閒话上海故事之——缅怀吾呃外婆张榴妹
题记：上一篇文章笔者写到呃是《閒话上海故事之——缅怀吾呃外公倪根生》，迭篇文章就要去写写外婆！嗰人是迭恁样子唻认为呃，对于各位长辈们最最好呃纪念，勿单单是对伊拉经常性呃念念覅忘，还要通过文字去记录、铭记伊拉勒拉人生旅途当中，各种过往搭点点滴滴。迭些过往搭点点滴滴，覅管是好还是坏，吾伲总归恁从伊拉呃身哴向学习到一眼啥呃么事，既可以让吾伲从中多多少少得到一眼眼收益搭好处，还可以让吾伲后辈终身去受益匪浅，更可以让吾伲搭吾伲呃后辈们了解到，吾伲呃老祖宗到底是哪恁样子呃一类人……
实际哴向，勒拉2016年08月06日星期六下半日，笔者曾经撰写过一篇上海故事——《闲话栀子花白兰花》，讲呃就是上海人搭外婆侪都是交关欢喜栀子花搭白兰花呃，笔者自从1998年7月份开始工作嘞以后，每年只要是看到嘞有人勒拉叫卖栀子花搭白兰花，眼扳数会得去各买两朵栀子花搭白兰花送畀外婆，伊本人看到嘞以后，总归是交关开心面孔上头乐开嘞花。由于嗰人从出生一直要到上小学一年级前头，几乎是由外公倪根生外婆张榴妹以及大娘舅倪榴发领养大呃，搭伊拉呃感情可以讲是交关深，总感觉到《闲话栀子花白兰花》里向描写外婆呃方面还是撰写得覅大够，属于是有得一眼眼意犹未尽，只畀过是撰写嘞一眼眼，就决定单独去写一篇搭外婆有关系呃文章！
外婆张榴妹，伊勒拉2008年2月16号礼拜六弹老三，伊享年91虚岁，勒拉伊天仔真可以去讲是嗰大晴天，天气晴朗艳阳高照。
2012年3月17日星期六夜到头笔者撰写过一篇《品读百味人生之——我以为我是可以的》文章，勒拉其中有一段文字是迭恁样子唻描写呃，笔者本人就决定要再一次一字覅漏呃去复述一遍，原文如下：“当外婆去世的第三天，笔者抬头望着挂在墙上的挂历，多想让日历和时间永远都停留在她辞世的前一天！从小到大笔者不是没有哭过，只是不知道什么叫‘哭’，流眼泪的机会更是少得可怜，可以说是历历可数，但是在那一刻笔者却流泪了，而且哭得很长很伤心，笔者知道她离开笔者以后，从此在笔者的世界里又少了一位疼爱笔者的亲人。笔者至今都无法忘记，每当到了赤日炎炎的夏季，只要去外婆家，她总要去冷饮店买光明牌大冰砖给笔者吃，其实笔者心里也清楚，她也是喜欢吃的，只因家里条件不好不能多买，故而借故说自己不喜欢吃而让给笔者吃。还记得，她最最喜欢做的两件事情，其一是外婆最喜欢倾听秋虫的鸣叫，其二是佩戴栀子花和白兰花。每年到了秋季，她总要买一两个叫蝈蝈放在家里，听听虫儿鸣叫，买一两朵栀子花和白兰花佩戴在身上。自从笔者开始工作以后，只要看到街上有栀子花和白兰花卖，总要各买两朵送给她，到了赤日炎炎的夏季笔者同样也会买一块光明牌大冰砖给她吃，她见到之后总是长时间的笑得合不拢嘴，一边笑一边吃一边还不停地夸笔者是个有良心的好小囡……笔者原本以为是可以将上述事情，都通通的忘记掉的，然而到了今天，却依然能记得清清楚楚！……”之所以自家要迭恁样子去做，就是为嘞表明，尽管外婆弹老三到今早仔已经有得十一嗰年头嘞，做为外甥呃本人始终是念念覅忘呃，也会得时覅时呃想起嘞外婆、想起嘞搭外婆相处期间、讲閒话日脚里向、以及搭外婆有关系呃点点滴滴，勒拉有些辰光，还会得搭家母以及大娘舅倪榴发谈起已经故去呃外公搭外婆……
