大英法兰西，大家勿来去（上）
沪语诵读：郭健
作者：薛理勇
沪语改写、诵读：郭健
历史浪个“洋泾浜”是上海县城北郊、黄浦江西岸个一条河浜。1843年11月17号，上海开埠。1845年，英租界首先勒洋泾浜北岸建立；1849年，法租界勒洋泾浜个南岸搭仔上海城北城墙之间，东西狭长个地块浪建立。乃末，洋泾浜就成为了上海英租界搭法租界个界河、分界线。
英、法租界相继又勒洋泾浜浪向建造了交关桥梁，依次有：头洋泾桥（今延安东路外滩）、二洋泾桥（江西路延安东路口）、三洋泾桥（四川路延安东路口）、三茅阁桥（河南路延安东路口）、带钩桥（亦叫“打狗桥”，山东路延安东路口）、郑家木桥（福建路延安东路口）、东新桥（浙江路延安东路口）、西新桥（云南路延安东路口）、八仙桥（西藏路延安东路口）等。搿些桥梁是连接英法租界个通道，也是上海老城厢到繁华个英租界去个必经之路。
租界是列强勒中国领土浪建立个、独立于中国行政体系搭法律制度以外个殖民地，各个租界有自家个行政组织体系搭仔制度，就像个独立王国，勿可逾越。近代以后，勒相当长个历史时期里，上海个城市交通、代步工具主要是靠人力车，也就是后首来常庄讲个“黄包车”。黄包车是商业性个营运车辆，必须注册、申领营业执照，还必须按照规定出一笔管理费搭仔税金。旧上海搿种执照叫做“照会”，营运者假使违反条例，就可能会得拨注销“照会”，取消营运资格，俗语叫“撬照会”，就是拿挂勒车子浪向个“照会”撬脱个意思。
租界时期个上海城市拨划分成公共租界、法租界搭仔华界（1863年上海个英租界搭美租界正式宣布合并，就是后首来所谓个“公共租界”，但是勒习惯浪、交关人还是会得拿原来个英租界叫做“英租界”，原来个美租界叫做“美租界”），而华界又分为“南市”搭仔“闸北”。当时个人拿租界时期上海政区割裂个状况叫做“三界四方”。英租界或者公共租界个人力车归公共租界工部局管，发个“照会”是“大英照会”，只好勒搿眼区域里向营运；法租界个人力车归法租界公董局管，发个“照会”是“法兰西照会”，也只好勒法租界里营运。搿两种“照会”侪叫“小照会”。
英租界搭法租界只隔一条小小个洋泾浜，但是“小照会”只能局限勒发放“照会”个租界里营运，英租界个人力车进勿了法租界，法租界个人力车也进勿了公共租界。坐车子个人假使要穿行两个区域，就必须勒洋泾浜下车，步行过桥，再招呼对方个车子继续朝前走，搿能就增加了交关麻烦。伊个辰光，上海人就拿英、法租界之间个隔阂、分离讲成功“大英法兰西，大家勿来去”，蛮噱个伐。
为了解决搿个困惑，英、法租界后首来经过协商，同意由工部局搭仔公董局联合发一种特种“照会”，有搿种“照会”个就可以勒公共租界搭法租界之间营运。搿种“照会”呢，就叫“大照会”。搿种情况搭现在上海郊区发放个只好勒郊区开个“沪C”牌照有眼相似个。
“大英法兰西，大家勿来去”个事体还蛮多个。1863年，英商上海煤气公司成立，并从1864年开始供气，所生产个煤气只向英租界供应。勿久，法租界也成立了“大法国自来火房”。早期，上海拿煤气叫做“自来火”，后首来，火柴也拨叫做“自来火”，就拿gas改称为“煤气”了。现在个黄浦区个永寿路搭仔广西南路老底子分别叫做“自来火行东街”搭“自来火行西街”，就是以“自来火房”得名个，也就是煤气厂。不过，大概因为法租界个面积忒过局促，厂址老勿理想，后来搭工部局协商，再同意拿“大法国自来火房”并入了英商上海煤气公司，搿能，上海煤气公司就开始向法租界供应部分煤气了。
往期回顾：
图：网络 / 编辑：渺渺