过年辰光做点心
（作者：侯宝良）
打开尘封的记忆，寻觅往昔的岁月
叙上海老底子事 忆上海老底子人
诉上海老底子情
过年辰光做点心
侯宝良
最近几个老邻居辣微信群里向聊天，眼看春节快到了，往年搿歇辰光个话题侪是一家门到啥地方白相、去啥地方吃饭，或者约几个朋友寻地方聚会吃茶。今年勿来三了，眼看新冠疫情又开始辣交关地方散发，大家侪觉得还是宅辣屋里为好，所以聊个内容就变成老早仔春节里欢喜吃啥点心。
阿根讲，老早仔过年走亲眷侪要送点心嗰，猪油大松糕要比奶油蛋糕吃香，因为平常头里松糕勿大看见。伲老早乡下辰光也只有过年前头屋里向会“庄糕”（就是蒸糕），红糖一拌、摆眼赤豆就算蛮好了，切成一块块样子就是黄松糕。要是再放点核桃肉、蜜饯唠啥，绝对算上档次了。噶咾，现在迭排松糕侪成了上海乡镇老街浪个特色。
阿五头勿声勿响，发上来一只八宝饭图片，油光光个糯米饭浪向摆满瓜子、糖冬瓜、葡萄干、核桃肉。我欢喜吃，也会做，一看就想到热腾腾个八宝饭端辣自家眼门前，馋得“馋吐水”溚溚渧。马上回过去一条问伊：“八宝饭看看简单，要做得好，侬啊晓得里向个窍坎？等歇我来教侬”。
正好搿天刚刚做了几样点心，马上拿起手机拍了一盆桂花糖年糕，发到微信里。图片浪个糖年糕红白相间，看上去光滑细腻，厚笃笃嗰，邪气上镜。
阿五头马上发了一只“眼热”个动态表情，再跟一句闲话“喔唷，侬搿只手机美颜功能结棍个呀，一盆年糕也被侬拍得青春靓丽。”
阿根也跟了一条：“迭种介糖年糕老早过年要凭小菜卡去买嗰，回转来切成一条条，开只油锅煎煎，外脆里软，刚刚煎出来就被吃光了，等勿到吃年夜饭个辰光。有年就拨侬只‘浮尸’去告诉伲娘，害得我拨伲娘骂糟蹋油。”
上海市粮票、油票
上海市布票、纺织品专用券和棉花券
上海市糖票
上海市肥皂票
我看了暗暗好笑，迭桩事体已经过去几十年了，伊居然还呒没忘记脱。想想当年食用油侪要凭票买嗰，大家肚皮里侪缺油水，平常炒菜也勿舍得多放油，侬拿介许多油开油锅，侬姆妈教训侬一点呒没教训错。到了现在，超市里食用油勿但品种多，价钿也勿算贵，数量浪更是想买多少买多少，啥人还会稀奇迭眼开油锅个油？真是今非昔比啊。
想起阿根搿位老兄从小就最欢喜吃糯米物事，我索心再传一张嵌满花生、红枣、核桃肉个蜜糕；再搭一张撒满雪白椰丝个冷团，去吊吊伊个胃口。勿出所料，伊马上就来回复了：“我晓得侪是侬自家做嗰。嗯，蛮赞、蛮赞嗰，侬覅卖关子了，快点传经送宝。”
阿五头也蛮起劲：“反正今年又要辣疫情当中过年了，侪讲呒没事体覅出去乱跑，覅捉堆，自家孵辣屋里做做吃吃，倒也有眼过年个味道，侬就露一手拨阿拉看看嘛。”
想起老早子过年辰光辣灶披间里，大家也是相互学了做嗰。今朝辣老邻居面前，我也就勿卖关子了。先关照阿五头：“做八宝饭关键要拿糯米先浸透，再蒸熟，拌猪油个辰光覅马虎，否则蒸出来就是烂饭团。”
阿根来煞勿及问：“糖年糕、蜜糕哪能做呢？”“糯米粉、籼米粉差勿多一比一混合，搿能做出来个年糕比较硬，假使欢喜糯一点嗰，就糯米粉多一眼，籼米粉少一眼。加白糖、奶粉，温水调匀，再用蒸笼蒸熟。”
搿条微信写了一半拨我勿当心先发出了。阿根急了，隔手就来一条：“后头呢？”我想了想，打字太慢，还是语音聊天爽气，就直接发语音了：“米粉蒸熟以后倒出来，趁热拌进熟猪油翻炒，再等温度降下来，到合适温度用手掿，等掿到面团有了韧性，做成块冷却就是糖年糕。加馅搓成圆子就是冷团。假使掿个辰光多加点碎花生、葡萄干、核桃仁咾啥，做成块以后切片，就是蜜糕。”
我一口气讲脱，问伊拉“学会了伐？”阿五头回复：“介便当就能学会，大家侪好开糕团店了，勿过迭眼老点心倒是勿会忘记脱嗰。”
（原文刊于2021年1月31日《新民晚报》 ）
鸣谢：侯宝良先生赐稿分享！