上海人个档次侪勒弄、里、坊、邨、楼里向 / 开普饭

沪语朗读：渺渺如胭

朗读者

上海人个档次侪勒

弄、里、坊、邨、楼里向

作者：马尚龙

沪语改写：丁迪蒙

勒上海，从小瘪三到大老板，可以划分出老老多老老细个经济文化层次，或许，一个穷人可以是洋装瘪三，但是，归根结底是骗勿了人个。搿个就是侬住勒啥地方？

首先，会拨以上只角、下只角、中只角来界定。搿个人个上、中、下流，下只角个一定是下等人，上只角个却未必是上等人；覅认为住勒上只角个大环境里向就算得上是上只角个人了，还需要自报家门个类型，勿必去看伊面个房子，就已经可以掂量出对方个家底了。而搿个家底，就是郅弄、里、坊、邨、楼，五大民宅个类型称谓，档次搭仔身份就侪勒其中了。

住别墅个人实在是过于少了，可以勿算作普通民宅。

郅弄呢，是最低档个贫民窟，穷人住个。滚地弄，蕃瓜弄，杨家弄，房子结构就是矮平房，一块绢头可以当作窗帘，以前个苏北人集中居住个地方往往就是以弄冠名个。

里，是最广泛、最普通个房子了，几乎所有个石库门侪拨称作XX里，步高里，渔阳里……比石库门好一点、差一点个房子，也常庄归类勒其中；里搭仔弄，是构成上海最普遍个民宅架构，叫做里弄。

坊，就上层次了，会得有卫生设备，所谓个新式里弄房子，可以算作坊，花园坊，淮海坊，尚贤坊，巴金曾经住勒淮海坊，勒淮海路搭仔陕西南路路口。

邨，虽然也可能是勒弄堂里，象陕南邨搿能完美个花园小区属于少数；以邨冠名，最具有标志意义个是蜡地钢窗——长条柳桉打蜡地板搭仔钢窗，有独用个卫生设备，弄堂口有铁栅栏个门，或许勒大跃进时代拨拆脱去大炼钢铁了，但是铁门个痕迹还勒海；几十年以后，虽然钢窗稍微有点变形、开启比较困难，但主人勿愿意更换成为铝合金窗。像长乐邨，四民邨，光明邨，梦邨……

楼个档次或许还要更高一点，所有个公寓侪是楼，有一些公寓就以楼相称。凡是住勒邨搭仔楼里向个人，侪是有知识、有文化、有经济能力个人。

郅，还应该有村，村是解放以后造起来个房子，相当于里。因为是解放以后成批成批造起来个工人新村，后首来也叫做新公房，火柴盒子结构，譬方曹杨新村、邮电新村、上钢新村，任何一个新村地块侪可以延伸造下去，因此就有了一村、二村、一直到十村。