为伊辣流浪个辰光呒没少吃苦头，少受欺负，所以戒备心理邪气重！送到宠物医院一检查，再发现伊是只病猫，感冒流鼻涕，而且先天兔唇，看毛病、加上做手术，用脱了我相当大个一笔银子！
猫是有灵性个，晓得好坏。拿伊从医院接回屋里向，就邪气快搭阿拉融洽了。流浪猫懂得感恩，也邪气粘人。困觉、吃饭、上厕所，汏浴，伊侪要跟勒海，拨伊困猫窝，却经常钻到主人个被头里，困辣我脚跟头，但倒是从来呒没抓伤过人。猫天性欢喜捉小动物，有了伊，屋里向连苍蝇侪呒没了。
后首来，阿拉又收养了一只流浪狗小白。猫搭仔狗素来勿对个，原来担心伊拉会得打相打，也许是同病相怜伐，伊拉一开始就相处得蛮好，虽然也打打闹闹，但侪是闹闹白相个。更多个辰光，伊拉是辣沙发浪一道困觉。有辰光狗狗困觉做噩梦了，呜呜叫，小虎会得拿爪子拍拍伊，像煞辣安慰伊！
小虎刚到我屋里向勿到一斤，现在竟然长到十多斤了。我百思还勿得其解个是，伊除脱仔猫粮啥个物事也勿吃个呀。小鱼干对伊也呒没啥个诱惑。我想，伊个前世一定是一个定力超强个苦行僧！
猫搭仔狗个寿命邪气短，一般活勿过主人。因此，每一个搭仔伊拉辣一道个日脚侪是最好个日脚，侪是值得倍加珍惜个！天下呒没勿散个筵席。我现在唯一勒海忧心、甚至是痛苦个事体，就是常怕搭伊们分别日脚个到来！猫狗个一生苦短，要惜福、惜缘！
流浪猫搭仔宠物猫其实是蛮像人类社会中个富人搭仔穷人个，明明是同类，一方却勒过另一方呒没看见过，想也勿敢想个生活。
有辰光流浪猫甚至还勿如穷人，因为穷人可以通过努力搭仔机遇完成逆袭，成为富人，但流浪猫却邪气少有机会拨人收养，从而过上宠物猫个生活。
由此看来，我屋里个小虎、小白还是蛮幸运个！
上海言话叙身边事体
吴侬细语吟诗词歌赋
往期回顾：
图片来自网络
欢迎关注本公众号