过年盘缠
作者：吴翼民
推荐：丁迪蒙
好像还呒没到腊月，我个脑海里就会跳出“过年盘缠”迭四个字来，要想好准备“过年盘缠”来应付年节啦。伊天跟老伴搭囡圄讲起迭个，伊拉侪感着勿理解，囡圄是一眼也勿晓得是啥意思，老伴好奇个问：“是勿是计划过年辰光出去旅游个费用呀？”我笑笑回答：“以前盘缠可以解释为‘路费’个，但外延讲起来意思要多喽，尤其加了‘过年’二个字，搿就应该理解为‘过年费用’了呀。”伊拉仍旧似懂非懂，还感着现在根本用勿着筹措啥个“过年盘缠”，银行卡浪随时可取铜钿，手机支付宝微信随时可以收付钞票。我还是欢喜坚持从前作派，手里要有实实在在个现金，眼见为实，方始定心，就决定到银行取一沓现金、最好是连号个赤刮拉新个钞票，譬如讲拨小辈发发压岁钿唠啥。
以前，每家人家侪拿筹措“过年盘缠”作为过年前一桩大事体来做个，因为要过好“年关”邪气重要，“年”是个关口，除脱吃喝拉撒，交关事体侪要勒“年关”辰光处理好个。而所谓个吃喝拉撒又必须比往常要考究，——祭祖飧宗勿可马虎，年糕年团年夜饭勿可马虎，新年头浪的个人来客往勿可怠慢，还有一大家门个新衣裳新鞋子勿好省脱个，迭个之外还要添眼新个日用家生、多多少少拨自家个小囡发眼眼压岁钱……搿些费用侪要做好预备，当然一年里亏欠亲朋好友个债务一定要还清个，有道是“有借有还，再借勿难”。假使讲债务欠过了年关，会拨债权人当作勿守信用，断绝往来事小，败坏名声事就大了，而搿一点是做人最基本个品行。当然老早欠了债主高利贷之类就另当别论。杨白劳就是欠了黄世仁个高利贷而勒年关拨逼债逼死脱个。故乡苏州名胜虎丘山有座赖债庙，讲是欠债人只要年关辰光迓到迭只庙里，债主就勿可以追逼。据说到了年关搿庙里迓满了避债个穷人。搿只是传说而已，从前到了年关哪能有勿讨债还债搿呢？所以讲年前准备“过年盘缠”，其中也有偿还一年债务个成分勒里向。也因此么，寻常百姓对筹措“过年盘缠”越发勿敢掉以轻心。
我小辰光屋里家境拮据，每年近腊月辰光就会感着爷娘筹措“过年盘缠”个艰辛，伊拉个嘴巴里常庄会念叨“过年盘缠，过年盘缠……”我晓得爷娘个心思，也勿敢勒伊拉面前提要钞票个事体，譬方讲新学期个学杂费。伊个辰光我正勒读小学，每年侪蒙学堂减免学费，但有个老师照常会勒晨会课浪催缴学费个，也由此我对一二年级辰光个班主任戴老师异常感恩，因为伊从来勿勒晨会课浪宣读欠学费学生名单，也从来勿张榜公布。
父母常庄为“过年盘缠”而犯愁，母亲加紧了做外发加工个生活，“掉丝”（整理加工丝织厂个乱丝）忙到深更半夜，厢房里个手摇机声敲勒我个心浪，伊明白搿辰光赚个就是现钞；伊还帮邻居扎鞋底，也是铆足了劲，手指头被戳滴血了也顾勿得，因为也是挣个现钞。连得一向沉默寡言个老祖母也来为攒“过年盘缠”添砖加瓦了，她拿积攒了个伯父给伊个零用铜钿偷偷塞拨了母亲，母亲无论如何勿肯收，倒是勒年关前增加了拨祖母个费用，伊认为搿是天经地义个事体。
离年关越来越近了，过年个气氛也越来越浓了，迭个辰光，我伲屋里个天井里接连飞来了绿衣使者以及伊拉最美个声音，——在外地工作个阿哥阿姐分别汇来了“过年盘缠”，（月份补贴以外的钱款）一声声“陆秀芳（母亲的名儿）——图章”温暖了空气、更温暖了人心。
“过年盘缠”七七八八有了眉目，迭个年过得唻分外踏实。
往期回顾：
图：网络 / 编辑：渺渺