初舞
沪语朗读：金子
初舞
来源：上海老年报2019-02-07
作者：菱花水镜
沪语改写：丁迪蒙
朗读：金子
我，勒联欢会浪向历来是只负责鼓掌，连得广场舞也呒没跳过个，搿一趟，却是上台跳了一趟。
年末个结业典礼，各个系报节目、展示才华，京剧班个“唱、念、做、打”自然是头牌，朗诵班搭仔器乐班也声势夺人，阿拉文学班呢，报了只舞蹈《苗家阿妹》。勒文学班里向，会得跳舞个人实在是忒少了，“拉到篮里便是菜”，我就成为了搿只节目个演员之一，开始平生第一趟学舞蹈个生涯。
舞蹈个步子是“左脚出、右手摆”，光搿只动作我就练了无数次了，跳个辰光还是会得勿自觉个拿步伐搞错脱。出场个辰光，我个位置是右边第二个，等第一个人转身出台，我就要紧紧个接勒后头跟上去。搿只“转身”简直是要了我个命呀，我个脚步搭仔身体好像是脱了节，板好仔邪气硬，让人家看了邪气好笑。哪能办呢？只好是笨鸟先飞，自家去练呀。勒车站等人个辰光，我也乐边浪向练“转身”，惹得勿少走过个人朝我搿搭看。到第二次排练个辰光，大家就侪勒表扬我了，讲我进步老大个。
没想到，问题又来唻，阿拉还缺少一个舞伴，练个辰光，就像煞爬楼梯少脱仔了一级台阶。独舞兼领舞个谭同学时勿时要客串伊个空缺个位置，搿又让我迭个舞盲常庄出现错觉，我实在是忒需要前后左右个提携了呀！亏得小萍同学，一听到缺人了，就马上赶得来加入，七人组齐了，排练就比较便当了。幸运个是，领舞个谭同学以前是专职个民族舞演员，伊个指导，让我寻到了一眼跳民族舞个感觉。
排练需要场地，落雨天，阿拉只好勒教学楼个过道厅里练习，有常时勒呒没课个教室里向排练。整理课桌椅，也花了勿少辰光搭仔体力，吃力得练得脚也抬勿起来了。只有一次，阿拉有机会勒学堂个练功房里向排练，四周围侪是明亮个大个玻璃镜子。
当阿拉搿眼老太婆着勒色彩鲜艳个跳舞衣裳，胸口头佩带大银环，头浪向戴好银光闪闪个大牛角，环珮叮当婆娑起舞个辰光，我好像是穿越到了苗岭，成为了春天里个苗家少女！
六十岁学吹打，活到老学到老嘛！演出个伊日天，阿拉搿队民族舞蹈个演员勒勒区文体中心盛装亮相，转身，甩臂，圆场，每个招式侪是恰到好处个。对于我来讲，简直是创造了人生个新个高度呀！舞蹈跳好，只听见阿拉班级个啦啦队伊面，传来了一阵又一阵响亮个掌声……
勒大家个帮助搭仔支持下，我完美个跳了一只舞，拿初舞献拨了市老年大学。
往期回顾：
图片来自网络