有些将就，可能就是一辈子 / 开普饭

沪语朗读：吴椿华

有些将就，可能就是一辈子

作者：任炽越

来源：夜光杯2019.12.10

上海话改写：郭莉

朗读：吴椿华

推荐：丁迪蒙

我有个隔壁老邻居，伊结婚辰光大家侪去闹新房，几个从小一道个赤屁股朋友蹲勒床浪向拍照，啥人晓得一记头拿床板个木条踏断脱了，新郎官邻居要紧拿起一张矮凳垫勒嗨，倒是也高低齐巧正好，乃末闹新房个“欢乐”继续进行。

新婚开始了新生活，闹猛之后就是日常生活个琐琐碎碎七七八八，老邻居整天就是到处奔忙，养家糊口，床板下头垫勒嗨个矮凳老早忘记脱了。就搿能一直过了廿多年，老房子动迁了，搬场辰光，才发现床板下头垫个迭只凳子。老邻居感慨个讲，一直想修床板，一直也呒没去修伊，想勿到就搿能耽搁了几十年。

其实，床板修勿修，是可以将就个，问题并勿是老大。我有个同学，一个将就，一个随意，就拿自家嫁出去了！乃末酿成伊一辈子个悲剧。

年轻辰光，有人搭伊介绍了一个男朋友。小伙子最明显个特点就是身高胆大，但是一段辰光接触下来，伊拉自家也觉着两家头交往有眼勿融洽。小姑娘想，我就“骑马寻马”算了，每趟发现男个一只优点，就记下来，等到记满伊一百只优点，就嫁拨伊。要是记勿满嘛，葛末我就去寻别个“宝马”。

乃末小姑娘开始注意男生个优点：嗯，伊人高，能拿到我踮起脚来也拿勿到个物事；伊胆子大，跑到黑房间里也一眼勿怕；伊力气大，勒外头碰到事体勿怕打相打；还有，伊……。就搿能，记发记发，还呒没记到十几只优点，小姑娘年龄大了，别样个“宝马”也寻勿着，爷娘又勒勒边头拼命个催伊，小姑娘心里尽管还有眼想法，到头来也只好稀里糊涂去嫁拨了迭个小伙子。

可惜，到底双方性格差异忒大，乃末过日脚常庄会得勿焐心，甚至要寻相骂，日脚实在是勿称心呀。好勿容易熬到小囡大学毕业，两家头马上就分道扬镳。勒勒老同学聚会辰光，伊搭我讲，生活浪向有交关事体实在是一眼勿好随便将就个，伊会得影响侬个一生一世。

婚姻是人生个一桩大事体。不过一个人个职业也是勿好小看个。我有个也是欢喜写写弄弄个文友，中学毕业分配到煤气公司抄表，工作尽管是单调个，但是空闲辰光倒也勿少，蛮能满足伊舞文弄墨个爱好。改革开放以后，各大媒体、各大机关纷纷勒勒社会浪招揽人才，搿位文友也去报了名，参加了考试，还拨人家初步录用了。但是，人家单位派人来煤气公司看档案辰光，煤气公司坚决勿肯放人，还对我文友许诺，单位里一定也会得培养伊个。对方单位暗示我个文友，勿妨采取辞职个方式来实施调动。但是我个文友想，现在职业蛮稳定，还有辰光好写写物事，领导对自己也蛮上路。到了新单位，还吃勿准到底会得哪能唻！心一软，就放弃了调动。结果，对伊做承诺个领导调离迭个单位，当初拨伊个许诺也就成为了泡影。我迭位文友就勒勒抄表个路浪向一直走到了退休。后首来伊看到交关一道欢喜写写弄弄个文友，到了新单位，勒勒各自个新岗位浪向，侪创设了自家个一番事业，难免有眼懊牢，连一帮文友个聚会也勿大肯来参加了。大家侪对迭个蛮有才气个文友，呒没寻到可以发挥自家才能个岗位而邪气惋惜。

有人讲，生活里向是呒没彩排个，每一天侬侪要认真对待，勿好马虎、勿好随意、勿好心软，更勿好退缩，因为有一种将就，到头来拨将就脱个，可能就是侬个一辈子了！