外婆伊本人是一嗰目不识丁呒得工作呃家庭妇女，因为每嗰号头要去邮政局帮助外公代领工资、报销等各式各样呃原因，是邪气需要一嗰图章呃，外公倪根生曾经就帮外婆张榴妹去刻过一嗰木头（制）呃图章，外婆伊顶多只认得“张榴妹”迭三嗰字，而且侪是要放勒拉一道辰光，伊侪会得全部去认得，假使讲，侬要是拿迭三嗰字侪都去分拆开唻，一嗰一嗰让伊去认，伊可以讲一嗰字也是覅认得呃。
外婆伊迭嗰一生夯不啷当生育有八嗰子女，有得五嗰囡鱼【读音为：nhoe'ng】，三嗰伲子，老大到老四侪都是囡鱼，老五到老七侪都为伲子，老八乃末头小囡同样是囡鱼。伊拉呃名字分别叫做：老大“倪榴娣”、老尼“倪兰英”、老三“倪金英”、老四“倪榴珍”、【备注：伊是笔者呃家母。】老五“倪榴发”、老六“倪林发”、老七“倪金凤”，覅是讲有得八嗰子女吗？！哪恁只去写嘞七嗰人呃名字呢？！只因勒拉笔者呃大娘舅倪榴发上头，外婆曾经还生过一嗰男小囡，迭嗰男小囡生下唻就是有得毛病呃，覅晓得到底是啥呃原因，迭嗰小囡是碰也覅恁去碰呃，只要是轻轻呃去触碰一下小囡呃身哴向，迭嗰小囡呃身体里向就会得冒出像油脂一类呃么事，由于生病外加勒拉掰搿辰光医疗技术侪覅是交关发达呃，呒过多久，顶多也就勒拉一年左右呃光景，就弹老三嘞。迭桩事体，除忒外公倪根生曾亲口对笔者讲过以外，勒拉某趟家庭聚会当中，还听外婆对笔者呃三表姐沈燕讲过一趟。
畀外公倪根生搭外婆张榴妹相互间做一嗰比较呃閒话，外公覅是邪气讲究穿着打扮呃，只要人搭衣裳清清爽爽干干净净，衣裳呒得一眼眼破损呃地方就好嘞。伊本人邪气欢喜喫，是一嗰标标准准呃老饕客喫货，自家也晓得并懂得啥呃么事对伊唻讲是好喫、可以去喫喫呃，哪恁去喫各种时令小菜，僎对自家呃身心健康是有利呃。除忒上述笔者所讲到呃内容以外，外公相比较而言，基本哴向还是属于一嗰沉默寡言呃人，只有偶尔会得去讲一两句閒话，而且是勒拉交关熟悉呃人之间，外公僎会搭伊去讲忒一两句閒话，伊基本哴向是覅大啰嗦呃，恁覅讲閒话就覅去讲嘞。外公讲起閒话唻，是直奔主题简明扼要点到为止，要是覅是邪气熟悉呃人，伊是轻易覅肯开口去讲閒话呃。
外婆搭外公就覅大一样了，伊拉俩嗰人是反过唻呃，虽然讲外婆呃身体搭外公同样是覅大灵光交关推扳呃，又加之自家有得好几种毛病，身体里向胆囊等各类器官覅是顶顶好呃，每天还要搭药罐头打交道，要去喫多种药品，诸如有得“金胆片”之类呃药品，从而造成嘞伊有得交关多呃小菜是覅好去喫呃，基本哴向是呒得一眼眼口福呃。即便是今早仔大娘舅倪榴发去烧外婆好喫呃各种小菜，就算是畀自家屋里厢呃“盐钵头侪都去打翻忒嘞”，外婆喫过一小口之后，伊本人始终僎会得觉着，今早仔烧呃各种小菜，哪恁仍旧是交关淡滋刮辣唻，一眼眼咪道也是呒得啊，最好是勒拉小菜上头再去多撒一把盐。
