天女（中） / 开普饭

沪语朗读：顾敏

天女（中）

选自《新说山海经》

作者：张锦江

沪语改写：丁迪蒙

朗读：顾敏

天女却从云端跌落下来了。伊个邪气神奇个花瓣全部抛脱了，伊个神力也已经耗尽，勿能够再回到天浪向去了。

哪能晓得，天女落下去个地界浪向突然介勿再落雨了，旱灾马上就来了。田里向种个苗侪因为缺水，枯煞脱了。管理土地耕种个田神叫叔均，晓得了以后，就到天浪向去搭黄帝禀报。黄帝下命令：拿天女逐出翼州地界，安置勒勒赤水个西面。

田神是个老实巴交个老人，伊马上带了一眼随从到了天女居住个地方，去传天帝个旨意。勒一个邪气僻静个地方，有一间破房子，田神就搭众人讲：大家拿房子围牢，勿要让天女跑脱。邪气巧个是，天女勒附近个林子里向听见了，伊心里想：勿晓得自家犯了啥个罪？天帝派田神来捉我。众人进到房间里去搜查，勿看见天女个踪影。

搿个辰光，天女已化作了一只青燕向北飞行。

奇怪个是，青燕所到个地方，侪会出现旱情。田神就跟牢青燕去追。

搿一日，青燕飞到一个祭山神个石庙个屋沿下头，伊面有一群燕子勒飞来飞去，吱呀吱呀叫，看上去是邪气惊恐勿安。青燕看见一只老大个鸟拨一群燕子围牢勒海，叫个勿停，再一看，搿只鸟有四只眼睛，是人个面孔，伊晓得是妖怪，就飞起来扑上去，用伊个嘴巴去啄搿只鸟，燕子们也侪去啄了，搿只怪鸟孤不敌众，就逃走了。啥人晓得，就勒怪鸟逃走个一眨眼睛个辰光，伊对牢仔燕子群吹了一口气，一记头，一只又一只燕子侪嘴巴干得穷喘气，有个喘得趴下来了，有个喘得头侪歪脱了，有个喘得昏过去了，搿种干渴使得搿眼燕子眼睛瞪得老大，眼睛里向侪是绝望搭仔求援，显露出了到了未路个痛苦。

青燕开始流眼泪了，伊个眼泪水滴勒一只燕窩当中，只有一歇歇，燕窩里向个眼泪水就满了，潽出来了，像清清个泉水。

一大群燕子开始吃了，没多少辰光，伊拉就勿再痛苦个张大嘴巴喘气了，伊拉侪围牢仔青燕鸣叫，显得邪气开心，伊拉勒表达感激之情啊！接下来，伊拉又飞出了燕窝，引来了成千上万只燕子来吃青燕个眼泪水，燕窝里向个水始终勿见减少，再多个燕子也吃勿光。成千上万只燕子围牢青燕，青燕像煞就是燕子王国个女王了一样。

就勒搿天夜到，月亮正好勒天空当中个辰光。青燕从屋沿下头飘出来，化出了天女个真身。伊慢悠悠个一家头走到一条河浜个旁边。

河浜里已经呒没一眼水了，露出了河浜个底部。浜底个烂泥已经开裂了。天女蹲下去，伊看见一条长有两尺个黑鱼勒泥浆里向艰难个翻动，没办法脱身，快要干煞脱了。天女个眼泪水又流下来了。搿个眼泪水滴勒黑鱼身浪，鱼蠕动起来，眼泪水越来越多，変成一汪水，像泉水一样流起来，鱼可以游动了。

搿个辰光，黑鱼変成功了一个着黑衣裳个男个，伊对牢天女拜下来：“女神在上，受小个一拜。吾是黑鱼精，多谢女神个救命之恩”。

天女立起来讲：“鱼仙，起来吧”，黑鱼精问：“女神，侬是散百花化风雨之灾个天女伐？”，

天女答：“是个，侬哪能晓得个？”黑鱼精讲：“天浪地下啥人勿晓得？”天女又问：“鱼仙，搿搭介旱，啥辰光开始个？”黑鱼精回答：“回禀女神，就勒两天前头。搿搭来了一个四眼人面个鸟妖怪，伊对牢天空吹了一口气，天就勿落雨了，伊对牢河浜吹了一口气，水就侪没了，伊对牢草木吹了一口气，草木就侪枯煞脱了。女神假使勿救我，我也马上就变成鱼干了。”天女又问：“鱼仙，搿四眼人面鸟是啥地方个妖怪？”黑鱼精回答：“听讲伊是蚩尤变个，来寻一只青燕复仇。”

天女搿个辰光再明白，伊只闯到燕窝里去个怪鸟，勿是偶然个，就是来寻伊复仇个，搿只鸟个恶劣还辣伊跟勒后头，造成旱灾，然后，再拿旱灾个罪名加勒天女头浪向。

黑鱼精又问：“女神，还有啥个吩咐伐？”天女讲：“鱼仙，侬沿牢搿个泉水流成个小溪往前头游，一路游，一路祷告：神呀，请到北方去。搿条溪水就会得越流越大，越流越宽畅个，沿途个旱情就会得消失，两岸个禾苗就会得再长出来个。”黑鱼精双手一拱：“女神，小个尊命！”讲好，就化成了一条黑鱼，顺牢溪流个方向游脱了。