【宁海话】李涵夫敲屙缸

李涵夫敲屙缸

敬请聆听小包车讲述故事

李涵夫

今日讲个李涵夫勒解放前宁海县长。听老班辈讲，民国几任县长里面算其会点来，老傍做事干杀手的猛，一点也弗讲情面咯。对城里个尿屙管得严的猛。排别贴告示，凡是攋尿攋屙乱攋抲牢都要罚款，街边个肥桶、朝天屙缸限定几日内移敖，移勿敖咯，也呒较出天天，勒屙缸外面打支矮墙把其遮牢。还长日派烂眼来检查，有让且，其自家着件衣裳爿偷盘盘去张，矃着路边还朆移个朝天屙缸，掇起大石头“嘭”一记拨屙缸䂻碎。“县长敲屙缸”格事干，一倏乱便传遍整个宁海县界，连内家、小人都晓得来。介且，城里人大多以种田为主，民间流传“啜屙着屙，呒屙弗大”个谚语，种稻全靠屙做劲道，攋尿攋屙都弗舍得攋勒人家屋里，竹口、冠庄箇带农民还长日到城里来收料。屙缸千万难搭县长敲敖，大家人碌碌疯，卖个卖移个移，打矮墙个打矮墙，弗出两个月，城里大街头小墙弄个肥桶、朝天屙缸一只也相弗出，地也扫敖煞清爽来。

停勒城里个农民阿叔牢骚满大肚，背后都来外埋怨：“好管弗管，太婆管卵。”尿屙自家屋里用用还欠用，好朆尔县长来多心事咯，堂堂县官老爷竟然自家管攋尿攋屙，大家人都忖弗通也装弗懂。弗瞒尔讲，格事干真个还有挨瓮来迭。

视察线路：小北门—中街—桃源桥—宁海中学

民国24年10月，蒋介石带内客宋美龄同班搭宁海来视察。其偕搭小北门落车，县长李涵夫一班人带路从小北门望南趤搭中大街，经桃源桥再到宁海中学。嚡晓得小北门口都勒滥泥路，七凼八靥，落索叠倒成山，两横立排个朝天屙缸，尿屙滭出来排大是，臭气碰大天，宋美龄眉头一记蹙，用撮头把鼻头捏牢，调头转搭溪口去。矃着委员长夫人弗肯进城，李涵夫牌子倒光，颊面涨敖菲红，真个倒霉死来。蒋介石行伍出身，腌糟点也呒较，宁海中学相好归家个且，特特意吩咐李涵夫要把朝天屙缸装装清爽，下回再来相过。李涵夫塌了台，独怕委员长真个还要来，就自家上街把还呒不整捉好个朝天屙缸敲掉。

词汇注释：

老班辈：老前辈

其：他

会：能干

老傍：这个家伙

做事干：做事情

杀手：狠毒的手段

情面：面子

排别：到处

攋尿：撒尿

攋屙：解大便

抲牢：抓住

肥桶：粪桶

朝天屙缸：露天粪坑

呒较：没事

出天天：露天

长日：经常

烂眼：民国警察贬称

有让且：有时候

自家：自己

着：穿

衣裳爿：旧衣服

偷盘盘：偷偷地

张：看

矃：注视

朆：未曾

掇：端

䂻：砸，敲

一倏乱：一眨眼

内家：妇女

小人：小孩

介且：那时

啜屙着屙，呒屙弗大：靠肥料养家

劲道：力气

屋里：家里，故里

收料：买大粪

大家人：大伙儿

碌碌疯：忙个不停

停：住

好管弗管，太婆管卵：多管闲事

心事：担忧

挨瓮：因果，根源

其偕：他们

趤：逛

嚡晓得：哪里知道

滥泥路：泥土路

七凼八靥：七高八低

落索：垃圾

叠倒成山：堆积如山

两横：两边

立排：整排

滭出来：溢出来

排大：到处

臭气碰大天：臭气熏天

撮头：指头

颊面：脸，双颊

呒采：无处

匽：躲藏

腌糟：肮脏

归家：回家

特特意：故意

 第46期

小包车邀请您

一起共讲宁海话

文字：小包车

朗读：陈一兵

编辑：小包车

图片：网络

审核：浩海紫烟

宁海聚焦文化工作室出品