一名大清官员勒国外个咆哮与哀嚎 / 开普饭

沪语朗读：王浩峰

一名大清官员勒国外个

咆哮与哀嚎

原创：鸣人之声

作者：张鸣

沪语改写：丁迪蒙

朗读：王浩峰

勒晚清个历史浪，刘锡鸿勿算是个大人物，但是伊个事体，倒是蛮触眼睛个。伊原本是郭嵩焘个幕僚，受郭个提拔，成为了郭出任驻英国公使个副手。呒没想到个是，到了英国以后伊却是恩将仇报，常庄打小报告，讲郭嵩焘个做派让国格受到了耻辱。小报告受到国内保守派大人物个支持，刘锡鸿就升了，担任了驻德公使。但是，伊还是打郭嵩焘个小报告，两个人水火勿相容。最后呢，各打五十大板，统统卸任回来了。

在回国个船浪向，有一日老清老早，大家侪勒睏觉，突然之间，刘锡鸿个客舱里向，传出来大得要死个骂人声音搭仔嚎叫，拿大家侪惊醒了。船长搭仔大副拿翻译寻来问发生啥事体？只看见伊个佣人跪勒地浪，刘呢，还勒拼命个叫，骂人。原来啊，伊个假牙齿摆勒面盆里，佣人以为是龌龊水，就泼到海里向去了。刘锡鸿认为，呒没假牙事体大，自家回去没办法见皇帝了。所以勿管船长哪能劝，侪勿来三，还是勒勒穷叫八叫。最后，船长告诉刘锡鸿，上海也有配假牙个，船到上海，伊负责赔副假牙拨刘锡鸿，搿能，再算让搿位大清公使大人安静下来了。

勿分场合，只要自家勿爽，或者邪气爽，就会得哇啦哇啦叫、说说笑笑，是我国家个人勒国外最让人头痛个毛病。其实呢，搿些人勒自家国家里也是搿能，并勿是到了外头故意演拨洋人看个，刘锡鸿，一个清朝高官也有搿能个毛病，看来啊，搿种毛病历史还是蛮悠久个。

勒国内生活，只要是勒公众场所，总免勿了有人大声喧哗，勿是说笑，就是哇啦哇啦叫，好弄出多少大个声音，就会得弄出介大。侪旁若无人，好像旁边根本就没人。有辰光住酒店，有晏回来个客人，哪怕已经是成更半夜了，也是吵得吓人，根本没想过自家搿能做，会打扰别人个。前一抢成为公共话题个跳广场舞扰民，其实也是搿能，跳舞个人根本勿想旁边居民是否会拨吵到，只顾自家个。旁边个居民觉得搿种声音实在是勿能容忍，恨勿得拿把枪来打。

所以，讲究集体主义我是邪气勿同意个。假使搿个主义是集体个，也只是小圈子个，熟人之间个集体，只要周围个人伊拉勿认得，葛就勿管了。无论闹成啥个样子侪无所谓。习惯性个大声音，大动静，是因为勿是搿能，对方就听勿见。久而久之，对方即使能够听得见，也照样动静大。至于周围个人拨打扰，原就勿是伊拉所要考虑个问题，因为搿些人搭自家侪勿搭界干个。即使人家觉着搿种作为邪气坍台，像刘锡鸿伊能勿仅仅是坍台，当船浪向个客人晓得伊是大官个辰光，就连得朝庭个面孔侪坍光了。

但是，从古至今个、大大小小个刘锡鸿拉，并勿会搿能想，因为，周围个人无论哪能讨惹厌，哪能生气，侪是陌生人，呒没机会去告状，也勿会拿伊拉个丑态转告拨刘锡鸿拉认得个人个。

其实，教养问题，本质浪是个文明程度问题。勿到一定个文明程度，就勿会有相应个教养。假使非要用中华文化特色来为自家人开脱，实际浪不过是自欺欺人罢了。