闲话比乐中学（上） / 开普饭

沪语朗读：周红璎

朗读者

闲话比乐中学（上）

原创：老周望野眼

改编：丁迪蒙

朗读：周红璎

仅仅以升学率来衡量教学质量个言话，我出生、长大个老卢湾勒上海怕是勿哪能个。当年整个区共总只有向明中学一所市重点，卢湾、五爱两所区重点，其他侪是普通中学了。但是，卢湾区个普通中学绝对勿普通个，交关学堂来头侪老大个。比方，原来校址勒淮海中路、马当路口个比乐中学就是搿能个。

想到讲讲比乐中学个历史，是因为勿久前中学同学群里热议个话题，徐家汇路肇周路口个五爱中学旧址（后改名李惠利中学了）已经成为比乐中学个新址了。迭个消息一出来，勒五爱中学个老校友当中就是一石激起千层浪了。

徐家汇路肇周路口个搿块区域，从1889年美国安息浸礼会勒搿搭办学以来，已经经历了将近130年个漫长岁月。从惠中中学到五爱中学，再到李惠利中学搭仔五爱高级中学个脱离，勿管学堂名称哪能改，百年老校始终是一脉相承个，是维系一百多届校友个心灵纽带。自家个母校突然变成了“比乐中学”，五爱中学个校友心理浪向是邪气难接受个。论教学质量，五爱是区重点，比乐只不过是普通中学。论学堂历史，比乐创办于1946年，校史比五爱要短脱五六十年。五爱旧址变成比乐，搿是为啥呢？

带勒疑问，我到肇周路徐家汇路口去走了走。校友流传个并非谣言，“李惠利中学”个牌子已经撤脱，换了“比乐中学”个新招牌。我绕牢熟悉个道路转来转去，虽然讲，大楼老里八早就是新个了，操场也换成新式个塑胶跑道，但是，一草一木、一砖一石仍旧是邪气熟悉，学堂个整体结构还搭几十年是前一样个。唯一改变个，是血脉。搿搭已经搭五爱没啥关系，换了主人，是比乐了。当年搭比乐篮球队打个伊眼让人紧张到气也喘勿过来个比赛，好像已经失去了意义。

不过，言话说转来，五爱中学个校友勒制造局路毕竟还有个家，比乐中学从1946年8月创办到现在，搬过个家就忒多了。

“比乐”搿两个字，缘于复旦大学创办人马相伯先生1930年为中华职业教育社礼堂所题写个名字：比乐堂。“比乐”源自《易经》当中个一卦，比卦。比卦象征亲密无间、相亲相辅、团结互助，预示着吉祥。换句言话讲，有比卦就有快乐，所以叫“比乐”。

比乐中学个创始人是黄炎培、江问渔搭仔孙起孟，侪是有名个爱国人士搭仔教育家，首任校长孙起孟后来曾经担任全国人大常委会副委员长，比乐中学个校名就是孙起孟题写个。

虽然有介大个来头，比乐中学办学却是一直老艰难个。最初，黄炎培伊拉办搿所学堂，是有实验性质个，校址就设勒雁荡路、南昌路口个中华职业教育社三楼。49年以后曾经搬到淮海中路553号、淮海电影院对面个青年中学个校舍，1951年，私立明德中学并入，1958年，私立崇实中学并入，学校搬到淮海中路375号，原法租界公董局机关所在地。阿拉读书个年代，比乐中学校址就勒伊面。1993年，淮海中路东段改造，比乐又搬到建国西路154号，原来五十五中学个校址，有意思个是，迭个地址五爱中学也曾经暂时借用过。两年以后，新华中学并入比乐，学堂迁到崇德路43号，搿是原来卢湾区第三中心小学个地方（勒勒再之前啊，是法租界公董局所办个喇格纳小学），2018年，再搬到原来个李惠利中学所在地。