想起当年“战高温”
沪语朗读：冯济民
朗读者
想起当年“战高温”
作者：冯济民
朗读：冯济民
推荐：丁迪蒙
每年高温季节，气温高到39度、40度，热得实在吃勿消。不过，坐勒屋里吹吹电风扇、孵孵空调、吃吃西瓜搭冷饮，还是蛮适宜个。实在有事体外出，坐公共汽车或地铁侪有空调，也勿觉着哪能热。想想以前自家年轻个辰光，勒农场劳动，勒码头浪当装卸工，大热天“战高温”，搿真是苦。
先讲讲勒农场。农场个艰苦现在想想实在是艰苦，夏天更加苦，真是吃勿好、睏勿好。开水每人每天只有一瓶。天热勿够吃，嘴巴干，就只好吃河浜里个水。勒大田里劳动就吃水沟里个水。啥个卫生勿卫生侪顾勿上了。天热得吃勿消，中浪向我常常一家头到附近个合隆江里去游泳。现在想想老吓人个，自家胆子也忒大了，假使勿当心出了事故，人也寻勿着。夜里汏浴呒没浴室（后来有了），只好到河浜里去汏。结果常常拨蚊子咬得逃回宿舍。夜里睏勒帐子里闷得勿得了，热得睏勿着。到大田里劳动也呒没啥个防暑降温措施，顶多只有一顶草帽、一块毛巾而已。水稻田里个水拨太阳晒得发烫，赤脚下去，只觉着烫脚。勒火辣辣个太阳底下劳动，汗水大大地，揩也来勿及揩。
再讲讲勒码头当装卸工辰光个“战高温”。虽然码头浪劳动是特重体力劳动，生活重得勿得了，但毕竟算是工矿了，条件比农场要好多了。无论勒船舱里还是勒码头浪，侪有鼓风机打风，还有吃冷饮水搭营养汤。露天作业还有遮阳棚。高温热中心辰光停止作业，休息。劳动条件比起勒农场里勿晓得要好多少了。但毕竟是特重体力劳动，勒高温季节还是老辛苦个。记得有一次，我勒船舱里卸日本进口化肥。二十公斤一包，一次要整整齐齐个勒网络里叠好四十包吊出舱口。勒火辣辣个太阳底下搬雪雪白个化肥包子，眼晴也花脱了。结果我热得中暑昏了过去。工友拿我送到卫生室，醒过来休息一歇就又回到船舱里去做生活了。现在想想搿辰光真是苦。
正因为我以前吃过介许多苦，所以后来碰到个苦侪勿算啥了。想想后来几十年个夏天里，坐勒办公室里吹吹电风扇、孵孵空调，动动笔杆子、打打电脑，勿要忒适宜哦。姆妈总讲我有福气。其实我心里晓得，搿侪是读书改变了自家个命运啊！现在老了，想想自介年轻辰光吃过介许多苦，走过来真是勿容易，也更加珍惜现在个幸福生活了。
精彩回顾：
图片来自网络