勒拉外婆呃生前，曾经对伊呃子女以及吾伲小辈亲口讲过迭恁一句閒话，讲道：“老头子【备注：外婆称吾呃外公为老头子。】伊有得喫福，也会得勒拉喫呃方面去好好较享受享受，只要是勒拉经济条件允许呃情况下头，伊欢喜喫就让伊喫好唻，吾本人是一眼眼口福也呒得呃，有得交关多呃小菜是覅好去喫呃，既然吾覅恁够勒拉喫呃方面去享受享受，吾搭老头子俩嗰人，就只好是黄牛角水牛角大家各归各好唻，喫呃方面吾就覅会得多去考虑嘞，吾只好勒拉穿着打扮方面去享受享受，侬又覅是覅晓得，吾本人从年轻开始直到今早仔，一直侪是邪气欢喜穿着打扮，只畀过，勒拉老早仔、勒拉吾本人年轻呃辰光，由于家庭经济条件是交关推扳呃，外加还有得七八呃子女，是覅允许、也是覅恁去考虑穿着打扮呃问题呃，今早仔经济条件忒老早仔比较起唻，要宽裕得交关多嘞，就好去考虑穿着打扮呃问题嘞！”……
纵观外婆迭嗰一生，伊本人滴滴刮刮是一嗰邪气欢喜穿着打扮呃人，只要勒拉经济条件允许呃情况下头、只要自家呃手头还有得一眼眼宽裕，伊每过忒一两年就会得跑到裁缝店铺里向，去定做一套适合伊本人穿呃、近抢把勒拉市面哴向交关流行呃时髦套装。勿单单是迭恁样子唻，外婆也是一嗰邪气爱清爽搭干净呃老太太。但凡是认得外婆呃各类亲朋好友、周遭呃邻居以及附近小菜场里向买卖小菜呃各类小商小贩们，只要是碰到嘞吾伲，侪都会得对吾伲迭恁唻讲道：“侬呃老娘（外婆）真是一嗰爱干净、邪气清清爽爽呃时髦老太太噢！”……“时髦老太太”就成为嘞伊本人独有呃标签。覅管勒拉啥呃情况下头，就算伊自家今早仔呃身体覅是邪气好，勒拉生毛病嘞，只要是任何一嗰人碰着并看到嘞伊，伊畀伊拉呃一种感觉就是——迭嗰老太（太）真是一嗰整整齐齐清清爽爽干干净净呃时髦老人。
还有三条因素同样也是要去讲清爽呃，第一条因素就是：覅管外婆是去附近呃小菜场买卖各类小菜，还是去屋里门口头倒倒垃圾，伊本人勒拉出门前头，眼扳数要去梳妆打扮一番，哪怕是顶顶简单、最最快速呃梳妆打扮，伊也是要去弄一弄呃，只有侪都去弄好嘞以后，本人觉着心满意足嘞，僎会得去买卖小菜、倒倒垃圾，要是自家呒得去弄好、呒得去梳妆打扮呃閒话，迭嗰两桩事体是覅肯去做呃；第尼条因素就是：覅管勒拉啥呃辰光搭情况下头，外婆始终是以开心呃笑容唻迎接、面对每一嗰认得伊呃人，伊始终侪会得保持着乐观搭开心呃笑容，但凡是碰着并看到过伊呃人，伊侪都是笑嘻嘻呃；第三条因素就是：有得覅少呃中老年人，一旦伊拉畀跨入到嘞中老年人呃行列以后，原先一头墨墨黑油光锃亮呃头发，就会得变成煞煞白呃白头发，外婆搭别人家是覅大一样呃，等到伊到嘞老年以后，头发依旧是一头墨墨黑油光锃亮呃黑头发，只有极少数呃白头发，黑头发要远远较多于白头发，顶顶起码要有得百分之七十到百分之八十是黑头发。
外婆伊为啥要迭恁样子去做呢？！伊曾经是迭恁样子唻对笔者讲呃，伊讲道：“出门勒拉外头，伊勿单单是代表嘞伊本人，伊还代表嘞伊嗰家庭，从伊嗰身哴向搭穿着打扮方面去看看，就可以畀别人家晓得嘞，伊拉屋里厢到底是哪恁样子呃。既覅管伊是长得交关好看呃人，还是长得交关难看推扳呃人；也覅管伊是搛铜钿经济条件老好呃人家，还是经济条件邪气推扳呃人家；穿着打扮起唻干干净净清清爽爽，是最最基本呃，总归是可以去做到咯，迭嗰是顶顶起码呃一嗰小小要求嘞，假使讲某嗰人每天畀别人家看上去，始终侪都是一嗰邋里邋遢交关腻心呃人，是会得畀别人家看大覅起噢，就算人家当面覅会得去讲点啥呃，勒拉背后头眼扳数要畀别人去讲忒一顿呃！还要去讲呃就是，一嗰人假使伊每天侪都保持着干净搭清爽，伊嗰精神面貌搭状态必定是交关良好呃，有嘞良好呃精神面貌搭状态以后，整嗰人随之而唻就会变得越唻越开心，一嗰每天（始终）侪都保持着开心乐观呃人，就会变得身心健康，人呃身心健康嘞就恁活得长寿一眼眼，健康长寿、寿命活得长一眼眼，迭嗰又有得啥呃覅好呢？！”……
