要懂石库门去吃弄堂饭 / 开普饭

沪语朗读：叶雁

要懂石库门去吃弄堂饭

作者：申涛

沪语诵读：叶雁

文字修正：丁迪蒙

今朝搭大家讲讲老上海一种奇特个饮食文化，叫做“吃弄堂饭”。

上海个石库门老房子结构邪气推板，人多房间小，勿通风，热天介热得来像蒸笼。搿辰光个电风扇、电冰箱算得上是高档个家电，一般人家用勿起，空调搿个辰光叫冷气开放，更加勿要想入非非了。要是汏好浴，吃顿夜饭，搿真是一边吃饭，一边浑身黄汗嗒嗒渧。葛末哪能办呢？大家索介搬到弄堂里去吃，拿弄堂当作是大食堂。

吃弄堂饭，是要做点准备生活个。先要端一大盆个水，拿大门口水门汀浇浇湿，去脱点热气。再拿小台子、小矮凳摆到有穿堂风个地方。搿能介一来，就好老酒咪咪，香烟叼叼，骨头啃啃，扇子摇摇，蚊子拍拍，山胡嘎嘎，赛过活神仙，搿个就叫“吃弄堂饭”。

不过，敢拿饭桌摆到弄堂里吃，是要有眼勇气个。老早仔，邻里之间为了抢公用地方，免勿了会吵相骂拔拳头。不过只要侬饭摊头一摆出来，大家一看，侬迭家人家个蹄膀弹眼落睛，葱油排骨喷喷香。赤膊阿三坐勒矮凳浪居然大前门叼叼，绿豆烧咪咪。喔唷，看勿出，立升大勒斜啦，服帖！买账！从此高看一眼，阿是饭摊头比拳头还要凶啊？

饭摊头摆出来，勿光看得出迭份人家底子厚勿厚，还看得出伊拉家主婆会勿会把家，烧菜水平是勿是搭浆。不过，一般人家有一荤一素一汤就有资格摆出来吃弄堂饭了，要是再加一碟油汆豆瓣、二两五茄皮就海威了。呒没人会戆得来拿榨菜、豆腐干摆出来存心拨人家点点戳戳。葛末就迓勒屋里向吃脱算数，省得做现世宝。上海人宁可破汗衫着勒西装衬衫里冒充老克勒，而面子顶顶要紧。

摆好饭摊头，主人家往往就会摸出一根香烟，勒勒饭摊头边浪搭下班回来个老邻舍搭腔：“老李，下班啦？侬个家主婆等侬吃夜饭了。”搿辰光老李就会搭看看伊个吃饭台子：“喔唷，侬今朝海威唻，腌笃鲜，时鲜货，一只鼎！＂饭摊头个主人就会得咪花眼笑：“小弄弄，小弄弄，阿要嗒嗒味道？”有个老邻居倒也勿怕人家讲伊面皮厚得赛过邓禄普，拿起啤酒瓶咪一口，再嚼两粒豆瓣，大节头一翘，讲一声：“味道赞个！”搿辰光，主人立刻就会得满面红光，交关得意。

有些人吃弄堂饭扳定要抜直子喉咙哇啦哇啦像唱大花脸一样喊两声：“阿六头，到井里去吊两瓶啤酒上来！”“小赤佬，到对过熟食店帮我去买半斤牛百叶！”派头是掼得来乓乓响，顺带便讲拨勒大家听听，扎扎台形，搿叫一刮两响。

天越是热，弄堂饭越是声势浩大，照上海人讲法叫“起蓬头了！”我丈人老头屋里向个弄堂是狭长个，饭摊头从弄堂口一直摆到弄堂笃底。弄堂两边饭摊头面对面，当中空出一条小路。弄得来好像是开庙会，又好像吴江路小吃一条街。要是侬下班踏脚踏车回来，要把牢仔龙头慢慢叫从饭摊头当中推过去，还要一路打招呼：“喔唷，王格里，侬今朝扎台型了呀，小菜一级唻！”“小浦东新嫂嫂，侬轰度勒斜啦，阿是发奖金啦！”“来来来，嗒嗒味道！”“哈哈，勿要客气！”闹猛得来奥去话伊唻！

搿辰光，五号里个宁波阿娘拿臭豆腐、臭冬瓜、烂茄糊统统搬出来，吓得来灶披间老山东逃到弄堂口。宁波阿娘还来得个客气，看见熟人走过就一把拖牢：“ 熏熏贼臭，吃吃喷香，贼噶鲜啦！天噶热，吃眼那，勿发痧气雷＂

朋友，侬只要有本事轧进去，拿弄堂老爷叔花得团团转，坐下来搭伊一道吃脱半包前门牌香烟，吃脱伊二两绿豆烧，啃脱伊五只鸡脚爪，侬对石库门已经弄懂一半了！