上海话如此自相矛盾：如塑料铅桶、汏脚面盆

有些上海话，听上去特别怪。仔细想想呢，又蛮有道理。

比方讲：塑料铅桶。铅桶本应铅皮做，到1960年代，改用塑料了。原料易改口难改，哪能办？只好叫“塑料铅桶”。想必大家侪听过也都讲过：“阿二头啊，只塑料铅桶搭我拿过来！”

有人讲，铅桶本身也没讲对。严格讲，铅桶是用镀锌的铁皮做的。

又有啥用，上海人根本不管你这许多，一向就是叫铅皮的。

不过，讲铅皮终于也会翻车。有位读者，家里用个阿姨是北方人。有一天，他想浇花，顺口就用沪普对阿姨讲，帮我拎一铅（千）桶水过来。

阿姨吓到花容失色，问，一千桶？要那么多做啥？

再比如：搪瓷铜痰盂。我外婆就一直这么叫。因为老早痰盂罐都是铜做的，后来改用搪瓷了，也是原料易改口难改。

“只搪瓷铜痰盂今朝要好好教擦擦伊，已经有老硍了。”

当然还有“搪瓷饭碗”，自古以来，饭碗是瓷器，极尽精巧。

后来，随便啥人进单位，侪会发到两只粗拉拉的“搪瓷饭碗”，一大一小，碗沿还印着厂名和工号。

饭点一到，小青工们一面用调羹敲着“搪瓷饭碗”，一面唱着山歌，向食堂进发。

老师傅迷信，有辰光就要咕两句。“一帮小鬼，也弗怕触自家霉头。”

年纪轻嘛，姜太公在此，百无禁忌。

虽然都工作了没几年，也不怕自家“敲忒”自家“饭碗头”。

小辰光在南市，还听到隔壁好婆喊钢錝铜吊呢。

老早烧水的都是铜吊，后来用铝的了，也一记头改口改不过来。

严格讲，钢錝镬子也要算进去。因为老早乡下头的镬子侪是铁打出来的，烧饭（或蒸饭）烧菜侪用铁镬子。

“烧咸酸饭（即咸肉菜饭），钢錝镬子烧来没铁镬子香。”

还有梳头发的木梳，一般人家有木梳用用蛮好了。《红灯记》里对暗号：“有桃木的吗？”档次已经上去不少。

不过，老早大人家嫁女儿，总归要有一把牛角的。明明是牛角的，也叫牛角木梳。卖木梳的店里也这么叫。

直到1980年代初，很多上海人家还自家动手翻棉鞋。而做棉鞋的材料已经很丰富了。比如鸭绒，比如骆驼绒。

不过做好以后，还是讲：“今年我帮阿拉囡唔做了一双鸭绒棉鞋。”

隔壁小娘娘要天井里做棉鞋，自家手里拿物事拿不落，就喊自家儿子：

帮我拿只矮凳来。

儿子拿了一只小矮凳跟出来。伊摇摇头，讲：“不是这只矮凳，我要那只高脚矮凳，坐着适意。”

还有呢，不锈钢的晾衣杆刚刚出来时，并不只摆在杂货店里买，那时更是还没有超市呢。

而是由小贩推着脚踏车进弄堂，竹竿不锈钢杆一道买。讲起来是这样的：“侬要牢一点么，买一根不锈钢竹竿去，不过价钿大一点。”

讲来讲去，皆因上海开埠不到二百年，恰逢科技大发展，新材料层出不穷。

语言总是滞后的，赤脚也跟不上啊。比如现在，大家都更喜欢日本的陶瓷菜刀。

上海话里，除了原料易改口难改，还有用途改了口难改。

顶顶好白相的例子就是，家家人家侪有“汏脚面盆”。

顾名思义，面盆应该用来揩面或汏面。后来大家越来越讲卫生了，揩面汏脚的盆要分开，于是乎，就有了“汏面面盆”和“汏脚面盆”。

“小鬼，晓得否啊，汏好弄好，汏面面盆要叠勒汏脚面盆高头，弗好倒过来，汏脚面盆叠了汏面面盆高头。”

赛过绕口令。

当年下乡插队，女生基本上侪带两只面盆，上下分明。

阿拉男生则没那么多讲究，一只面盆打天下。反正面孔脚爪侪是自家的，有啥好嫌避的呢。

还记得有一年过年，阿拉宁波人家又要浸水笋，又要浸糯米，又要浸年糕，一浸侪是十几斤乃至几十斤，屋里坛坛罐罐全出动也不够。

家母就讲，“唉，恨不得拿汏脚面盆砂粉擦一擦也拿来派用场！”

还有两句骂人的自相矛盾的言话。

一句叫“洋钉木匠”。老早的木匠，不管大木小木圆木，造房子做家什箍水桶，一律用榫头竹筋，绝对不可用铁器。

一个木匠，被人称为“洋钉木匠”，说明伊生活推扳，榫头也开不好装不进。“硬装榫头”总归还在装榫头，“洋钉木匠”比“硬装榫头”还要蹩脚。

还有一句是“女裁缝”。老早阿拉外婆，伊看到啥人衣裳做得不舒整，七歪八畸，就会得讲，搿裁缝生活推扳，哪能像“女裁缝”做出来的啦。

盖因最早“奉帮裁缝”清一色侪是男的。

后来为生活计，男女裁缝侪有，这句带有性别歧视的言话就不流行了。

到现在，多少美女名模，老了侪改当设计师，创出自家品牌，啥人还敢骂伊拉“女裁缝”啊。

最后顺便讲两个宁波言话的段子。当年在上海流行得很。

估计很多人侪听到过，甚至会得讲。

第一段也很自相矛盾：

一个大大嗰小顽（男孩），坐勒高高嗰矮凳浪，手里拿（音dou）把厚厚嗰薄刀（其实是“濮刀”），来切石石硬嗰馁糕（类似宁波人的“块”）。用火热热嗰冷饭，勒喂黑黑的黄狗。

宁波人随便啥狗侪叫黄狗。

第二段则极具音乐性和画面感。

一个黑黑嗰夜到，风咣咣吤来该吹啦，我人刮刮吤来该抖来，听见有人笃笃吤来该敲门，我扶梯高头促促吤奔下去，门啊啊吤开开来，一个小娘荦荦吤走近来，其看见我咪咪吤笑笑，我心别别吤来该跳啦。

见好就收，再会。