老底子上海人个汰浴 / 开普饭

沪语吟诵：渺渺如胭

朗读者

老底子上海人个汏浴

作者：龙钢

上海话改写：郭莉

朗读：施陈骅

指导：丁迪蒙

来源：解放周末2019年12月15日

几十年前头，特别是到了冬天，上海人个“汏浴”，实在是一桩衰瘏个事体。欸歇辰光既呒没热水器，也呒没浴霸，再加住房面积侪邪气小，交关家庭并呒没卫生间，抽水马桶、浴缸简直就是奢侈品。甚至连公共浴室也人轧人，要排长队等几个钟头，所以大家侪只好勒勒自家屋里个房间里向汏浴。

勒自家房间里汏浴，一定要勒勒日中兴里，迭个是一日里向顶暖热个辰光。当时还呒没双休日，大家也勿是侪勒勒礼拜天休息个。侬想好要汏浴了，必须寻一个勿上班个休息日脚，当然希望迭个一日是个大晴天。可惜往往勿是阴天就是落雨。搿能，房间里就呒没阳光，室内温度就要低脱勿少。当然上海人家也是有办法个，就是拿煤球炉拎到房间里，一边烧水增加室内温度，一边汏浴。搿种做法有蛮大个危险性，一勿当心就要煤气中毒，但是也呒没更好个办法了。

上海人家汏浴，有两样大家侪熟悉个物事，就是木头浴桶搭仔塑料浴罩。每趟汏浴，就拿绳子拉好塑料浴罩，挂勒浴桶上头，正好拿浴桶四周密密缝缝套牢，勿好让冷气钻进浴罩里向。汏浴水就需要现烧现用。当时上海人家用煤气个也勿多，煤球炉烧一壶水辰光太长，一壶热水也勿够，汏一只浴要用好几壶热水。为了抓紧辰光，同时也是为了节省每家每户按月供应个煤球，阿拉屋里勒勒汏浴之前，总归叫我到隔壁老虎灶去泡热水。泡一热水瓶热水，欸歇辰光要两分洋钿。

阿拉屋里附近个永德坊，有一只老虎灶，主人是一对五十岁横里个夫妻。老板比较瘦小，但是做起生活来动作邪气煞膊，有人来泡热水，伊就老快个打开大汤罐个水龙头。搿种水龙头浪向一般侪是绕了一块纱布个，搿是为了防止热水一记头出来辰光烫到边头个人。热水瓶就放勒水龙头下面，水龙头一开，热水就顺牢纱布流进了热水瓶里。有常时正好碰着大汤罐里水还没烧开，要等脱几分钟，乃末正好可以乘机轧勒边头嘎山河个人堆子里，瞎七搭八听眼八卦笑话咾啥……

有一趟，我泡好热水朝屋里向走，快到门口辰光，发现热水瓶个木塞头落脱了，一瓶热水已经倒脱一半，剩下来个开水也已经变成了温水。搿记我吓煞了，生怕回去拨大人骂，要紧一路过去寻木塞头，再从自家平常零用铜钿里向拿出两分洋钿来，重新泡一瓶热水。老虎灶女主人看见我又来了，就对我讲：小朋友，热水勿够啊？我尴尬煞了，乌里马里回答讲，阿拉屋里大人叫我再来泡一瓶水。搿趟闯祸，倒也呒没拨爷娘发现。有了热水，汏浴总算是万事齐全了，浴桶里倒好热水，塑料浴罩一罩，里向头马上热气腾腾，温度蹿上来，一眼也勿觉着冷了。当然，汏浴个速度侬自家要控制好，因为浴罩里个热气终究是会得散脱个，呒没了热气，浴罩会一眼眼瘪下来，搿能人就要着冷了。

搿种尴尬个汏浴历史，已经过去几十年了，只不过是阿拉城市生活中个一段记忆。但是当年汏浴辰光个各种土办法，实在也是好办法，从一个侧面反映了当时生活个艰难，也是上海人生活个智慧。

到如今，大家再也勿要为冬天汏浴发愁了，差勿多是家家户户侪有自家屋里个卫生间淋浴房。不过我倒是也常庄回想起当年个画面：人坐勒木头浴桶里，浴罩里向侪是“水蒸气”，人一眼也勿冷。窗口照进来个，是休息日脚个明媚个阳光……