评弹票友写个淮海路（上）
沪语朗读：肖德生
朗读者
评弹票友写个淮海路（上）
来源：网 络
改编：丁迪蒙
朗读：肖德生
一位评弹票友写个淮海路，恐怕是连老淮海路也勿晓得介许所伐，姚蔭梅、徐绿霞、周柏春也讲勿到搿能多、搿能准、搿能有趣、搿能介个好吃。请看吃个物事。
讲起淮海路个特色饭店，有以红菜汤闻名个东华饭店，有上海最大个做俄罗斯大菜、尤其是以冷盆为丰富个卡夫卡斯咾啥；可惜阿拉是无缘一见呀。而勒阿拉眼皮底下头消失个有：老松顺饭店（394号）、由上海名酒店老萬茂酒栈变身而来个茅山酒家（601号）、鱼香肉丝出挑个川扬帮绿野饭店（689号）、苏式面点搭仔糕点齐飞个沧浪亭点心店（691号）、以烤鸭搭仔粤菜闻名个大同酒家（725号）、前身是罗威饭店、主打法式西餐，里向有我喜欢个烟鲳鱼个上海西菜社（845号）；还有烤鸭搭仔狗不理做头牌、但我却欢喜吃伊个蒸饺个原名天津馆个京帮燕京楼（1029号）等等。其中，令人梦魂萦绕个，莫过于天鹅阁搭仔江夏点心店了。
无论是去白相还是荡淮海路，脚头勿停，嘴巴也勿停。从零食到点心，从小吃到大餐，淮海路从来勿缺有特色个美食；让人一吃勿忘。时至今日，有眼已经远去，只存记忆了；但还是让吃货搭仔馋唠呸拉心心念念。
呒没想到，现在要排队买哈尔滨食品厂个蝴蝶酥。有眼门店还规定每人一次限购 2 斤，而伊过去出名个却是朗姆酒包。1984年，我看到师傅拉拿朗姆酒倒进糕点里向。于是嘛，俄罗斯个味道就滋生出来了。现在假使有，葛就苦了开车个吃货了，怕一吃就惹到了酒驾。
“哈尔滨”当年有名气个西点还有“登山蛋糕”，其实就是水果蛋糕。伊是1974年为中国登山运动员特制个高峰主食，后来又称伊为超级水果蛋糕。搿一家个俄式西点还有奶油西点、古鲁其面包搭仔白脱布丁咾啥，我比较欢喜奶油拉花。要说伊搭俄式无关个点心，葛就是上个世纪80年代推出来个“哈氏月饼”了。
伊个辰光，位于茂名南路搭仔淮海中路转弯角个老大昌，伊个特色是奶油蛋糕，曾经获得商业部优质产品金鼎奖。尤其是勒逢年过节，奶油蛋糕吃香；走亲访友拎勒手里，侬勿招摇伊招摇。更加是“毛脚女婿”上门必备个礼品，俗称“炸药包”。
搿两家做西点个，侪勒“文革”当中拨改了名字。“哈尔滨”改“工农兵”, 老大昌变成了红卫。
搿能介个革命，老早就已经露端倪了。“文革”前个1963 年，有人勒《新民晚报》写文章，要革“拿破仑蛋糕”个命。讲“过去个商人，为了招揽主顾，推销伊拉个蛋糕，而想借助于搿个法国皇帝个大名”。今朝，“一切企业商店勒移植、保留或者创造商品名称个辰光，要勿要讲求政治观点呢？”
搿眼西点早已经远去，也有一眼中式点心也随之告别。
光明村搭仔“哈尔滨”一样，现在是鲜肉月饼出名；老底子则是荣获 1984年上海市优质食品的香菇麻油蔬菜包搭仔三鲜小笼包。伊个一年我去店里向拍片，因为“吃货”，勒夜市里向买勿到香菇麻油蔬菜包；原因一是原料供应勿足，二是用电、用煤超过了计划额度要受罚。
从光明村向西过脱瑞金二路，就是当年个高桥食品厂，以本帮点心出名。伊拉屋里个高桥松饼，获得搭仔老大昌奶油蛋糕一样个荣誉。现做现卖，热气腾腾。搿饼又叫做细沙千层饼，层多且薄，松而酥香；葛细沙就是豆沙，怎一个甜字了得。此外，一样见功夫个还有薄得像纸头个薄脆饼，入口就化个一捏酥咾啥。
相比之下，我邪气欢喜乔家栅个中式点心。伊勒淮海路有只门市部，就勒26路往海关方向个陕西南路车站附近。上班乘车子之前，买好当早点吃。冷天介吃条头糕，里向包细沙，外头撒金黄个桂花。热天介吃薄荷糕，豆沙馅子个；一块块雪白，糕个底下头衬勒块剪得方方正正个绿粽叶，看了也觉着凉爽。
点以下文字即有精彩回放：
我听“无线电”
我是海洋
微信群和咖啡馆
我是土地
我是花
我是水
潘家姆妈
图片来自网络