种果树
来源：上海老年报
作者：徐琏
沪语改写：丁曙立
朗读：罗国燕
“种果树，种果树，伸出你的食指弯弯曲，变成一粒种子种在泥土里，慢慢地种子发了芽，慢慢地小芽长高了， 慢慢地长成了小树，慢慢地小树开了花，慢慢地花谢了，结出了果子。”勒小孙囡润夏稚嫩清亮个儿歌声当中，我想起来，要搭虚拟果树浇浇水了。
自从新妇教我勒手机浪安装了网购软件之后，我就搭果园结下了不解之缘。打开软件，进入果园，种棵“果树”下去。果树虽然是虚拟个，但是伊枝繁叶茂，亭亭如盖。神奇个是，只要有恒心，坚持勿间断个搭果树浇水，伊就会得开花结果，种植者也就会得勒某一日收到快递送过来个水果。种啥个树，就得啥个果，我收到过蒲桃、苹果、橙子、芒果，最近一腔啊？种个是桃树呀，眼看就要成熟唻！
我种果树，勿是单纯个想得到眼实惠，种树个游戏拨勒我无聊个退休生活带来了实实在在个乐趣。种果树必须天天浇水个，葛末，水从啥场化来呢？可以领个。领水个途径有交关，可以免费领，也可以通过兜网浪向个商场浏览货物获得；可以看视频、看直播去获得；可以邀请好友到果园来种树获得，还可以凭运气通过抽奖去领取水滴红包。甚至于还可以做一趟小偷，到好朋友个果园里去偷水滴，当然咾，要想不劳而获，是会得碰钉子个，假使人家养了只“狗”，一旦拨伊捉牢，就反而要蚀脱自家个水滴了。我也养了一只狗“嘟嘟”，是专门捉偷水个“贼骨头”个。
搭别人家拼单购物，来获取水滴个速度最快了。购买个物事越多，得到个水也就越多。我娘蹲了老老远个北方，我勿好常庄去探望伊，就通过网购，今年热天介，姆妈吃到了新疆个哈密瓜、河北个黄桃、兰州个百合，广州产个衣裳搭仔鞋子也着着了。我个“果树”呢，也拨勒源源勿断个水去浇灌，显得生机勃勃呀。
种果树还可以增长知识。我最最热衷参与个，就是每日下半天搭仔夜到个答题竞赛。题目涉及到天文、地理，古今中外，邪气有水准个。我只擅长文学、历史、地理等等文科题，要勒邪气短个辰光里向，算出五位数个加减乘除数学题，要要背化学元素周期表，就勿大来三了。通过搿种竞赛，我重新找回了还拨老师个知识。
我种下了“果树”，又收获了知识个果子，真是开心啊！
作者
朗读者
往期回顾：
图：网络 / 编辑：渺渺