一个“鬼”字，喺粤语文化里面竟如此博大精深！

有时候，有人问到你一啲唔想回答嘅问题嘅时候，你可能冲口而出就会讲：“关你鬼事咩！”一句响亮而有力度嘅回答。“关你鬼事”同“关鬼你事”，虽然只系“鬼”字嘅位置唔同咗少少，但系两句话之间却形成咗微妙嘅语感差异。所以呢一个“鬼”字，喺粤语中实在大有文章。

鬼，喺广府话中用作加强语气，表达某种感情嘅时候，位置灵活可穿插前后。首先可以做主语，表示“鬼”先咁样做，连鬼都会……有厌恶嘅情绪——“你讲嘢冇句真，鬼信你啊。”“你咁邋遢，鬼都怕啦！”

“鬼”已经系加强语气，再加上副词“好”或者“咁”，就更加强强联手喇，譬如：“成日开会好鬼烦!”又或者“你去咗边啊?咁鬼耐!”

放喺动词后面、“乜”后面，都系表示否定，“咁迟先讲，仲讲鬼咩”，“都有咗定论，仲讨论乜鬼”。

放喺双音节嘅形容词中间，唔系表示厌恶惊叹嘅情绪，就系表示否定：“你条友仔，真系麻鬼烦!”“而家先嚟揾我，得鬼闲!”

“鬼”仲会用喺某啲短语中，同样系加强语气，“乞鬼人憎”，“失鬼礼人”……呢个“鬼”一般居于四个词中嘅第二个字，所以如果要表达“唔关你事”，将鬼放喺其中，可以讲“关鬼你事”，纯粹加重不满情绪。但按照正常语序，表述“关你什么事”，甚至粗鲁啲“关你屁事”，可将鬼咁样安排：“关你鬼事”，呢个“鬼”表示否定。按照语法同词义，似乎“关你鬼事”更合逻辑同语感。

鬼字的确好用，人哋问你识唔识嗰个人，你答：“识鬼!”几咁简洁有力，仲顺便表达咗唔耐烦或者不屑等情绪。不过随住“劲”、“超”、“丧”呢类潮语取代咗好多副词嘅位置，“鬼”字派上用场嘅机会大大减少。而家流行嘅只有：“我对你痴心一片，你当我黏鬼咗线。”

喺粤语里面，仲有好多带有“鬼”字俚语、谚语等等，就譬如以下嘅12个同“鬼”有关嘅粤语俗语：

1、 多只香炉多只鬼

形容多一件事就多一份麻烦，亦经常用嚟比喻多一个人嚟就会将利益分薄。

例句：隔离又开多间士多店，真系多只香炉多只鬼！

2、吊靴鬼

喺粤语里头，吊靴鬼就系“跟屁虫”嘅意思。

例句：你唔好成日跟住我啦，成只吊靴鬼咁。

3、 神憎鬼厌

形容某人太恶劣，令到所有人都憎恨讨厌。喺粤语里头有一句歇后语叫“神台猫屎----神憎鬼厌”。

例句：呢个衰人坏事做尽，搞到神憎鬼厌！

4、 鬼五马六

首先讲“鬼马”，神秘难测，有趣而难以估计，即诡秘之意，经常形容人机灵慧黠。喺电视剧里面经常都会有咁样嘅一幕，男主角畀女主惊喜嘅时候，女主角通常会讲：“鬼马喇你~”。

喺旧时候，初五系牛日，初六系马日，有旧习俗系要去地藏庙拜牛头马面嘅，使人感觉神秘，所以鬼五马六可以解释为人嘅行为古怪荒诞，令人捉摸唔透。

例句：都唔明佢点解成日着衫都着到鬼五马六咁。

5、 撞鬼

“撞”喺粤语里头指碰到、遇到。遇上鬼，比喻碰上倒霉事。

例句：撞鬼囖，叫你买鸡翼你就买咗鸭翼......

6、 鬼揞眼

“揞”喺粤语里头指遮住。被鬼遮住人嘅眼睛，形容明明某样东西或事情就喺面前却睇唔见、搵唔到。

例句：部手机明明就放喺度，啱先搵嚟搵去都搵唔到，唔通鬼揞眼？

7、 有钱使得鬼推磨

呢句话好明显喇，有钱就令到鬼帮你推磨，形容金钱万能，只要肯使钱就可以令到人哋为你办事。

例句：正所谓“有钱使得鬼推磨”，呢件事包喺我身上，唔使担心~

8、 鬼拍后尾枕

指做咗亏心事，不知不觉地自己讲漏嘴。有不打自招，做贼心虚嘅意思。

例句：呢件事本嚟大家都唔知，后尾佢自己鬼拍后尾枕讲咗出嚟，之后就扬开咗囖......

9、 呃鬼食豆腐

传说有位青年口才了得，本嚟鬼准备食佢，反而俾佢呃去食豆腐。后嚟故事传开，渐渐被人们用嚟表示极度唔相信、唔上当嘅意思，相当于普通话“忽悠谁呢”嘅意思。

例句：呢粒黑蒙蒙噶药丸能医百病？你呃鬼食豆腐啊！

10、 扮鬼扮马

“鬼马”喺上面已经解释过。“扮鬼扮马”通常同“整蛊作怪”一齐用，形容人装扮得古灵精怪或行为诡秘，有恶作剧嘅意思，令人猜不透。

例句：你最近扮鬼扮马、整蛊作怪，有咩企图啊？

11、鬼画符

又作“鬼画桃符”。喺古代，人们习惯于桃木板上书写类似狂草嘅文字，然后钉喺大门两边，藉以驱邪避鬼。因为文字潦草，唔容易辨识，后遂用“鬼画桃符”讥讽字迹潦草拙劣者。好似鬼画嘅咒语，胡乱涂抹，广府人将其比喻为潦草难认嘅字迹。

例句：写字写到鬼画符咁，真系搵鬼先识睇囖......

12、丑死鬼

丢脸、羞死人了的意思。

例句：换返件衫先落街买嘢喇，着住件睡衣出去，丑死鬼呀。

“鬼”字喺粤语里头真系好常用，除咗上面提到嘅之外，仲有“鬼杀咁吵”指环境非常嘈杂；“死鬼”、“衰鬼”系老婆对老公嘅昵称，“㜺鬼”指有趣；“摄青鬼“指好似鬼一样突然闪出嚟吓人一大跳。恰当咁喺句子中使用“鬼”字会让你嘅句子显得十分地道，亦可以体现粤语文化嘅㜺鬼之处。