跨过五十年个电话
沪语朗读：浥薇
来源：新民周刊
作者：胡展奋（发表于2019-08-15 20:17）
沪语改写、诵读：浥薇
既然可以梦里跨过半个中国去睏一个人，也就有人跨过半个世纪来只电话——契机是一只“群”拨个。拉我群个，我一般勿拒绝。也勿看。唯独有只群是例外个，伊就是李大伟为群主个“六艺茶馆书友会”。
搿只群，只谈文学搭上海史，也常庄有线下活动，群友邀我做演讲，侪是写作圈里个人，条件比较苛刻：惟陈言务去！
搿有点难。我自拟了一只主题，叫做“论第一口奶”。也就是少年个阅读写作对人一生写作个重大影响。
场面邪气热烈。因为大家侪老拨面子个。其中有位长者，拿过伊自家写个书《地标记忆》来请我签名，阿拉相互看了一眼。好像有眼面熟陌生。呒没想到第二天就接到搿位长者个电话了，第一句言话就惊雷滚滚：五十年前阿拉是宜川一村个邻居，侬还记得伐？侬是99号106室个，是哪能换成90号106室个？我屋里就是原来个90号106室呀！
我当场就戆脱了。搿句言话简直就是“接头暗号”，我就好比是半个世纪后拨“唤醒”个特工，脑子里向一个激灵就穿越到了1965年了——
我屋里1964年从静安区康定路搬到宜川一村后，我阿哥就老是叫胸口勿适意，最开始是吃勿落，慢慢叫饭也咽勿下去了。母亲带伊去查了几趟，根据伊常常嗳气搭泛酸水个症状医生总归讲伊是胃病，开点“食母生”之类个药，再后来老是叫胸口闷，面色也发黄了，母亲就警觉了，送进医院彻查个结果居然是肝癌。
介小个年纪居然生了肝癌，整个宜川一村轰动了——伊个辰光生癌个人老少个。问题是，医院对大阿哥个毛病根本呒没办法，只好让伊回转去。人就一天天瘦下去，肚皮里大量个腹水，拿只肚皮胀了老老大，静脉管像蛐蟮一样爬满了肚皮表皮下头。我母亲勿断帮伊撸肚皮。屋里向个人天天围牢伊哭。但是，生仔毛病以后，伊倒是像一个真正个硬汉子了，从来勿哭，反而安慰大人讲，人总归是要死个，我不过是早走一步罢了。
大人常庄讲，搿言话，啥地方像14岁个小囡讲个呀。
好像是勒勒1965年6月初搿段辰光，我阿哥到了弥留阶段了。伊小学个校长余纪林，得到消息亲自赶过来。新村里又一次轰动：余校长为大阿哥最后一次带上了红领巾。
搿是一个夜快头。一只有晚霞个夜快头。五十年后，小学同学丁凤英回忆讲，第二天一早个升旗仪式浪，延长路小学降半旗为我大阿哥致哀。不过我一直勿明白个是，阿拉哪能又从99号106室搬到90号106室个呢？记得阿哥死脱后，母亲一回到屋里就哭，人人侪说伊应该调只环境。问题是，刚办过丧事个房间，人家习惯浪总归觉着勿吉祥个。我伊个一年刚刚10岁，年纪小勿懂事体，只晓得后首来有个“大救星”，帮阿拉勒勒附近90号安了新居，现在晓得了，“救星”居然就是打电话拨我个群友朱伟忠拉个阿爸：朱永祥！
万能个群啊，伊是让朱伟忠搿能叙述个——
“我是上海洛川中学66届初中生。当年搭侬阿哥认得个。我阿爸朱永祥搭侬阿爸是同事加邻居，除了100号203室外，阿拉当时还拥有90号106室，㑚阿哥去世后，㑚姆妈就搭我阿爸讲，老朱，帮帮我伐，每天要面对我儿子死个辰光个情景，我实在受勿了……
我阿爸回来一商量，自家有三个囡儿两个儿子，龙凤呈祥，人气也真够旺个，老同事屋里有难，就帮帮伐！勿顾舆论个飞短流长，阿爸毅然决定换房。换房以后，阿拉兄弟姐妹五个勒勒伊个里向生活得邪气顺，所谓“积善之家有余庆”，多年以后我要结婚了，㑚阿爸为表谢意，还特地为我精工油漆了一整套家具唻！
阿拉宜川新村有只‘老邻居群’，伊天我拿侬个演讲发到群里，呒没想到引起轰动了，居然介许多人晓得侬，而且纷纷提供侬个种种信息，一直追溯到侬阿哥去世以及阿拉两家人家调房子个往事……”
电话欸一头伊还勒勒叙述，我已经戆脱了一样个了。搿只跨过五十年个一只电话……万能个群啊，万能个群！
图片来自网络
往期回顾：
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号