珍重身上衣、眼前人的幸福
沪语朗读：颜海雯
作者：铁凝
来源：老友新朋
沪语改编、朗读：颜海雯
去探望一个生毛病个朋友，聊起交关从前个事体，计划勿少未来个事体。伊突然之间问我：“侬，最幸福个辰光是啥辰光啊？”
想了半日天，竟然没一个合适个答案。
有段辰光，经常带好仔迭个难题去搭人家打交道，勿管是新朋友还是老朋友，聊得扎劲个辰光，一抛出迭个问题就马上冷场，当然收获个答案也是五花八门个。
有人讲，最幸福个辰光是加官进爵时，买了房子搭仔车子以后，体检出来没毛病；有人讲，最幸福个辰光是父母双全、爱人平安、小人开心、领导重用……
当然侪对，但是侪勿能打动我。
直到有一日天，我去看望一个作家朋友，迭个人跟伊个文章一样禅意幽深。
茶过三道，我摒勿牢又继续提出迭个问题，伊微微一笑，拨了我一个意想勿到个答案：
“过去个事体来勿及衡量是否幸福，将来个事体没必要去揣测会勿会幸福，我能够想到最大个幸福，就是用心享受眼面前个好茶，让搿一刻愉快个感觉更加醇厚。面前搭我谈心叙旧个㑚更加是我个幸福之源。”
我终于领会到了，啥个叫做醍醐灌顶。
生活中像煞有忒多论证迭番言话个例子。
曾经到国外去参加文化交流，花了交关铜钿买过一件邪气漂亮个衣裳。因为忒喜欢了，反而舍勿得穿，除非是参加重要会议或者勒盖需要表示诚意个场合时再会得去着伊。使用率忒低，我慢慢叫就忘记脱有迭能样子个一件衣裳。换季个辰光，屋里向人帮我整理衣柜，我再想起来。躲过了水洗日晒，伊仍旧是笔挺个，但是款式却已经过时了。有眼尴尬个拿伊仔仔细细包好，继续收进箱子底下……回味当初自家对伊个喜欢，我摒勿牢感慨，搿些快乐侪成了落花流水呀。
年轻个辰光，也曾经喜欢过某个人，一点一滴、一颦一笑侪让我有讲勿光个言话想要表达。但总归是怯于启齿，小心翼翼个拿搿些心事静静叫个囥勒心里向，折叠得整整齐齐，幻想有一日天会得勇敢个立勒伊个面前，“亨八浪打”全部抖开来。等啊等啊，最终，搿些情愫就像一粒种子，种勒晒勿到太阳又缺乏雨露个烂泥里，只好是腐烂勒密勿透风个土壤里向。
我们侪忒欢喜等，固执个相信等待永远没错个，美好个岁月，就迭能一眼一眼个拨等待消耗脱了。
葛末，勒盖最看重个辰光去做最想做个事体，以为将来会收获个丰硕，全部侪变成微微小而且涩嘴巴个果实。品尝搿种酸涩个事体，阿拉唯一能做个就是自责：假使当初我多着几趟搿件衣裳，假使当初我有足够个勇气对伊讲……搿会得多少幸福啊。
生命里随便啥事体侪有保鲜期。搿些美好个愿望，假使是珍重个供奉勒期盼个台子高头，葛末伊就只能勒盖岁月里积满灰尘。
当阿拉勒盖搿歇辰光感觉到含勒嘴巴里个酸楚，就应该珍重身上衣，珍重眼门前人个幸福。
图片来自网络
往期回顾：
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号