自从外婆搭外公双双弹老三嘞以后，老房子就由大娘舅倪榴发居住着，就勒拉迭嗰一两年里向，每趟仔搭家母去探望大娘舅，周围覅同呃邻居就会得对家母唻讲道：“侬嗰老娘走得也是忒早嘞，要是恁够长命百岁，再去多活几十年就好嘞，吾伲从唻覅看到过，像侬老娘介要干净清爽，又是一嗰邪气‘时髦呃老太太’，伊自从拆迁搬迁到嘞此地块以后，伊几十年唻，从唻就呒得搭周遭呃邻居吵过一趟相骂、打过相打，也呒搭周围邻居讲过一句粗鲁呃閒话，要是碰着嘞落雨呃天气里向，看到有邻居衣裳晾晒勒拉外头，就会得去通知一下邻居，落雨嘞要收衣裳，要是邻居覅勒拉屋里厢呃辰光，还会得帮忙收一下衣裳，等到邻居回唻嘞以后，再畀伊拉，实在是忒好嘞！”……
同样是勒拉迭段辰光里向，偶尔搭家母去外婆生前经常去买小菜呃小菜场里向买卖小菜，每当有摊贩晓得嘞外婆弹老三嘞以后，侪都异口同声地唻讲道：“吾伲僎都晓得老太身体一直是覅大好呃，还以为老太近抢把身体又覅大灵光嘞，只好待勒拉屋里厢静养静养，就覅好出唻买卖小菜嘞，呒想到伊介早就走忒啦，未免也太可惜嘞，要是伊恁再去多活几十年就好嘞。覅是吹侬牛逼、吹捧侬老娘点啥噢，侬嗰老娘绝对是一嗰邪气干干净净清清爽爽呃时髦老太，而且伊对待任何一嗰人侪都是邪气客客气气呃，伊只要是询问好嘞菜价钿，买起小菜是交关爽爽气气呃，吾伲侪都愿意畀小菜卖畀侬嗰老娘。其他老人根本就覅好搭侬嗰老娘唻比呃，覅像有一些老头老太，虽然年纪看上去搭侬嗰老娘是差大覅多呃，但畀过，就勒拉其中呃一部分人，人是交关邋里邋遢呃，伊拉畀人呃一种感觉一直（始终）是邋里邋遢呃人，而且伊拉买起小菜唻门槛精到九十六，看上去，既好像是要买小菜呃，又好像是覅要买小菜呃，勿单单要讨价还价搞七廿三，有些辰光还要欢喜乌搞百叶结，覅是讲迭嗰小菜是覅好呃，就是讲伊嗰小菜是覅大灵光呃，根本就覅值迭嗰菜价钿呃，搞嘞老半天、等到半半六十日嘞以后，就开口讲，今早仔呃小菜实在是忒推扳嘞，吾就覅买侬嗰小菜嘞，像迭恁样子呃人，吾伲就覅愿意畀小菜卖畀伊嘞！”……
外婆搭外公勒拉伊拉年轻呃辰光，绝对是一嗰标标准准呃俊男靓女噢，笔者看到嘞伊拉勒拉年轻呃辰光拍摄呃老照片，【备注：据家母对笔者讲，迭两张老照片拍摄呃辰光，大约摸是勒拉伊拉50岁左右呃光景。】伊拉俩嗰人相貌假使讲放到嘞今早仔，绝对可以讲是属于“网红”一类人噢，还可以让交关多呃人眼睛也为之一亮唻。实际哴向，外婆伊本人是邪气欢喜拍摄各类照片呃，由于伊勒拉年轻呃辰光，受制于屋里厢呃经济条件，是覅恁够经常去拍摄各类照片，只好等到有嘞重要呃事体以后，僎会得偶尔去拍照片，可以讲是千年难板。
