逢年枯肠勿滞油
逢年枯肠勿滞油
作者：吴翼民
改写：周红缨
讲述：曹凯
现在啊物质生活是越来越丰富，每日天到菜场去买菜，看到肉摊头浪向个肉堆得老高老满个，就常庄会得想到五十年前“三年自然灾害”个光景。假使要问我，埃个辰光啥个食品最勾引人，我会得毫勿犹豫个回答是猪肉，以猪肉来见证某一个时代个生活状况也许最为根本。
勒埃个年代，啥个侪要凭票供应。勒铺天盖地个票证世界里，最珍贵个肯定是肉票。六十年代初，我正好是十四五岁，勒发育个辰光，粮食粮票固然性命交关，但更加向往个是肉、肉票。作孽哦，每人每个号头只发一张肉票，好买一两猪肉。大家侪讲，一两肉连嵌牙缝也勿够。因此就紧俏，就越加想要。记得学堂是养了猪猡个，阿拉搿眼学生是只闻猪污臭，勿闻猪肉香，劳动课就是打猪草、扫猪圈，勿夸张个讲，真想用刀割只猪耳朵回去炒了吃。覅讲学生子了，就是老师，也常庄会看牢仔臭烘烘个活猪猡作香喷喷个精神会餐，想像伊阿里一个部位红烧、阿里一个部位白笃、阿里一个部位焖四喜肉……一边讲，一边咽起了馋唾水。有一趟学堂一记头杀了四头猪猡，分拨全校师生，据讲老师们是抽签分肉，因为挑肥拣瘦（勿是，只挑肥勿拣瘦！）而争得来勿可开交。至于学生子，只是象征性个意思一下，算是对伊拉养猪猡个犒劳。埃次是以小组为单位，每个小组分一两猪肉。呒没办法再分割下去了，就聚餐。齐巧我生毛病发寒热，只好放弃了聚餐，因此遗憾了老长一段日脚。
于是关于吃肉个希望，就只能够指望计划供应个一张肉票了。
一家人家侪看重搿一月一人一张个肉票。但是母亲真个有点勿近人情，偏偏要拿迭个邪气作孽个一眼眼享受也取消脱了，－－伊几乎侪拿肉票集中起来买了猪油，细水长流兑了吃，来弥补素油个勿足。埃个辰光每人计划油票一张，供应一两菜油，菜里就几乎看勿到油花。应该讲，母亲用肉票买猪油是把家个行为，但阿拉兄弟姐妹侪表示抗议，猪油是香个，但搀勒汤里菜里看勿到影子，勿像猪肉，就算是肉丝肉丁，也是实实在在个具有质感，最诱人个是肥肉，嚼勒海，满嘴巴冒油并且有香味，真是人生最美个体验啊！仔细想想也是个，正是发育长身体个小囡，还能有啥个其他企求呢？
要想有真正意义浪向个吃肉享受，只有寄希望于过年了。
人民政府毕竟是可爱个，埃个年代春节每人能从政府伊面领到交关交关票证，就像阿拉老家苏州发个专门买茶食糖果个“七票”，可以买杏仁酥、麻酥糖、蛋黄花生、香瓜子、蜜糕、长生果、芝麻糖七种食品。我之所以不厌其烦一样一样讲过来，是为了让同乡年纪大个人证明一下。当然，一张肉票个供应量比平常翻了四五倍，－－有半斤介许多。迭个辰光母亲再也勿好“挪用”了。事实浪向母亲也呒没必要“挪用”，伊哪能勿想让小囡尽情享受一下呢？母亲采取了“伤其十指，勿如断其一指”个策略，准备让阿拉吃年夜饭个辰光奢侈一下。母亲真是善解人意，勿切肉丝搭肉丁，就烧伊个拿手菜“四喜肉”，亦就是越人所谓个“东坡肉”，阿拉吴人称伊是“四喜肉”，大约摸有三寸见方，一寸半见厚，酥烂而有形，色香味俱佳。为了让阿拉弟兄姐妹勿发生矛盾，来个“一人一碗，打翻勿管”。就冲勒“四喜肉”，搿顿年夜饭个魅力应该是可想而知个了！
一直到现在我还记得母亲抖抖豁豁个拿一迭肉票拨了肉摊头屠夫个亢奋神态，我也分明记得砂锅里向飘出来个醉人个肉香，我尤其是忘记勿脱兄弟姐妹盯牢仔肉碗个馋痨个眼神。当时个情景是大家侪硬劲屏牢勿吃，－－勿是勿馋，而是侪想让人家先吃，自家可以慢慢叫享受。终于捱到肉一点点冷脱了，勒母亲再三个催促下头，阿拉开始了盼望已久个享受。埃种样子可以用“风卷残云”来形容，不亦乐乎！不亦快哉！
但是，乐极生悲，啥人晓得枯肠勿滞油，阿拉一前一后奔到天井里向吐了起来。要算二阿哥有本事，为了勿让好勿容易吃到个肉吐脱，一直屏勒海，屏得来眼泪水答答滴，但是呒没用场，所谓“积之既久，其发必速”，－－伊比阿拉吐得更加凶、更加彻底，一直吐到见青水。作孽呀！
第二天大清老早，也就是大年初一，我搭二阿哥落起来个第一桩事体就是到天井里看昨日夜里吐出来的物事，心里向还有点恋恋勿舍，幽幽个难过唻。
往期回顾：
图：网络 / 编辑：渺渺