亭子间阿姨（上）
沪语朗读：丁曙立
作者：汤蔚
沪语改写：荣梅
文字修正：丁迪蒙
亭子间阿姨是阿拉弄堂里公认个美人，鹅蛋面孔，丹凤眼，素衣淡服也遮勿牢伊个窈窕玲珑。阿拉弄堂是勒淮海路转弯角子个小马路里向个。弄堂外头，闹市个喧嚣逐渐远了，弄堂里向，邻里之间互动倒是紧密个，甚至于比亲眷还要更加亲切。亭子间阿姨一家头住，独来独往，有眼神秘个。
弄堂是由好几幢连排式个楼房组成个，石雕门楣，雪墙黛瓦，乌漆个大门。亭子间阿姨搬进来个辰光，白墙浪刷仔红漆标语，大门浪黄铜个吊环已经拨拆脱了。老人侪勒叹息，讲：“拆家当，毁老货，侪是罪过呀。”
阿拉大楼里向住了八户人家，大多数家庭是三代同堂，爷娘上班，小囡读书，阿爷阿娘料理家务，每家人家侪蛮闹猛个。亭子间阿姨个房门常庄是关牢个，一点声音也呒没，只看见伊袅袅婷婷个进出弄堂，像煞是流风回雪。
亭子间阿姨住勒亭子间，亭子间勒楼梯个转弯角，是整幢房子里向最推板个房间，伊个位置是勒灶披间个上头、晒台个下头，冬天冷煞、夏天热煞，邪气嘈杂个。阿奶讲，老底子房东是用来做储藏室个，勿得已个辰光再拿出来出租拨勒房客。
伊日天，我经过亭子间，听见阿姨刚好勒哼只歌：“好花不常开，好景不常在。”搿个歌声，好听得来赛过邓丽君。我勿禁脚步停下来，朝伊个房间里向看。
太阳透过窗户笡勒海洒进房间，窗台浪向有盆花，勒阳光下头开得邪气鲜艳，芬芳怡人。亭子间阿姨坐勒窗下头个一只小个圆台子边浪，勒包馄饨，看见我张望，就笑嘻嘻个招手让我进去，还要请我吃碗鲜肉馄饨。
亭子间阿姨到灶披间去下馄饨了，我张大了眼睛好奇个四面看，邪气小个房间，靠墙一边摆了只小号个双人床，床头有只带镜子个梳妆台，床尾摆了几只叠起来箱子，房间里收作得邪气清爽。
亭子间阿姨个馄饨鲜得来眉毛也要落下来了。阿奶讲，女人总归是欢喜小囡个，趁还可以养，是勿是应该为伊留心合适个结婚对象。邻居侪老热心个要帮伊介绍男朋友，亭子间阿姨笑了笑，婉言谢绝。大家侪有点奇怪。
有趟，阿奶生毛病睏勒床浪，姆妈去烧饭。姆妈勿善于烹饪，经常酱醋颠倒。亭子间阿姨搭姆妈讲，煸肉辰光加点热水，肉质会得鲜嫩；蒸蛋用温水调，蛋羹会得滑嫩；肉糜里向加眼咸蛋黄，馄饨馅会得邪气鲜。姆妈勒烧饭辰光，搭独来独往个亭子间阿姨嘎嘎山湖，听伊讲身世。
亭子间阿姨小辰光搭伊阿姐一道学唱家乡戏，方圆数里个乡亲办喜事，常庄邀请伊拉出场表演个。有一年，乡里来了个戏老板，拿伊拉姐妹带到了上海。搿个老板拿阿姐捧红了，搭阿姐暗地里好了，但是辰光勿长，伊又去捧新欢了，拿阿姐打入了冷宫。
阿姐邪气挖塞，吃鸦片解忧，从此有了念头，日日吃，天天糊里糊涂，既荒废了艺技，也败坏了声誉，更加是糟蹋了身体。
寒气充斥勒两姐妹借住个小房子，伊拉难板有得演出机会个，常庄是饥寒交迫。经人介绍，阿妹到有钞票人家去做佣人，整天蹲勒厨房间里做生活。伊早起夜睏，勿敢懈怠，常怕落脱仔饭碗头，所以，就学到了一手好厨艺。
阿妹赚得来个铜钿，原本生活开销是可以个，但是，阿姐又拿去买烟土，等烟瘾，又是哭得眼泪一把，鼻涕一把。有一日，阿姐鸦片吃过量死脱了。阿妹邪气伤心，勿晓得哪能办好，是搿家帮佣个公子搭伊办理了丧事。公子邪气欢喜漂亮、善良、又邪气勤劳个阿妹，伊违背父母之命，借了间公寓搭阿妹生活勒一道了。
战争爆发以后，公子弃笔从戎上战场了，后首来又急匆匆随军离开了大陆。阿妹孤苦伶仃，只好搬出小公寓，住进亭子间。安静个过自家个小日脚。
往期回顾：
图：网络 / 编辑：渺渺