后末唻，由于改革开放经济条件一天要比一天唻得好嘞，还由于笔者呃家父爱好摄影呃缘故，屋里厢是有得一台傻瓜照相机呃，只要是每趟仔外婆呃屋里厢有得家庭大聚会，就会得帮外婆拍摄好几张照片，镜头里向呃外婆，总是开心得合覅拢嘴。笔者以及大笔者五岁呃亲阿哥，曾经侪都偷偷较畀外婆偷拍过照片，但畀过，伊呃一双眼睛就好像贼骨头一样，每趟仔侪都畀伊发觉嘞、侪都是以失败而告终，既覅管勒拉啥呃辰光里向、也覅管外婆呃年龄有得多少，伊嗰反应始终是邪气灵敏呃，坚决覅允许吾伲去偷拍伊，伊讲勒拉拍摄照片呃前头，先就要畀伊自家呃衣裳搭头发弄弄整齐干净以后，僎可以去拍摄照片，实际哴向外婆始终是一嗰交关爱干净搭清爽呃人，勒拉拍摄照片呃前头，伊绝对是覅再需要去梳妆打扮点啥嘞，可是伊本人每趟仔勒拉拍摄照片呃辰光，始终就是覅大放心，总归还要去弄得更加好，勒拉镜子前头照一照，一直要等到伊自家觉着交关满意嘞为止。
相比之下而言，外婆要比外公外向得多嘞，更愿意去搭大家多讲一眼眼閒话。只要是勒拉身体状况良好并允许呃情况下头，外婆更愿意搭任何一嗰认得伊呃人，去谈谈山海经、嘎嘎讪胡。但畀过，勒拉谈论呃辰光，伊始终有得迭恁一条做人原则搭言行准则，谈论归谈论，伊永远覅会得去谈论某些人家屋里厢呃家长里短，覅会得去讲别人家覅大好、覅大灵光呃地方，总归去讲人家好呃地方、自家所晓得呃各类人事物情……伊曾经还对笔者唻讲道：“任何一嗰人，伊多多少少侪都有得错误搭缺点，覅要老是盯牢人家错误搭缺点呃地方覅放，去讲人家错误缺点呃地方，迭恁样子去做去讲，既是覅好呃，也是覅对呃，要多去看看人家好呃地方，多去讲讲人家好呃地方！”……
辰光走到嘞今早仔，笔者僎刚刚发觉并意识到嘞，外婆尽管是一嗰目不识丁呒得啥呃工作呃家庭妇女，伊要么覅去开口讲各类閒话，一旦伊要是开嘞口、讲起嘞各类閒话唻，绝对是一套又一套呃，吾伲还覅一定恁讲得过伊唻，伊可以讲得侬呒得一眼办法好去反驳伊，勒拉所讲呃閒话当中，有得覅少呃閒话，还包含着邪气丰富呃哲理性唻。勒拉外婆交关开心呃辰光，伊还会得寻寻侬开心、还会去开一些交关高级呃玩笑，去讲讲一些笑话畀每一嗰人听，一些低级呒得啥趣味呃閒话，从唻呒听伊去讲过一句，伊就“好像是一嗰幽默大师”。
笔者就列举一两嗰例子，唻加以说明外婆“像幽默大师”。
第一条例子就是：当笔者呃亲侄子陆昊长到嘞一岁半到两岁左右呃辰光，伊就会得开始讲一些简单呃短语搭短句嘞。每趟仔家母带上笔者搭侄子去探望外婆呃辰光，外婆看到嘞陆昊以后就变得交关开心，还会得去寻寻伊开心，一边笑着一边问侄子：“喂喂喂，小朋友侬唻啦，欢迎侬唻白相相噢！喂喂喂侬是几号啊，侬是六号（陆昊）噢，侬一定要记记牢啊，覅管啥人唻问问侬，侬只要去回答伊拉，吾是六号（陆昊）就好嘞，千万覅要忘记忒噢！”……只因为侄子呃名字“陆昊”，勒拉上海方言閒话当中，搭“六号”呃读音是一色似样、几乎是呒得啥区别呃，所以外婆侪会得寻寻侄子开心、逗伊白相相。
