慢爷杜
沪语朗读：王维杰
朗读者
慢爷杜
来源：夜光杯
原创： 安谅
朗读：王维杰
推荐：丁迪蒙
我是个性子偏急个人，倒是交了个性子慢得吓煞人，又搭我形影勿离个朋友，人家侪叫伊“慢爷杜”。
慢爷杜人勿长，大概一米六四，也蛮瘦小，搭我立勒一道，一长一矮，一大一小，反差明显。不过慢爷杜身材还蛮匀称个，人也有几分精明相，虽然跟俄罗斯个普京勿好比，但是搿副样子，也算是老有腔调了。再加伊五官也长得蛮精致蛮端正，六十多岁了，别人倒也猜不出伊个年龄。
慢爷杜个慢，实在是叫人吃勿消。讲伊慢，当然勿是讲伊迟钝，伊个思维还是敏捷个，思路也蛮清晰，做事体也邪气精明，就是伊个动作，伊个延时功能，常庄让人啼笑皆非。譬如讲，大家坐勒一道嘎山湖，讲到桩啥个事体，前头个话题已经拨后头个覆盖了，勒陌生头，慢爷杜抬起头来插一句，讲个还是前头个话题。频道老早调脱了，伊还留勒搿里向，大家当然侪觉着有眼好笑。伊讲言话个语速也是邪气个慢来！
慢爷杜开车子个慢，更加是创纪录个。搿种慢得要死个车速，有辰光真叫人想骂伊！约定好，一个钟头勒啥地方碰头，同样个起点，路程，同样启动个辰光，车技再推板个也到了。开了十多年小车个慢爷杜，竟然用了人家一倍以上个辰光，姗姗来迟。
乘慢爷杜个车，我最容易睏着，车子开得介实在是忒慢了，慢得侬几乎感觉勿到车子勒移动。乘过伊车子个朋友侪讲，伊是等红灯司机。明明还有二三十米距离，绿灯还亮勒海，伊竟然会放慢车速，慢慢叫氽过去，像煞勒等红灯亮起来。果然，等伊氽到路口么，红灯当道了！车子只好老老实实停勒嗨，搿几分钟又拨伊耽搁脱了。也讲过伊，伊还勿买账唻：急啥呀，勿是侪一样个嘛！
慢爷杜随便做啥事体侪是搿能副吞头势。打电话，发微信，侪要是过一两个钟头再回个，伊还讲，自家个手机就摆勒边头。
慢爷杜，迭个称呼是北京朋友送个。有次周末，私人饭局，讲好六点半到，慢爷杜到个辰光七点半也已经过脱了。北京朋友就讲了几句开玩笑个言话，乃末，迭只绰号大家就叫开来了。
覅看慢爷杜一日到夜慢条斯理，伊做起事体来还是一板一眼、井井有条个。我写过两部戏，邀请慢爷杜去做制作人。搿位导演也是老有个性个，想法老多，我再三关照，要尊重导演，但也要坚持我个创作思路搭演出风格相结合。我还是担心慢爷杜根本没办法跟搿位快节奏直性子个女导演沟通，想勿到伊拉虽然有过一两次各执己见、勿算愉快个场面，但是结果伊拿我对剧本个基本原则侪坚持下来了。顶有意思个是，伊对剧本一眼也呒没兴趣，竟然老有耐心个听迭位导演朗读伊修改个剧本。伊听了觉着八九勿离十了，就向我作了报告。果然，搿位导演勒慢爷杜个执意督促下，保留了迭个本子原有个风格。当然导演原先个优势也勒其中表现得淋漓尽致。合作邪气成功。
迭个周末，讲好大家先去看只展览，同时，我还要去看个住医院个老领导。慢爷杜自告奋勇陪我，兼做我个司机。半天过去了，一半个任务也没完成，就是因为啊，慢爷杜勒计划好个辰光里向又迟到了，车子又开得实在太慢。亏得我及时做了调整，还是去探望了病人。本来讲好几个朋友再聚一聚个，一看辰光已经勿早。我真是恨煞：侬看侬呀，慢爷杜，侬就是搿种恁个效率速度！今朝实际浪只做了一桩事体，真是浪费辰光呀！慢爷杜还老有道理：做一桩事体好呀，一天只做一桩事体，再会拿搿桩事体做好。我看牢伊只好摇头，跟搿种人侬好计较啥？我本来还想利用难得个周末，抽眼辰光练练书法唻，人家侪讲，书法能够拿性情练得淡定眼，现在我是勿需要了，跟慢爷杜勒一道，就是磨炼我个性情个好机会啊！
精彩回顾：
图片来自网络