剖视上海人个尴尬（二）
沪语朗读： 沉默是金
朗读者
作者：余秋雨
沪语改写：丁迪蒙
只要稍稍具有现代世界地理眼光个人，侪会得看中上海。
北京是个典型个中国式京城：背靠长城，面南而坐，端肃安稳；上海正好相反，伊侧面向东，面对牢一个浩翰个太平洋，而背后则是一条横贯九域个万里长江。
对于一个自足个中国而言，上海偏踞一隅，勿足为道；但对于开放个当代世界而言，伊却是俯瞰广远、吞吐万汇、处势勿凡。
假使太平洋对中国呒没多少大个意义，葛末上海对中国也没啥大个意义。一个关煞脱了个门框，能做多少文章？有了伊，反而会得漏进来户外个劲风，传进门口个喧嚣，扰乱了房主个宁静。
我伲有两湖搭仔四川盆地个天然粮食，上海又递缴勿了多少稻米；我伲有数勿清个淡水河网，上海有再多个海水也勿能饮用；我伲有三山五岳安驻自家个宗教搭美景，上海连个像样个山峰也寻勿着；我伲有纵横九州个宽阔关道，绕到上海还要兜点远路；我伲有交关名垂千古个文物之邦，上海连只县个资格也年龄忒轻了……
迭个依附勒黄河成长起来个民族，要一个躲勒海边个上海做啥？
上海从根子浪搭凛然个中华文明勿大协调，勿大和顺。
直到十九世纪英国东印度公司个职员黎逊向政府投送了一份报告书，申述上海对新世界版图个重要性，上海便成为南京条约中开放通商个五口之一。
一八四二年，英国军舰打开了上海。从此，事体就发生了急剧个变化。西方文明挟带勒恶浊一道席卷进来，破败个中国也越来越拿更加多个赌注投入其间，结果，搿搭就以极快个速度出现了前所未有个闹腾。
徐光启个后代既有心理准备，又仍旧是未免吃惊个一记头陷进了搿种闹腾里向。
一方面，殖民者、冒险家、暴发户、流氓、地痞、妓女、帮会一道涌现；另一方面，大学、医院、邮局、银行、电车、学者、诗人、科学家也汇集其中。
黄浦江个汽笛声声，霓虹灯夜夜闪烁，西装革履搭长袍马褂摩肩接踵，四方土语搭欧美语言交相斑驳，侬来我往，此胜彼败，以最迅捷个频率日夜更替。搿搭是一个新兴个怪异社会，但严格讲来，搿搭更是一个进出要道，多种激流勒搿搭撞合、喧哗、卷成巨澜。
面对个搿能介一个地方，阿里一个历史学家侪会得头脑发胀，索解勿出一个究竟。
侬可以讲伊是近代中华民族耻辱个源薮，但是，一个已经走到了近代个民族假使始终抵拒现代个冲撞，就勿耻辱了？侬又可以讲伊是对抗农业文明而崛起个城市文明，但是，又有阿里一种城市文明会得像上海一样，始终深受弘广无比个农村力量个觊觎、分解、包围搭仔笼罩？
总之，伊是一个巨大个悖论，当侬看牢伊个恶浊，伊会腾起耀眼个光亮，当侬膜拜伊个伟力，伊会转过身去让侬看一看疮痍斑斑个后墙。
但是，就勒搿种悖论结构当中，一种搭当时整个中国格格勿入个生态环境搭仔心理习惯慢慢叫形成了。
本世界初，交关新型个革命者、思想家受到封建王朝个追缉，有租界个上海成了伊拉个庇护地。特别重要个是，对于搿种追缉搭仔庇护，封建传统搭西方文明勒上海发生了针锋相对个冲突，上海人日日看报，细细辩析，开始懂得了按照正常个国际眼光来看，中国历代遵行个交关法律原则是多少个颠倒是非，勿讲道理。就从搿一个个轰传于大街小巷之间个实际案例，上海人已经隐隐约约个领悟到了民主、人道、自由、法制、政治犯、量刑等等概念个正常含义，对于经勿起对比个封建传统产生了由衷个蔑视。搿种蔑视勿是理念思辩个成果，而是从实际体察当中作出个常识性选择，因此，也就勒搿座城市当中具有极大个世俗性搭普及性。
就勒搿一个个案例发生个同时，更具有象征意义个是，上海个士绅、官员纷纷主张拆脱上海旧城城墙，因为伊已经明显个阻碍了车马行旅、金融商情。伊拉当时就勒呈文当中反覆说明，拆脱城墙，是“国民开化之气”个实验。当然有人反对，但几经争论，上海人终于拿城墙拆脱了，成为了封建传统心理框范特别少个一群。
后来，一场来自农村个社会革命改变了上海个历史，上海变得安静得多了。走脱了一批上海人，又留下来了大多数上海人。伊拉拨要求搭内陆取同一步伐，并要对内陆负起经济责任。
上海转过面孔，平一平心旌，开始做起温顺个大儿子。就像巴金《家》里向个觉新，肩胛浪担子勿轻，再也勿能像过去伊能介闹腾。
阵阵海风勒背后头吹拂，勿管伊，车间个机器勒隆隆作响，上班个电车拥挤勿堪，大家侪吃力煞了，夜上海变得寂静冷清。
为了更加彻底割断伊段诱惑人个繁华，大批内陆农村个干部调进上海；为了防范据说会来自太平洋个战争，大批上海工厂迁向内陆山区。越是冷僻险峻个山区越能寻到上海个工厂，淳朴个山民指牢工人个后背笑一声：“嘿，上海人！”
搿些年，上海人又开始有点勿安稳。广州人、深圳人、温州人起来了，腰囊鼓鼓个走进了上海。上海人呆瞪瞪眼看牢伊拉，呒没紧紧跟牢。有点自惭形秽，又呒没完全失却自尊，心里想：要是我伲上海人真正立起来，将是完全另外一番情景。也许是一种自慰伐，勿妨姑妄听之。
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号