品味道 / 开普饭

沪语朗读：施扣柱

品味道

作者：杨夏溪

改编：郭莉

朗读：施扣柱

推荐：丁迪蒙

有啥吃啥，有得吃侪是好个。对吃点啥，我是从来也勿讲究个。

我勿是一只“吃货”，对食品没啥特别个要求，大概是我自家味蕾发育邪气迟钝，弄得来随便到啥地方，从来也呒没啥食品会得让我用馋吐水嗒嗒渧来形容，随便是啥吃个物事，我侪是匆匆忙忙一大口，物事就胡噜一记头落到我肚皮里了。乃末揩干嘴巴，肚皮饱饱，心满意足。人家问我啥滋味，我还要邪气淑女能介个回答伊拉：“嗯，吃饱了！”人家侪讲我搿副腔调实在是呒没情调，赛过一个人感冒生病，结果对所有个食品侪没兴趣，迭个简直就是失脱了一项探索美好世界个重要内容。

哦！介严重个啊！葛末好个呀，我就开始努力培养自家，一定要成为一个入流个“品味人”（品味人，此处味当以强读表现）。

要做“品味人”，也就是要会得“品味道”。开始辰光，我是信心满满个，大言勿惭搭朋友立下“吃遍全球”个宏图大志。为了激励自家，我学习朋友圈“打卡活动”，尝试勒跟牢网红脚步一吃到底！

排队两个钟头、等位三个钟头、搿歇辰光还呒没营业……样样啥啥侪经历了。勒勒人潮涌动当中，我觉着吃得来胃痛，“腰子”也痛。

看看伊眼为了美食，勒排队面前毫勿退缩，开了几十公里车子，就是勒恶劣个天气下头也要拼仔命一搏——只为了尝迭能一口。搿种寻味之路，真是让我想想也吓了。

辰光一长，我个“打卡”就变成了外卖分享圈，“侬迭个叫啥品味道啊？赛过勒测算啥人家骑手送货速度快慢嘛！古人是葡萄美酒夜光杯，我看侬是手机外卖塑料杯”。我听了心里邪气勿平，啥人讲过吃外卖就勿好吃遍全球啊！非要到店里向去吃个？！但是，我个低起步个外卖生活，还是拨人家触了一记霉头。

办公台子浪，摆勒一份温度齐巧好个盖浇饭。搿是刚刚一个满头大汗个骑手送过来个，勒勒送到个辰光，伊只讲了一句：“拨只好评哦！”然后，就挥一挥手跨上电瓶车消失了，我手里个饭盒好像勒海搭我对看，空气里向侪是热乎乎个烤肉味道。

搿恁一来，我突然怀念起从前了。搿个辰光，每日天大家上班一碰头就开始讨论“今朝吃点啥”，然后忙碌一上半日，一个个侪吃力得要命，老早侪呒没了“觅食”力气，大家一道讲：“走，食堂！”迭个辰光，对阿拉大家来讲，吃啥勿重要，能跟一道做生活个同事吃一口，就邪气满足了。

前一抢，有只叫“中餐厅”个综艺节目火起来了，每趟刷微博，总归看到伊名字挂勒热搜榜，当然我并勿是搭伊打榜，因为就勒勒我身边，也有搿恁一个“中餐厅”——沪东新村派出所食堂，伊承载了单位里忒多民警个“胃个希望”！

阿拉派出所是勒老城区个，房屋建筑侪是七〇后，就算人员再扩充，面积也勿会多出来个。但是总归勿好让民警呒没地方吃饭呀？所领导想尽办法，好勿容易辟出了一只小房间，安排成了“食堂”，再拿走廊里头个乒乓桌搬进来——搿恁，吃饭辰光是饭桌，平常还好打乒乓，一物多用。一楼走廊南北通透，通风效果邪气好个。

我第一趟到日本去旅游，看见一间面馆，想进去吃一顿，啥人晓得里向大家侪是立勒海吃个。我觉着老奇怪个，朋友搭我讲，日本地方小，大家又要节约辰光，所以交关面馆就是立海吃个。嚯，现在阿拉搿间食堂，搭日本个小饭店倒是有异曲同工之妙！

经历了一年多乒乓餐桌文化后，阿拉造起了真正个食堂。搿记，有了四五张台子了，阿拉终于从过道吃饭“进化”到屋檐里向用餐了。大家侪邪气开心，尽管地方勿大，一次容纳就餐人数也老少，不过至少大家吃饭辰光好嘎脱两句了，虽然只有寥寥几句，葛末要多交关人气呢！

伴牢食堂个建起，我也从原来个巡逻岗位调换成政工内勤，还顺带做了食堂“总管”。看到食堂里来来往往人群，我为伊个振兴感到欣喜个同时，也渐渐多了眼隐隐个担忧。

就勒勒迭个两年，食堂搿规模更加勿好满足需求了，新民警、辅警进来交关，充实了派出所队伍，也要求食堂再一次扩充。迭个一趟只好牺牲一眼仓库、停车场面积了。不过搿趟扩充，更加正规化、专业化了：侬看，阿拉引进了专业管理团队，食堂装饰更加整洁，重要个是，就餐容纳量提高了！每到吃饭个点浪，食堂门口也要排长队，看上去倒也有一种网红店打卡个腔调了！

一晃七年。七年里向，食堂经历了三次改造，真真应了搿句“一年一个样，三年大变样”！社会勒勒变革，食堂勒勒进步，伊勒默默无言个改变中，见证了派出所里发生个所有故事，也慰藉了无数需要温暖个胃……伊个功能从来勿曾改变，不悲不喜，始终勒勒此地，等待每一个需要伊个人。

突然看到最近手机里个外卖订单跟打卡签到，我就拿近期“成果”告诉了朋友：经过一段辰光个努力，我对食品个迷恋还是力不从心。算了，没办法寻到支撑点坚持下去了。强扭个瓜勿甜！乃末，我决定厾开最早个信誓旦旦，直接搭朋友讲：我还是做回真实个我自家，品味道迭桩事体真个勿是我个命。

其实品味道搿种事体，就像生活一样，人各有志，勿好强求，人各有爱，勿能强为。就像《至味在人间》里向所写个，每个人侪有属于自家个珍珠翡翠白玉汤。南来北往，最真最纯个味道，只勒勒人与人之间。

“今朝中浪吃啥个呢？”

“食堂里向去看看看呀！”