又到枇杷成熟的季节
沪语朗读：王静
作者：程介民
沪语改写、朗读：王静
一年当中枇杷最好吃个辰光到了，树枝高头侪是蜡蜡黄个枇杷挂勒海，成为了公园里向一道邪气漂亮个风景。但是啊，总归有眼游客会做得出勿大文明个事体：欢喜随手就摘枇杷来吃。低个树枝高头个枇杷已经基本浪向侪没了，高个地方个枇杷还没逃脱过。还有人抱仔树拼命个摇，虽然讲，难板有几只枇杷落了地浪向，不过树也已经拨折腾得七荤八素了。更加夸张个是，有种人索介拿树枝硬劲拉得弯下来，为去采枇杷，乃末有眼树枝从此就“寿终正寝”了。
公园里向个枇杷树是搿能介情况，小区里向个枇杷树也逃勿出搿种灾难。阿拉小区勒勒18年前种了好几棵枇杷树，搿两年开始结果了，有些邻居就瞄准了搿眼枇杷树，伊拉自制了采摘工具，呒没等枇杷熟透，就拿伊拉采得精精光！只要有人开始动手，就控制勿牢，大家侪来了。搿几年，小区里向所有个枇杷树侪遭毒手，刚刚结果，就拨抢光。有辰光甚至于变成功折树枝比赛唻，连枝带果搁碌三姆侪采下来。没工具个一些居民竟然还表演了高难度动作，拿整只身体挂勒树浪向，用自身个重量拿够勿着个枇杷摇下来，搿种邪气危险个、又勿文明个行为，实在是让人担心啊。没摘到个人还邪气勿开心唻！为了搿眼枇杷伊穷打相打个事体就曾经发生过。枇杷呒没熟透就拨居民抢光，摘下来个又因为没熟，勿好吃，大多数又拨厾脱了。小区里从此就再也看勿到蜜黄个、成熟个枇杷树个风景了。
枇杷挂勒树浪向是一道风景。破坏自家小区里景观个人是老少个，但伊个“杀伤力”邪气大，遭“毒手”以后，枇杷粒粒勿存，茂密个树枝凋零，像人生了场大毛病。另外，枇杷树底下头个绿化带也拨严重破坏得牢结棍个，一眼小个灌木拨人踏弯、折断。树底下头伊片原本香气扑鼻个栀子花，勿要讲开花了，连得树也看勿见。由此而产生个枇杷“危机”，已经好几年了。
今年仔，小区里个枇杷树浪向又结了勿少果子。一个社区个老年志愿者为了防范再发生以前个事体，就主动担起枇杷树个看护责任，自家去买得来好几斤枇杷，看到有人来摘，就送拨人家，弄得想要摘个人勿好意思了，慢慢叫就再也没人来摘枇杷了。老人又写了份倡议书，建议等枇杷熟了以后，摘下来送拨社区养老院。大家侪赞成、签名，并且还得到物业搭仔居委个大力支持。
今年小区里向枇杷树，一片黄颜色，“大似明珠径寸，黄如香蜡成丸”，让人看勒海心情邪气舒畅。
朗读者
往期回顾：
图：网络/编辑：渺渺如胭