金陵东路：上海“过街楼”最有特色的街道
沪语朗读：渺渺如胭
原创： 薛理勇
来源：上海交大建筑遗产保护中心
上海话改写：郭莉
朗读：渺渺如胭
“骑楼”是一种建筑样式名称，伊是指骑跨勒两幢房子之间个楼，或者是沿街楼房楼层朝外头伸出来、盖牢马路上街沿个楼。
从前辰光，大家造自家屋里房子，利用楼搭楼之间个空档建造“骑楼”，骑楼下头是进出住宅个大门。私人住宅勿可能占忒长个街沿，建造楼层外挑个骑楼成本也高，一般也勿会专门去为过路人遮风挡雨而建造沿街骑楼，所以，勒上海，大面积个骑楼建筑侪是近代产物。不过，上海人一般侪叫伊“过街楼”。金陵东路是上海骑楼，也就是上海人嘴巴里“过街楼”最有特色个街道，所以，金陵东路也是“风貌保护道路”。
金陵东路勒历史浪曾经是法租界，19世纪50年代开始修造，因为法国领事馆就勒勒搿条路浪，所以伊个中文名字就是“公馆马路”，伊是法租界最大、最主要个马路。勒伊之前，英租界已经有一条“大马路”就是南京路了，乃末伊又拨上海人叫做“法租界大马路”、“法大马路”。
当时上海租界主要道路宽度是8到12米，有种道路还有人行道，搿能车行道就更狭窄了。法租界公馆马路闹猛地段靠近外滩，所以公馆马路东段阔着眼，西段窄着眼。
进入20世纪，上海公共租界、法租界要开通有轨电车。有轨电车车身蛮宽，双向行驶，马路要让出黄包车、马车咾啥，还要保证行人安全通行，所以必须放宽马路。乃末20世纪初，也是上海城市道路大规模改造时期。
众所周知，城市一条马路建成，道路两侧马上会开发成街面房子个商铺搭仔住宅区，后期道路要拓宽，势必就有征用土地搭仔赔偿个问题，所以，城市道路改造一般侪是循序渐进，慢慢叫来个。当时公共租界工部局、法租界公董局参照西方制度，制定了城市道路相关规定：首先是拿城市道路划分为各种等级，规定勿同等级道路个最低宽度。其中“大路”是城市主要道路，应该有“车行道”搭仔“人行道”；划定了道路红线，还规定，为了确保道路畅通，部分严重影响道路畅通个建筑必须及时拆除。对暂时勿影响通行个建筑物，允许暂时存在。但是，将来一旦侬个房子要重建，葛末业主必须无条件退界，也就是新房子必须退到规划红线以外；退界后，业主地契浪向土地面积勿减少，勒侬个地契浪注明业主土地边界距离房子墙角个距离，以后土地买卖，还是以地契面积计算；对一眼主要道路商业街，规定了人行道宽度，为了减少业主个损失，保证市政工程及时开工，经过有关方面核准，允许业主拿新房子造成“过街楼”，也就是过街楼下面作为城市公共通道个“人行道”。譬如1914年以后建造个南京路先施公司、永安公司，还有上世纪二十年代造个南京路新康大楼咾啥，侪是搿能情况下头造出来个。
勒勒商业街建造“过街楼”，一方面减少了房地产商个损失，城市道路改造建设可以顺利推进；另外，过街楼勒勒人行道上头，可以使商业街游客有一个遮风挡雨个舒适环境，提升商店信誉搭仔知名度。乃末法租界就学公共租界个样，譬如著名个诺曼底公寓，就是现在叫“武康大楼”个建筑，位于武康路、淮海中路相交形成个尖三角形地块，面积勿大，要是退让红线，搿幢房子大概也呒没办法建造了，现在采取过街楼形式，乃末二层楼以上就增加了勿少面积。
公共租界个迭个办法拨法租界学得去了，1926年出版的《上海房地产实用大全》收了关于法租界公馆马路建设个一眼规定，里向就有任何人勒勒公馆马路沿街拆旧房造新房，必须遵守规定，退到划定红线外头。还规定，沿街必须造过街楼，过街楼高度7米，宽3米。从这个规定阿拉可以晓得，现在金陵东路凡是有过街楼个建筑，一定是1926年以后造个，呒没过街楼个建筑，也就一定是比1926年更早个老房子。
有人认为，南洋天气炎热，阳光强烈，雨水又多，上海金陵东路过街楼是勒勒上海个福建华侨，参照南洋一带房子特点建造个。迭个讲法就有眼自说自话了。此地是法租界，勿是福建华侨可以随心所欲个地方。我勒法国巴黎住过一抢，晓得巴黎交关商业街沿街房子就是过街楼，著名商场“老佛爷”就是搿能个。我毛估估，伊个过街楼高度跟上海金陵东路过街楼也是基本一致个。不过，巴黎过街楼宽度，倒是阔狭勿一致个，勿像金陵东路整齐划一。我想，上海法租界公馆马路个过街楼，一定是仿效巴黎过街楼个结果。
就像动物个生命一样，任何建筑物也侪是有设计规定好个使用年限个，现在上海绝大多数老房子，侪已经远远超过了设计个使用年限，进入老年、暮年、耄耋之年了。现在阿拉应该哪能保护老房子，保护人民生命财产安全，是应该提到更高维度来认识个了。
图片来自网络
上海言话叙身边事体
往期回顾：
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号