老上海个曼妙身影，亭子间方见风韵
沪语朗读
来源：魔都时刻
沪语改写、朗读：渺渺
亭子间，作为石库门建筑个一部分，诞生勒上世纪个二三十年代，伊个位置是勒灶披间之上、晒台之下、正房个后头、路梯个当中。大约摸七八个平方个空间，朝北，狭小阴暗，冬寒夏热，下烤上晒，大部分用来堆放杂物，或者让佣人住。
亭子间，可能是乡土上海最绝妙个缩影，以至于有人讲，呒没住过亭子间，勿好算科班出生个上海人。
上海开埠之后，国内外有得大量移民到了上海，住房空前紧张，造房子跟勿上、也没办法跟得上，因此，亭子间就成为了埃些买勿起、也租勿起高价房个低收入阶层个栖身之地。卖艺者、小商贩、戏子、十里洋场个失风之辈常庄勒此栖身，也有大学生、穷愁个诗人或单身艺术家。伊拉大多散落于各个地方个亭子间里，演绎过客一样个故事。
小小一方个空间“冬冷夏热”，只蹲一段辰光可以，要长期住勒埃搭真个是吃勿消个。亭子间侪是朝北个，夏天介又闷又热，冬天介冷得受勿了。到了20世纪廿三十年代，“二房东现象”盛行个辰光，亭子间常庄拨二房东租拨一些囊中羞涩个租客，从而，形成了一种独特个“亭子间文化”。
勒亭子间里生活是苦恼个，梁实秋《亭子间生涯》里写道：
“厨房里杀鸡，无论躲哪一个角落，都听得见鸡叫，厨房里烹鱼，可以嗅到鱼腥，厨房里生火，可以看到一缕缕个青烟从地板缝里冉冉上升……”。
“亭子间”个租客当中，有勿少是文人，尤其是还呒没成名个“二三流作家”，伊拉收入拮据，生活清贫，勿得勿暂时“蜗居”勒亭子间，“亭子间作家”拉个生活是邪气艰辛个。用煤球炉烧饭，到老虎灶倒水。铜钿勿够了，吃碗阳春面。就是迭能，仍旧勿免有一顿没一顿，交勿出房钿还要拨房东赶出来。
“亭子间作家”，虽然常庄拨用来指称埃些勿入流个作家，其实也勿尽然。鲁迅个《且介亭杂文集》，就是勒虹口横浜路景云里个亭子间写个。因为亭子间勒越界筑路个半租界浪，因此取“租界”字形一半而言之。当时，鲁迅个邻居还有叶圣陶、沈雁冰、周建人。后来鲁迅觉着弄堂里搓麻将个声音忒吵，就搬到北川公寓去了。
亭子间其实勿单单是石库门个专利，花园洋房、新式里弄房子侪设有亭子间个。搿是房子结构所决定个一个必然个空间。一般来讲，房子越好，亭子间也就越考究。清末民初老洋房个亭子间，敞亮宽爽勿讲，还有柳桉木壁炉架；静安别墅迭能个早期高档住宅，亭子间侪是套间式个，俗称双亭子间。住房紧张时代，新婚夫妇分到迭能个双亭子间，就像中了上上签！上海人善于螺蛳壳里做道场，室雅何需大？上海人个亭子间，充分体现了后现代文化所提倡个“精致”，且早早个走勒前面了。
方寸之间个亭子间，流淌过多少纷繁个情感故事，承载勒一部厚重个海派都会历史，甚至比豪宅更加真实而细腻。想要阅读原味老上海，亭子间也许就是伊个第一章。
往期回顾：
图：网络 / 朗读 & 编辑：渺渺