摆了“雷米封”个馒头，侬敢吃伐
作者：沈嘉禄
推荐与指导：丁迪蒙
我大阿哥会做馒头，讲起来是阿拉个口福。但是，有一趟勿当心拿药片“雷米封”当作糖精做到了馒头里向去了……
嗨，故事讲拨㑚听。
寒门出孝子，我大阿哥就是孝子，也是阿拉兄弟姊妹个榜样。姆妈常庄搿能教育我“侬大阿哥15岁就会得赚钞票了，上半天做学生，下半天做老师，拿到津贴会连夜赶乘摆渡船回来交拨我”上个世纪60年代，大阿哥勒上海船舶学校读书，还呒没毕业就受到学校领导关照，破格做辅导员了；毕业以后留校，财务室里向一坐就是一辈子，直到从总会计师个职位浪光荣退休。
大阿哥曾经到少年宫美术班跟张乐平学过画图，小荷才露尖尖角，但是为了减轻家庭负担，伊选择了另外一条路。
大阿哥平常辰光住校，每个礼拜回来一趟，乃么搿日天屋里就特别闹猛了。对我来讲就是开荤了，红烧肉加蛋、梅干菜烧肉、面拖排骨、咸菜大汤黄鱼，交关小菜，只有搿日天再吃得着个。
勒勒我可以朦胧记事以后，三年困难时期刚刚过去，物资供应还蛮紧张个，有一桩事体拨我留下来个印象倒是邪气清晰个。
多数辰光，大阿哥回到屋里向搿天，伊总归会得蒸一趟馒头。记得伊个辰光，上海人吃大米是定量供应个，大多数日脚只好吃吃面粉，是一种黑乎乎个，掺了交关麸皮个标准粉。姆妈常庄做眼面疙瘩、面条子咾啥，假使面粉还有得多，月底就再做一趟煎饼，两面焦黄，掰开来有两三层起酥，嵌勒绿白个葱花，喷喷香个。伊个辰光，家家人家侪备有一只“法兰盘”，就是平底锅啦。
阿拉屋里个伊只法兰盘，直到上世纪70年代，再老勿舍得个掼脱了。面疙瘩，面条子做起来比较便当，搭菜帮一道，烧一镬子，汤多油少，干货呒没多少，纯粹是图个虚饱。
大阿哥会得做馒头个，我觉着老了勿起个。伊是大将风度，胸有成竹呀。先发面粉，总归差我到南货店去买块鲜酵母，四分洋钿一小块，用粉红颜色个蜡纸头包装，外观搭乳腐差勿多，有股芳香当中带一眼酸个味道，我老欢喜个。
面粉发好仔么，就揉面，然后，一半做刀切馒头，一半做花卷。刚刚出笼个刀切馒头真个是忒香了，一口咬下去，舌头也来勿及忙。花卷当然是更加“高级”了，值得剝来吃！有辰光，伊还会得做菜馒头，蒸好仔有金黄色个菜油从收口个地方钻出来，我姆妈会得肉麻搿眼油个。大阿哥吃好夜饭要回学堂了，姆妈总归会得搭伊来回推让，让伊多带几只馒头回去。我有辰光会得提前蹿到弄堂口去白相，弄得好像是碰巧看见阿哥了，就再送伊走一段路，走到一百米外头个杀牛公司，路灯一只只亮起来了，大阿哥就催牢我快点回转去，再塞拨我一只馒头。
有一趟，大阿哥做糖馒头，因为白砂糖要计划供应个，正好屋里向又呒没存货了，就只好寻几粒糖精片烊开来拌到面团里去唻。蒸好以后一吃，咦，哪能勿甜个啦？大阿哥豪扫去拿摆糖精个小瓶头过来看，啊呀，坏事体唻，原来伊搿是爸爸用来治疗肺结核个雷米封药啦！
大阿哥向来是邪气谨慎个，呒没想到，搿记拨雷米封“撞腰”了，搿眼馒头还好吃伐？厾脱么肉麻，伊呒没方向了。
姆妈想到了生产组里个同事杨家姆妈。伊个先生是仁济医院个医生，可以去问问看个。搿个尴尬个任务就落勒阿姐身浪了，伊出门个辰光，又拖牢我一道去。阿拉两家头跑到太平桥个一条弄堂里，二楼前厢房一房间个红木家生，蕾丝边个台布，冬天个阳光斜斜个照勒杨家姆妈个身浪，伊个鼻头邪气挺，戴个付老细巧个金丝边眼镜，勒勒一针一线个绣羊毛衫，搿是里弄生产组里分配拨个人个工作量。杨家伯伯正勒试放几张新买的唱片，伊老肯定个告诉阿拉：馒头好吃个，呒没关系”。临走，杨家伯伯还往我个袋袋里装了几粒鱼皮花生，杨家姆妈拿了三件羊毛衫包好交拨阿姐，讲：回转去交拨㑚姆妈，今朝夜到阿拉要去看尹桂芳个越剧，搿点“生活”来勿及做了，请伊帮帮忙，到了月底我会帮伊算工钿个。”
杨家姆妈搭阿拉屋里勿一样，只有个独养女儿，邪气漂亮。杨家伯伯收入又高，勿愁吃勿愁穿，杨家姆妈完全可以勿去里弄生产组做个，只是形势要求每个家庭妇女，现在叫全职太太个，应该自食其力，走向社会，伊也就跟潮流了。不过，伊领回来个“生活”常庄勿能按时完成，最后就要请我姆妈代劳。姆妈碰到搿种情况心情蛮复杂个，多一眼收入当然好，不过伊留下来个羊毛衫侪是深颜色个，勒上头绣十字花，眼睛邪气吃力。
我个心情也是复杂个，姆妈到伊拉屋里指导绣新花样，也会得带我去，我就可以吃到牛轧糖、甘草橄榄了，但是又勿能东摸西摸，最后，唉！带回来个“生活”呢，又要让我姆妈忙到三更半夜，眼睛通通红了。
我跟牢仔阿姐蹦蹦跳跳回来了，我抢勒海拿杨家伯伯个闲话，也就是伊个“鉴定报告”告诉大阿哥个辰光，伊松了一口气，拿起一只馒头敲勒我头浪。我咬了一口，“雷米封馒头”倒是有眼甜津津个呀！
图片来自网络