小囡勿肯讲上海言话个原因及对策

小囡勿肯讲上海言话个原因及对策

作者：丁迪蒙

朗读：丁迪蒙

上海小人现在多数侪勿讲上海言话了。勿管是年轻个家长还是长一辈个大大、阿奶，外公、外婆，侪辣搭小囡用普通言话讲言话。问伊拉为啥？所有个人侪讲：没办法呀，伊拉勿肯讲，讲勿来了呀！大家想想，辣五、六岁到十七、八岁语言发展最最关键个十几年里，上海小人讲个侪是普通言话，侬叫伊拉哪能再可能会得讲上海言话呢？

我认为，上海小囡勿肯讲上海言话个原因有得几个方面。

一、幼儿园

有勿少小囡辣进幼儿园之前，已经跟牢父母或者是老一辈学会讲上海言话了，但是，一进入幼儿园，就失去讲上海言话个环境了。老师侪用普通言话搭伊拉讲言话。打招呼，讲故事，做游戏，搞活动，搿能一来，小囡讲上海言话个路就拨堵塞脱了，辣搿能个环境下头，伊个思维搭仔语言就全部侪转向了。因此，邪气快个，用勿着一个号头，伊拉个上海言话就侪忘记脱、讲勿来了。

虽然现在有勿少幼儿园也开始搭小朋友讲眼上海言话了，但只是限于读读简单个儿歌，比勿讲当然要好眼，绝大部分辰光里还是辣讲普通话。交际个环境呒没，实际浪也是勿起作用个。

二、小学

小囡6周岁开始读小学，到进初中预备班，五年里向每天早浪向七点多就进校门了，要到下半天四、五点钟再回到屋里去，辣毛十个钟头里向所有个课侪用普通言话上，思考问题、读书、同学之间个交流，辣一道讲言话，侪是普通言话。等回到屋里向做功课了，伊拉用啥语言进行思维呢？同样是通用语，葛末，啥个辰光好去拨伊拉讲讲上海闲话了呢！

三、家庭

有勿少家长认为：普通话是官方语言，是强势语言，将来小人出去工作，要接触个是各种从各个地方来上海个人，交流起来当然是用普通话方便，让伊拉从小就讲普通话，是可以为伊拉今后发展带来好处个，讲勿来上海言话倒是覅紧个。所以，只要小囡讲普通言话，大人哪怕是讲得再勿好，伊也就跟牢伊讲洋泾浜普通言话了。

再加上现在个小囡大多数是八零后个子女。搿眼家长从读书开始就只讲普通言话了，自家也讲勿清爽，搭小囡也就只讲普通言话了。

因为普通言话讲得多，所以当小囡想讲两句上海言话个辰光，伊个语音听上去就邪气硬，用词勿对，发音也老怪个，就像外地人辣学上海言话一样。家长听到小囡讲得勿对就去笑话伊了，搿能一来末，小囡就觉着老没面子个，就再也勿肯讲了。

四、媒体

现在上海个电台、电视台播出个节目当中，只有少数谈家常琐事个用上海言话，绝大部分个节目侪是普通言话。小朋友欢喜个游戏、童话故事咾啥侪是用普通言话个。到电影院去看看电影，各种电影也侪是普通言话。出版个各种有声读物，也是普通言话一统天下个。

几个方面夹攻，小囡就再也没讲上海言话个机会了，葛末，要叫伊拉讲好就勿容易了。

幼童阶段是语言学习个最好时期，过脱11岁再去学，小囡就勿愿意学了。各地方言个传承事实已经证明，单靠家庭里向长辈辣屋里搭小人讲，同辈、同龄人之间相互交际个辰光勿讲、勿互相用上海话交际，是学勿会上海言话个。语言毕竟是交际工具，每日天讲，小朋友之间一道讲，就会得自动增加、扩充、传承各种词语，自动纠正错误，只有自由讲，形成自然个交际环境，再能学得会上海言话。勿必担心新上海人个小囡，只要跟上去讲，伊拉老快就学会上海话。

现在已经呒没规定，下课辰光一定要讲普通言话，勿好讲方言了，但是已经形成个惯性一记头还转勿过来。哪能办呢？

针对现在个现状，我伲个对策是以下几点：

一、学堂教育

小人进入幼儿园个年龄正好是语言形成搭仔发展最快个辰光。因此，应该让小朋友拿上海言话带进学堂，让伊拉有一定个语言环境，顺其自然个讲下去。教师可以用上海言话来讲故事，朗读短小简单个唐诗可以采用一遍上海言话，一遍普通言话个方式来教学。

小学个领导要采取措施，让上海小人有得讲自家家乡方言话个自由空间搭仔权利，让伊拉有得母语个根。下课课间休息个辰光，一定要鼓励同学之间用上海言话进行交流；教师搭学生谈话、聊天个辰光，也最好用多用用上海言话，搿能可以有种亲和力，可以拉近搭同学之间个距离。根本用勿着担心新上海人个子女是否听得懂，只要有交流环境，小人学语言是邪气快个。

语文课当然是要用普通话进行教学个，但有眼古代诗歌让学生用上海言话去朗读，应该也是老好个。因为上海言话里有完整个入声字，伊同古音是相协个。古音当中个入声韵，用上海言话朗读比普通话更加接近古代个语音，听上去也是更加有味道个。

辣现在搿种非常个环境下头，学堂里向可以辣拓展课里教教上海言话个。现在已经有眼学堂个一眼学生有得传承上海方言搭仔海派文化个意识了，辣课间，也已经有学生带头讲上海言话了，老师要多鼓励，多表扬表扬伊拉，形成一个讲上海言话个环境。

二、家庭教育

家长辣自家屋里向一定要多讲上海言话，尽量少讲、或者勿讲普通话。搭小囡讲言话、回答伊个问题个辰光，一定要多用上海言话。还要拿小囡刚刚问个问题用上海言话讲一遍，叫伊跟牢讲一遍。

还有，小囡个上海言话讲得再勿好听，辣开始个辰光一定多要表扬伊，讲伊讲得蛮好个，慢慢叫再讲拨伊听正确个词语，再去纠正伊个发音。

三、新闻、出版、媒体

电视台里应该多播放一眼上海言话个节目，像《黑猫警长》上海言话版就老灵个。另外，还可以为小朋友特为配制一眼上海言话个童话故事咾啥。

出版社要多出版一眼上海言话个有声读物，像儿歌、绕口令、故事、古代小诗咾啥。

人类文化个载体主要有实物、文献搭仔口语三种，其中，口语承载个是更加原始、更加重要、更加丰富，也更加有得草根价值个文化。辣共同语得以推广个情景下头，方言个多样性可以进一步显现中华民族语言资源个丰富性，并使得共同语永远有得活水个源头。

从搿个意义浪来讲，传承搭仔发展上海言话，就是每一个上海人个责任了。

原上海市委书记韩正同志去年辣复旦大学做报告个辰光讲：“我们要弘扬普通话，传承上海话，学会外国话。”上海语委负责人也曾经强调：“要妥善处理好普通话和上海方言的关系，完整、全面理解并宣传好国家‘推广普通话，但不消灭方言’的语言政策。”

由此可知，国家是重视方言，也是允许方言地区个人使用自家本土语言个。推广普通话，只是为了各方言之间个人交流起来可以方便点，并勿是要消灭方言。要晓得，语言是呒没贵贱之分个，上海言话是吴侬软语个代表，更加勿是低档个语言。