一个甲子的友谊
沪语朗读：王幼兰
原创： 曹雷
来源：夜光杯
上海话改写：郭莉
朗读：王幼兰
俄罗斯“红旗歌舞团”马上要再次来上海演出个消息，勾起我记忆中交交关关画面，好像已经邪气遥远了，又好像就勒勒昨日，一切还是历历在目。
搿已经是六十七年前个事体了。一九五二年，我刚刚考进复兴中学，还是个少先队员。有一天，学堂少先队交拨我一个任务：要参加一次纪录片电影个拍摄。叫我着得整齐一眼鲜艳一眼，明朝一早，会有车子到阿拉屋里来接我。第二天一清早，果然有车子来了，车子里还有一批上海戏剧学院，当时叫“中央戏剧学院华东分院”个学生。大车子拿阿拉接到一只电影摄影棚，棚里搭起了一只舞台，台下还有一排排观众席。迭个辰光阿拉再晓得，此地是要拍《苏军红旗歌舞团在中国》个演出纪录片。阿拉侪是作为纪录片里向看演出个观众个。我跟另外几个其他学堂个少先队员，还要完成向台浪演员献花个任务。
拍摄从清早一直到半夜。当年勒勒台浪演出个，是红旗歌舞团第一批成员，现在讲起来就是“元老”了。当时迭眼演员，刚刚勒勒反法西斯战场个枪林弹雨中历经了考验，身浪向好像还带了战火硝烟气息。搿种气息，从伊拉演出热情中还能够感觉到！合唱指挥，是歌舞团首任团长亚历山德罗夫个儿子，伊对演员演唱歌曲要求严格得来，我真是印象深刻，至今难忘！每一只歌，侪要反复演唱几遍，定规要拍下最佳歌声搭仔演唱者个最佳精神状态为止。有几只歌，我当时还老陌生，但是等到镜头拍好，我竟然也会得唱了！勒勒演员休息个短暂辰光，摄影机就掉转头来拍阿拉看演出个镜头：欢呼、鼓掌、欢笑……迭个辰光，台浪向演员们就会朝阿拉招手，欢呼，帮阿拉造气氛。一整天下来，歌舞团演员跟阿拉虽然始终是台上台下，但是已经成了亲密朋友。
当摄影机跟灯光勒勒选取镜头地位，准备布光个辰光，为了放松身体，阿拉就开始白相手足小游戏，比如：手指头从左往右画圈，脚尖同时反方向画圈；又比如左右手在胸前同时反方向画圈圈。台浪向演员也跟阿拉一道指手划脚起来，啥人做错了，台上台下就一道哈哈大笑。就搿能，阿拉虽然呒没跟红旗歌舞团演员有机会直接接触、交谈，但是阿拉建立起了真诚个友谊。拍摄结束辰光，已经过了半夜，演员个辛苦可想而知，但是一眼看勿出伊拉有啥个疲劳、松懈、懒散。大家侪讲，到底是战火中冶炼出来个队伍，经得起考验！
过脱一段辰光，搿部纪录片公开放映了，更多中国观众目睹了当年苏军红旗歌舞团个演出风采。而我自家，居然勒银幕浪看到了自家一只热烈欢呼个大特写！迭个是我搿辈子勒勒银幕浪向留下来个第一只镜头，搿只镜头跟红旗歌舞团演出连结勒一道，勒勒我记忆里留下了终身难忘个印记。
上海言话叙身边事体
往期回顾：
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号