野野胡、皮老虎，小东门、十六铺
沪语朗读：冯玉红
野野胡、皮老虎，小东门、十六铺
来源： 上海门牌研究所
作者：薛理勇
文字改写：丁迪蒙
“呀呀呼、皮老虎，小东门、十六铺。”搿是上海曾经流传个童谣。我小辰光也曾经勒马路浪一边跑，一边叫。
“呀呀呼”搭仔“皮老虎”是啥个物事呢？晓得个人可能勿多。伊搭仔“小东门”、还有“十六铺”又有点啥个关系呢？
“呀呀呼”应该是“野野胡”。据《周礼·方相氏》记载，方相氏是古代驱逐疫鬼个神巫，伊拉头浪戴雉羽（野鸡毛）、面孔浪蒙仔兽皮、手舞足蹈、边唱边跳，为百姓驱逐妖魔鬼怪，保护百姓身体健康，维持社会秩序稳定，功莫大焉。汉代以后，方相氏个活动演变成为地方个宗教活动搭仔地方戏，称之为“驱傩”或“傩戏”，宋朝以后称之为“打野胡”，成为流民、告花子个乞讨形式搭仔手段。
南宋建都临安（今杭州），勒记录南宋临安风情个《梦梁录》当中写：“腊日，街市即有丐者，三五人为一队，装神鬼、判官、钟馗、小妹等形，敲锣击鼓，沿门乞钱，呼为‘打野胡’。”后来，“打野胡”也被叫做“跳灶王”或“跳钟馗”。……打扮成灶公、灶婆、钟馗等“戏剧人物”就必须勒面孔浪“涂脂抹粉”，流民、告花子买勿起脸谱油彩，只好用锅灰勒面孔浪瞎搨八搨。江南一带拿戏剧脸谱搭仔小囡龌龊个面孔叫做“夜胡脸”，就是搿搭来个。
吴方言“野胡”指龌龊、推板、蹩脚个意思。阿拉小辰光白相个一种玻璃弹子，弹子里向嵌勒海像花瓣、也像切成瓣个西瓜，晶莹剔透，邪气好看，称之为“西瓜弹”。还有一种呒没乳白色、无透明个弹子，蹩脚、廉价、勿讨人欢喜个，阿拉叫做“野胡弹”。大家勿晓得“野胡”个出典，也勿晓得哪能写，就出现了交关写法。不过，只要读音相近，上海人是看得懂个。
“皮老虎”呢？搿是种简单、廉价个白相干。一边用黄泥制作个老虎，另外一边是用牛皮纸叠个“风箱”（与手风琴个风箱相似）。老虎身浪有簧片囥勒海，拉开、压缩“风箱”，簧片就会发响声，搿就是“皮老虎”。对小囡来讲，“皮老虎”蛮好白相个。但是伊质量老差，只白相没几记，“风箱”搭仔“老虎”就分离了，变成一圤（pok）“烂糊泥”电子一张废纸头。
以前上海有城墙个，开始辰光有小东门（宝带门）、大东门（朝宗门）、小南门（朝阳门）、大南门（跨龙门）、西门（仪凤门，即老西门）、北门（晏海门，即老北门）6座城门。后首来，又先后增开新北门（障川门）、小北门（拱辰门）、小西门（尚文门）和新东门（福佑门）。搿能介，上海就有了10座城门。小东门东临黄浦江，是进出上海个主要码头区，也是繁华个商业区。
“铺”可以理解为商铺。勒呒没邮政个年代，中央为了传达政令，搭地方保持联系，建立邮驿制度，用马匹传递邮件，勒城镇设立“驿站”。现在上海城里有条“馆驿街”，就是驿站留下来个地名。邮路沿线设立小个驿站，大点个称之为“铺”，小个称之为“递”。所以，“邮驿”也称之为“铺递”。分布勒全国各地个“铺递”部分作为地名使用，安徽黄山个“西递村”，就是以“铺递”得名的。
上海“铺”作为行政区划地名见于清朝中期以前，不过呒没规则。1855年（咸丰五年）小刀会起义拨镇压以后，上海个社会秩序邪气混乱。1860年，南京个太平天国为了摆脱清军对南京围困个压力，派忠王李秀成突围东进。李秀成突围后一路凯歌，连克镇江、常州、无锡、苏州、杭州、宁波等苏南浙北城邑，逼近上海。于是，上海成立了巡防保甲局，拿上海城厢地区设立“城厢局”，郊区划分为22个分局。又拿“城厢局”划分为9个区，再进一步划分为21个“铺”。原来个“十六铺”区域相当于小东门外到黄浦江，方浜（相当于后来的方浜东路）搭仔王家码头之间个区域，是各“铺”当中人口稠密、经济发达个地区，实际浪就是小东门外码头最集中个区域。
小东门搭仔十六铺码头是进出上海个主要通道，小商小贩勒搿搭集中，地痞流氓也勒搿搭混迹，可想而知社会秩序有多少混乱。交关小商贩勒十六铺兜售“皮老虎”，有小囡会缠牢姆妈买。人还呒没上船，“皮老虎”就扯坏脱了，因此是蹩脚货、野胡货个代名词，小东门、十六铺坏人又多，于是就有了“野野胡、皮老虎，小东门、十六铺”搿能个童谣民谚了。
往期回顾：
图片来自网络
“上海言话讲起来”感谢您的支持转发，欢迎关注本公众号