最是人间烟火味
沪语朗读：徐慧丽
最是人间烟火味
作者：孙文君
改编：郭莉
文字修正：丁迪蒙
朗读：徐慧丽
电视节目《深夜食堂》里搿能讲：食物是能量，是疗效，是珍贵。人间个味道叫做“烟火气”，辰光就是最贵个成本，爱是一切故事里向最美个部分。
老底子我认为，一道美食端出来个辰光，散发出来个腾腾热气，里向个酸、甜、苦、辣、咸个味道，一记头侪涌到鼻头管里来，搿个就是烟火个味道了。
去年夏天，我作出选择，搭故乡一记头就隔开了八百多公里路。我慢慢叫适应了上海搿座繁华个大城市，勒勒工作之余，倒也开始会得自乐其乐了。但是，勿晓得哪能，总归觉着少脱眼啥物事。
一日天，突然之间落起阵头雨。黑颜色个云白颜色个雨，一闪一闪个霓虹灯也拨罩勒雨雾里向，日里向邪气刺眼睛个玻璃幕墙变得黯淡无光。
因为迭场雨，邪气难得个，我放慢了回转去个脚步，慢慢叫个走勒路浪向，看见了一部一部个车子个车轮勒马路浪向划出了大大小小个浪花。搿个辰光，正好是吃夜饭辰光，浦东个东昌路浪有交关居民楼，勒一朵一朵个伞花下头，是邪气温暖个场景：勿少人扶牢老人，搀好小囡。手里向拎勒海个青菜，因为有得雨水个清洗，勒灰蒙蒙个天空下头，颜色是碧绿生青个。雨伞下头，飘出来了几句言话，有人勒轻轻叫个讲：“宝宝今朝要吃啥物事啊？妈妈搭侬烧……。”路旁边个小吃店、饭店歇勿歇个传出炒菜个声音，居民楼里个窗口，一只一只灯勒勒亮起来，显得邪气温暖，喧闹、嘈杂个人声当中，夹杂了饭菜个香气，让搿场雨也好像带了眼温度。
我勒纠结，应该是等雨停下来以后去叫外卖呢，还是到餐厅去吃夜饭呢？我突然之间意识到，现在生活缺个是啥物事了——是烟火味道，对了，我缺少个就是厨房间里向个烟火个味道呀！
离开了屋里向以后，我就再也呒没碰过烧饭家生，再也呒没跟牢妈妈打下手个机会。宿舍里呒没厨房，吃食堂、叫外卖就是我个生活常态。是个呀，只要动动手节头，下好单子，就会得有各式各样个饭菜送到面前；只要走进餐厅，就勿必沾油烟，更加覅汏饭碗了。……我已经习惯搿种方便快捷了。
但是迭歇，我突然怀念起从前个温情辰光，怀念起葱姜下油镬个辰光，怀念起八宝粥个粥泡，怀念起自家搭爸爸妈妈勒一道讲讲家长里短……搿种属于厨房，属于家庭个烟火味道。一粥一饭，一烟一火，在锅碗瓢盆当中调制出生活个色、香、味，灶台浪向点燃个是绵延勿断个人间烟火。
但是，烟火个味道，又何尝只是食物个滋味呢？搿是因为温情个存在，是因为烹饪个用心，再能够拨千篇一律个食材，有了爱个味道。是因为爱，再可以拿每一个邪气平凡个日脚过得满心个欢喜，就像碗小米粥，简单个原料熬到只剩下来甘甜个味道。而迭个温暖个来源，又何止是屋里向人呢，即使是擦肩而过个陌生人，甚至于是样物事，只要用心去看，去感受，烟火味道也是一定有个。脚步放慢一眼，拿视线从手机浪向移开，侬就好晓得，生活勿止是搭冰冷个机器打交道。
因为工作个原因，我之前常庄立勒路口，红绿灯搭仔斑马线占据了我绝大部分个视线。来来往往、川流不息个人群搭仔车子，是伊个辰光看得最多个风景了。
辰光长了就会得发现，交关人个生活是邪气有规律个，公司个白领几点钟到写字楼去，遛狗个、买菜个阿婆啥辰光经过迭个路口。勒我个用心之后，伊拉就再也勿是分勿清面孔个甲乙丙丁了。搭伊拉有了相识、偶遇以后，辣伊拉停下来等绿灯放行个辰光，会得对我笑笑，聊两句天气，讲两句言话。我勒人流当中看到了小囡个童真，大人个忙碌，老人个悠闲，勒下班路浪向，我也会得停下来，看看葱油饼是哪能出锅个，看看老伯伯个篮头里向翠生生个莲蓬，红彤彤个桃子。
勿要行色匆匆，拿纷繁个思绪忘记脱伐，仔仔细细去体会上海个市井生活气息，就会觉着，无论侬勒啥个地方，侪有得交交关关个幸福。烟火味道，是人生个百态，也是人生个百味。伊萦绕勒繁华个城市，伊活跃勒诗人个笔下头，让大家口口相传。伊是张爱玲最最钟爱个市井生活，是老上海伴伊入眠个电车叮铃。伊可以勒别个地方，也可以勒勒此地块。伊是侬勒屋里向个辰光亲朋好友一声声个叮嘱，伊是离开家乡以后，所看见个每个温暖个笑靥，伊是让侬有“此心安处是吾乡”个宁静搭仔满足。
拿喧嚣融到光阴里向，用心去品尝生活个味道，有眼苦，但也有更多个甜；有得烟火味道了，就会得有邪气多个幸福感。
本公众号最近发布的原创链接：
图片来自渺渺