寻鹅访友话含山
沪语朗读：周恋云
作者：林晓瑾
沪语改写，朗读：周恋云
朋友龚兄常驻安徽做项目，半年前头就再三邀请我伲几个老朋友到伊工作个地方：安徽含山去旅游白相。含山，孤陋寡闻个我之前勿曾听说过，当龚兄解释，含山就是宋代名人王安石游褒禅山个所在地域，一记头就拉近了伊勒我心中个距离。
含山地处皖中东部个巢湖之滨，距离上海将近400公里。正当我伲为自驾远行犹豫勿决个辰光，细心个朋友又新发现了人民日报刊登个《好鹅好水熬好汤》一文，文章里描述个正是含山个地道美食------长岗村个老鹅汤。搿篇文长就像一帖催化剂，立时三刻拿我伲带上了寻鹅访友个旅程。
古代名篇加上美食个双重力道实在是大呀，我伲一帮朋友七点钟出发，本来应该是下半日1点钟左右抵达，然后到三口塘老鹅汤店去大快朵颐。强勿过，计划勿如变化，路途当中有蛮多周折，抵达含山县城个辰光已经是1点半朝后了，我伲只能咽馋唾水，望鹅兴叹。
一代名山个美名勒勒召唤我伲，勒当地知名个寅春老卤面馆吃好邪气道地个特色汤面以后，我伲就直奔伊个景点～华阳洞。
华阳洞游客勿多，科技个发展，让王安石笔下抱憾个险远秘境可以邪气轻松个欣赏搭仔穿越，缅怀思古之幽以后，我伲走出清凉个地下岩洞，轻松个勒褒禅后山笃悠悠个走，思绪呢，也从埃个旷古个朝代穿越，回到了现实。
龚兄支援含山建设8年，此地差勿多是伊第二个故乡了，介绍起含山个辰光，伊神采飞扬，像煞勒数家珍一样个列举出搿搭个种种好。随牢伊个指引，我伲来到含山博物馆，5000年前个含山凌家滩文化就诞生勒搿搭，搿是搭钱塘太湖流域个良渚文化、内蒙古个红山文化并称为中华三大有文物记载个古文化，令人称奇。
勒先秦时期，此地是吴楚两大强国个边缘地带，既受两国影响，也承受了两种文化个熏陶，直到秦始皇统一中国，搭巢湖流域一道划入秦帝国个版图。
之后个一天，我伲沿牢仔巢湖边10公里长景观大道去向姆山岛---搿座像青螺出水一样秀美个绿岛，还到运槽古镇去，像煞是名勿见经传个地区，竟然有介丰厚个人文底蕴，勿断引人入胜。
来到最后一站长岗村，只看见农家屋舍散落勒山边个田野，炊烟袅袅，古井搭仔古银杏树下头，散养个鸡勒勒欢快个奔跑。池塘里向，鹅群漫游。
挑了一只散养了一年半个白乌龟（鹅），一镬子肉筋到、香味浓、油而勿腻个长岗老鹅汤用来犒劳一群远途跋涉、热爱文字搭仔美食个兄弟姐妹。
一镬子个老鹅汤勒十人圆桌转了四圈，仍旧是鲜香未尽，我伲呢，因为共同个爱好，走到了一道，人间个仙境是美食、是美景，也是老朋友个惺惺相惜搭仔关爱呀。
作者
朗读者
往期回顾：
图：网络 / 编辑：渺渺