春来第一鲜
讲述：俞颖
作者： 孔明珠
沪语改写：顾敏
讲述：俞颖
荠菜虽然是一种平凡个野菜，古往今来生生不息，拨大家带来食欲口福个同时，还有形而上个精神滋养。之前没想到古诗搭和民谣当中会得有噶西多歌咏荠菜个作品。“三月三，荠菜胜灵丹”，讲个是，荠菜有药补个作用，“春勒溪头荠菜花”讲个是荠菜个美。春天介，勒野地里个溪水边浪，自由生长个绿叶荠菜没人采摘，几天之后菜杆顶上就会开出白颜色个细巧个荠菜花，开花个荠菜好看是好看个，但是菜叶已经勿嫩了，口味就要差勿少了。我最欢喜元代诗人杨载的一句“城雪初消荠菜生，角门深巷少人行。柳梢听得黄鹂语，此是春来第一声”，色形生动，真有意境！
小辰光，我最欢喜吃荠菜肉馄饨了，直到现勒两鬓斑白，仍旧欢喜伊种舌头麻了、酥了，鲜得勿得了个味道，荠菜好像有一种魔力，隔脱一段辰光会得想念。要讲荠菜个平民腔调，老底子伊勒城里向并勿是一直好买到个蔬菜，基本浪侪是菜农勒收割青菜、黄芽菜咾啥送到城里来个路浪，顺带便到路边挑眼野荠菜，一道卖脱，赚点零用铜钿。
野荠菜勒早春是抢手个时鲜货，尽管春雨绵绵，荠菜叶子浪、根浪有烂泥，勤劳个主妇买到了还是邪气开心个，勿怕辛苦个汏好、开水烫好，再手工斩碎，包馄饨、包饺子，烧荠菜粥，拨一家人报春讯。《本草纲目》当中讲，荠菜烧粥，明目利肝，还可以调理慢性肠胃炎，古时称“百岁羹”。
我买到荠菜除脱包馄饨，还欢喜做荠菜豆腐羹。荠菜汏好斩碎，油镬子热了，先炒肉糜或者肉丝，加水烧开，鲜汤汁渗出之后，拿荠菜倒进去，菜叶子软了之后，摆一盒划开个嫩豆腐，盖头盖好再笃脱一歇，随后水淀粉籷腻，最后撒眼胡椒粉就盛出来了。荠菜豆腐羹要趁热吃，但也要当心烫着嘴巴，小碗里向内碧绿纯白，鲜到连眼睛也眯起来了。
汪曾祺勒“故乡个食”中讲到拿荠菜包春卷，搿也是我喜欢个一道点心。荠菜春卷可以勿摆肉，按汪老做凉菜个方法斩两块五香豆腐干下去，虾米用料酒泡软，也斩碎，高兴个说话再斩眼香菇末。荠菜因为含有草酸，勿妨先焯焯水再斩碎脱。拿豆腐干、虾米、香菇、荠菜倒勒一道，摆好盐、糖，再滴眼麻油拌均匀，拿春卷皮子包起来。我勒乌镇吃到个荠菜春卷是两头开放，微微翘起个，煎好摆了白瓷盆子里，远远看过去像煞是古代一卷卷奏折，相当美观。遗憾个是，春卷皮个两头勿是包起来个，吃进去个油就比较多，只吃两三个就觉着油腻了。
荠菜勒中国各省份侪有分布，一年两季，除脱春荠菜、还有可以过冬个秋荠菜，阿拉搿眼老上海，勒过年个辰光只要吃到荠菜炒年糕就兴奋。荠菜肉丝冬笋炒年糕是我宁波籍外婆个拿手菜，碎荠菜、冬笋尖、里脊肉丝、宁波水磨年糕片，用铁镬子、开大火炒得香气扑鼻，还有鲜到骨头里个荠菜味道，一家门围勒一道伸筷子个闹猛，今朝想起来，眼镜片浪起雾了。
江南文人欢喜吟诗，一到春风拂面，苏轼、陆游、范仲淹、周作人、汪曾祺……侪勿约而同朝牢仔田野里个荠菜抒发情思。讲起来，开春之后时鲜菜也勿少，芦蒿、蚕豆、枸杞头、马兰头、香椿芽、韭菜、春笋以及蒲菜等各显其美，但最终还是荠菜以伊个香气、口感、药用价值，还有富含个蛋白质、钙、维生素、膳食纤维含量，理所当然拔得头筹。
挑荠菜个生活，城里个小朋友做得少。记得我小学四五年级辰光，接到老师做“忆苦饭”个任务，跟一个自称认得野菜个女同学跑到虹口公园以北个近郊坡地浪去挖野菜，阿拉挖了一眼绿颜色个野菜，其中就有开白颜色小花个荠菜。两家头吃辛吃苦忙仔一日天，满头大汗，急急忙忙赶转来烧野菜粥、做粗粮馒头，搞得学堂里个灶头间里向一片狼藉。镬子盖头开开来，全班同学苦了只面孔咽糠吞粥，因为要忆苦，呒没用油盐调味，介许多勿知名个野菜混勒一起，真个是邪气苦个，让刚刚10岁个小人随牢仔味蕾一记头穿越到旧社会，深深体会到吃勿饱饭个劳动人民苦日脚，反衬自家长勒“蜜罐”里个甜。
关于荠菜是勿是野生个，十几年前头我还是蛮计较个，就像美食大家汪曾祺所讲个，北京园子里种个荠菜“茎白叶大，颜色较野生个浅，没香气，勿好吃，比勿上南方个野生荠菜”。上海菜场里个荠菜野生搭棚植个混杂，我到摊位浪抓一把荠菜闻根部，马上就好辨别出是勿是野生个，野荠菜个香味浓烈，有股药味道，还有个特点是，野生个根部带点紫色，好像记录了历经冬雪个沧桑。而细细长长根部、白森森个荠菜，鼻头凑上去闻勿到特别个味道，搿就必然是棚里种出来个。到了现在，菜场里几乎已经呒没野生荠菜卖了，假使侬勿识相个问摊主，有野生个荠菜伐，伊大概会得翻只白眼，暗暗叫骂一句“有空个”。
其实坚持自然有机种植个农庄里，好吃个荠菜还是有个。现代农业老早就破解了无数蔬菜季节性种植个秘诀，荠菜已经一年四季侪好买到，相信今后种子优化，科学浇灌，美食爱好者心心念念个野荠菜味道会得重新回归，毕竟，伊是春来个第一鲜呀！
往期回顾：
图：网络 / 编辑：渺渺