第尼条例子就是：就自从掰搿辰光开始起，勒拉相当长呃一段辰光里向，只要是笔者每嗰号头独自一嗰人去探望外公搭外婆呃辰光，伊眼扳数也要唻寻寻笔者呃开心，伊看到嘞本人以后，就先会得开口唻讲道：“哦呦喂，‘高桥爷叔’侬唻白相啦、‘高桥爷叔’侬今早仔又唻白相相啦！”……起初笔者听到外婆讲迭句閒话呃辰光，由于自家属于有得一眼眼愚笨呃原因，总觉着外婆讲得覅大好，心里向还有得一眼眼覅大开心唻，等到嘞外婆寻问嘞笔者并加以解释说明以后，笔者就侪都释然覅再去介怀嘞。伊就寻问道：“侬老底子是居住勒拉啥呃地方啊？！”笔者就回答伊道：“吾老底子是居住勒拉高桥古镇哴向呃。”伊又继续寻问道：“侬侄子要叫侬一声啥呢？！”吾接下去回答道：“伊自然要叫吾一声爷叔咯。”外婆就解释道：“因为侬本人老底子是居住勒拉古镇高桥上头呃，侬侄子要喊侬一声爷叔，所以吾就要叫侬一声‘高桥爷叔’嘛，吾之所以要迭恁样子去做，既呒得讲错忒，也呒得做错，侬讲吾讲得到底是对覅对啊？！”……
起初笔者听到嘞“高桥爷叔”迭嗰四嗰字眼，之所以心里向会得覅大开心，只因为笔者晓得嘞迭嗰四嗰字呃唻历。虽然“高桥爷叔”迭嗰四嗰字是由上海滩哴向三大亨之一呃杜月笙叫出名呃，闻名嘞整嗰上海滩哴向。但畀过，勒拉杜月笙呃前头、勒拉最初呃辰光，迭嗰四嗰字眼，只流行于原唻呃川沙县地区，高桥镇原唻就是属于川沙县管辖范围之内呃，而且勒拉最初呃辰光迭嗰四嗰字眼，伊呃含义是交关覅好呃。据说勒拉老里八早呃高桥古镇哴向，辰光顶顶起码还要勒拉杜月笙出生前头，出现嘞一批专门从事“坑蒙拐骗”行当呃人，大家对于从事迭种行当呃人，勿单单是恨之入骨，还对伊拉起嘞一嗰覅大好呃外号，就是叫“高桥爷叔”，只要是大家听到嘞有人叫某嗰人是“高桥爷叔”呃閒话，就会得让周遭人群变得警惕起唻！……
另外还要去讲呃一桩事体就是——外婆搭外公奉献一片小小爱心呃故事，尽管外婆搭外公呃经济条件覅是老好呃，还尽管迭桩小事体，勒拉其他人看唻，根本就是属于微不足道不值一提呃小事体，侬拿出唻讲伊做啥呢，但畀过，本人却覅是迭恁唻认为，本人认为绝对是值得吾伲小一辈好好较唻学习学习呃，绝对是言传身教呃好教材！
外公搭外婆是交关有得爱心呃人，比方讲：就勒拉伊拉呃小区里向，有得一家人家祖孙三代共处一室，原先是居住勒拉二室一厅呃房子里向，伊拉屋里厢是邪气普通呃人家，因此讲伊拉呃经济条件覅是顶顶好呃，因为孙子得嘞血癌，为嘞畀孙子去看好迭嗰毛病，就畀房子置换成嘞一室一厅，还是居住勒拉同一嗰小区里向，就算是迭恁样子，铜钿还是觉着覅够用，小区里向呃邻居晓得迭桩事体以后，大家互帮互助纷纷慷慨解囊捐款，尽管外公搭外婆自家呃经济条件也覅是顶顶好呃、也是普通人家，但是晓得嘞迭桩事体以后，也从自家呃牙缝当中省下嘞50块洋钿，捐款畀嘞伊拉，而且还是外婆亲自送到伊拉屋里厢呃。迭家人家晓得外婆是呒得啥呃经济收入呃家庭妇女，一边落眼泪水、一边覅肯去接受，要拿铜钿还畀嘞外婆，外婆坚决覅同意，讲无论如何也要收下50块洋钿，迭嗰代表吾伲屋里厢呃一眼眼小心意，还开玩笑呃对迭家人家去讲，侬是覅是嫌隙吾铜钿畀得交关少，所以就覅肯去接受啊！……伊拉呒得办法嘞，只好接受50块洋钿……
覅管用多少文字去讲外婆，免覅了有得挂一漏万呃地方，尽管是迭恁样子，笔者还是要以最平淡朴素呃文字，去描绘本人所晓得呃外婆，同样是谨以此文，唻缅怀已经故去嘞十一年呃外婆张榴妹！
【备注：①文章为作者原创；②所有的外公外婆大娘舅图片均是翻拍的翻；③各类文字动图图片均来源于网络上：④感谢原创图片。】