归去来（十一）
作者：欧阳德彬
来源：渡十娘
沪语改写：边秦翌
沪语讲述：曹凯
林莉办好离职手续，前脚刚刚离开大厦，魏封就回来办入职手续了，坐勒林莉曾经坐个位置。搭伊一道回来个，还有两个人，侪是码字个能手，其中一个矮子据讲写得一手好诗。
部门一记头壮大了。老大哥个待遇随牢仔下属个增多也高了，每天春风满面，讲自家现在坐拥鸟城四大写手，终于可以垂袖而治了。
魏封来得毫无预兆，伊走进办公室伊天仔张潮觉得伊只是来白相相个，等到看到魏封填写入职登记表个辰光才晓得。
单位最高长官来了，召集书部开会。长官天天参加各种重大会议，召集单只部门开会真是千年难板个事体，足以显示出对书部个重视。
搿歇个大环境大家侪晓得，就算侬心系天下苍生，也要谨言慎行，莫谈国事。安全起见，还是好好叫看书伐。看书练本事，再是最重要个事体，当然勿能乱写。
会议个气氛有眼奇怪。轮到老大哥发言个辰光，伊劈头就对魏封讲，侬比较有个性，以后要搭同事好好叫相处。
魏封尴尬个笑笑，点点头，显出一种磨光了棱角个乖顺。
小魏，搿趟侬回来，以后还跑伐？坐勒长条会议桌对过个长官笑眯眯个问魏封。伊是一位老文艺青年，满头烟灰白个短发，欢喜开玩笑，呒没官架子，大家侪邪气欢喜伊。
勿跑了。魏封更加尴尬了，低下头去。魏封从辞职到回转来大约摸有得一年个辰光，搿段辰光伊调了好几趟工作，对比之下，觉着还是勒勒大厦里上班比较好。当张潮问伊迭个一年个感受，魏封只讲了一句“外头个世界邪气精彩，外头个世界也相当无奈”。当然，也有人离开大厦之后寻到了体制外个新工作，还有自主创业个，过得邪气潇洒，但是毕竟是少数。离开又回转来，心就安了，想必伊会得一直蹲勒大厦里直到大厦倾覆。离开又归来，勿是每个人侪白相得起个游戏，假使讲勿是魏封个爷搭长官是要好个大学同学，离开之后就呒没回头路了。
午餐之后，张潮像平常一样沿牢仔文化路散步，顺便欣赏美景。仲春时节，木棉树脱光了黄叶，木棉花开得正好，硕大花朵点缀枝头。春风过处，整朵花落到青砖人行道浪向，勿当心踏到，便是一地胭脂。当然咾，路浪向最能吸引张潮个美景还是女人，搿眼穿仔蓝灰校服个职校女生。搭伊拉擦肩而过个辰光，张潮总是熬不牢深深呼吸一口气，一记头就觉着神清气爽。
迭个辰光，伊注意到前头飘着一位瘦高个女人。伊上身着仔一件垂到腰际个针织衫，下身是水洗牛仔裤。针织衫忒短，伊个整个臀部就露勒外头了。迭个女人笃悠悠个走路，还稍微有眼眼跳勒海走，每走一步，臀部就稍微起伏一记，邪气有味道。张潮看了一歇，为了看清爽女人个面孔，就快步走到伊前头。竟然是林莉！
又捉牢一只大老虫，真个肥！背后头传得来老大哥个声音。张潮一回头，只看到老大哥捏牢仔粘虫板。高头有一只脊背漆黑个老虫正拼命甩跳绳一样个大尾巴。
朗读者
往期回顾：
图：网络 / 编辑：渺渺