督笃涿

上期我哋讲左五个分别代表唔同眼部动作嘅粤语字，今期就讲下五个喺粤语里头都系发“督”音嘅字到底有乜嘢区别：

呢个字相信大家都识，“督”，喺《说文解字》中解作：“察视也”。即监察、监督。另外，“督”亦被用于官位（或职位），例如最出名嘅周瑜（都督），睇古装片经常听到嘅“两广总督”，香港喺英殖时期嘅一哥“港督”。

呢个“笃”字，若有睇黄子华“栋笃笑”嘅朋友亦唔会陌生，“笃”喺《说文解字》中解作：“马行顿遟也。顿如顿首。以头触地也。马行箸实而遟缓也。古叚借笃为竺字。以皆竹声也。二部曰。竺、厚也。笃行而竺废矣。释诂曰。笃、固也。又曰。笃、厚也。”即“厚实、忠实、不虚伪、沉重（沉稳）”嘅意思。

而”栋笃“呢嗰词喺粤语里头系形容一个人直直地站着，一动不动。而喺香港，呢个词会带有少少贬义，系用嚟形容嗰尐“站在哪里,什么也不做,也不会做,人也傻傻的人。”

涿，喺《说文解字》中解作：“流下滴也”。通俗嚟讲，广府人经常讲嘅“一涿口水”、“一涿尿”，就系用呢个“涿”喇。

另外，喺中国有个地方叫“涿州”，属河北省，汉置涿县，为涿郡治所，唐改范阳县，明为涿州，1913年复改涿县，现又改为涿州。

厾，喺《说文解字》中解作：“椎毄物也”。意思系“用尖锐物去戳”。我哋平日经常讲嘅“厾背脊（打小报告）”、“厾波（打桌球）”，就系用呢个“厾”喇。

𡰪，喺《玉篇》中解作：“尾下竅也”。即“最尾”嘅意思。例句：你沿住呢条路，一直行到𡰪就搵到嗰间九记云吞面铺喇。