手背上的一撮盐（下）
沪语朗读：牛美华
手背上的一撮盐（下）
来源： 文汇笔会
作者： 沈嘉禄
改编：郭莉
推荐：丁迪蒙
朗读：牛美华
平常辰光，我只要有一滴酒下去，面孔浪向就会得有强烈个反应，搭前头讲个三种酒碰着，纯属偶然个“邂逅”，所以也勿晓得伊拉后来是勿是落地勒上海，拨更多个消费者享用了。
另外，我还勒展览会浪吃过各种啤酒搭仔葡萄酒。有一趟是勒法国葡萄酒协会个展台，我发现有得三四个法国国会议员为供应商站台叫卖，我邪气奇怪。法国人倒是理直气壮：国会议员勿为地区经济服务，葛末下一届选举辰光，啥人拨伊选票呢？真个，后首来我搭法国食品协会有蛮多接触，迭几个议员差勿多每趟侪来个，是熟面孔了。
奶酪当然也是法国人个骄傲，所以每届博览会浪，伊拉侪大造声势，布置邪气壮阔个阵容做宣传。有一日天，供应商派出一个年轻职员，跟中国记者做只小游戏：看啥人可以吃下去更加多个奶酪。比赛规则好像勿大公平，法国人天天吃奶酪个，有绝对个优势。不过呢，我还是应声而出跟伊打擂台，小青年吃一块，我也吃一块，各种软个、硬个、半硬个；新鲜个、陈年个；钻孔个、侪是蓝色霉点个；还有味道顶冲个山羊奶酪咾啥，一块接牢一块。边头围观个人是越来越多呀，我也是越吃越起劲，小青年是衬了一片苏打饼干吃个，我呢，索介拿麻将牌大小个奶酪直接厾到嘴巴里去。最后，为了勒气势浪向盖过对方，我切了一块自来火盒子大小个蓝纹奶酪，一口头下去了。乃末，尖叫声、鼓掌声马上侪响起来了。我获得了游戏个奖品——一块法国图卢兹出产个蓝纹奶酪。我也搭法国人解释了，本爷叔之所以勿吓奶酪个秘密：我个老家是浙江绍兴，从小吃惯了臭乳腐，是道道地地个、勿思悔改个逐臭之夫。臭乳腐讲起来是“中国奶酪”，但是伊个味道更加强烈，又是纯素个，说勿定也更加有利于健康唻。
从迭个辰光开始，法国食品协会就搭我交上了朋友，多次请我去参加伊拉勒上海举办个葡萄酒、奶酪推介会，还有新书个首发仪式。
也就是因为进口食品博览会，我第一次见识了藜麦、黑米、松露、朝鲜蓟ji、白芦笋、释迦、莲雾、番石榴咾啥，也品尝过用仙人掌、芦荟、秋葵、黄耳烧出来个菜肴，还有西班牙橡果火腿、加拿大冰鱼、意大利摩德纳巴萨米克醋咾啥。我看到了有几百种啤酒、几百种巧克力、几百种饼干，侪迫勿及待个，要轧进中国市场。
有一年，我还应邀去搭一场法国人主持个烹饪大赛当评委，现场个十几位法国、西班牙、意大利厨师头浪戴好高帽子，用同一种食材操作，摄像机勒边头网浪直播。欸日天我吃了至少八只龙虾，结果啊，接下来个三四天里向，我只好顿顿吃粥了。
让我顶吃足苦头个是，有趟看到秘鲁供应商展台竖了块小牌子，歪七歪八个中文邪气具有挑战性：你敢尝试一点点吗？我一砍，是淡黄色个辣椒酱，就神志无主个拿起伊拉准备好个牙签，勒只小碟子里蘸一记，搨勒自家个舌头浪向了。啊哟哇啦！辣得我唻是眼泪水嗒嗒渧呀！噢，勿对个，搿个已经勿好讲是辣，是强烈个刺痛感，就像用电钻勒舌尖浪钻了只洞一样！原来，迭个就是秘鲁出产个白哈瓦那辣椒，其实伊已经改良过了，辣度已经大大减轻，假使是野生个，葛末伊个辣度好达到35万斯高威尔，分分钟拿一个猛男辣成残废！
当然，叫人开心个，是博览会露面个大多数食品，后首来侪陆陆续续进到了中国个超市、饭店，不过也有我久等勿来个好物事，譬如讲，要勒阁楼上头睏脱几十年再会得酿造成功个巴萨米克醋。
最后，还要讲讲我对伏特加个体验。
有一趟，一个身穿民族服装个亚美尼亚美女，请我品尝一款云雀牌伏特加，据说迭个一款酒曾经是欧洲皇室专享个。伊斟了一小杯拨我，又拿一小撮盐撒勒我个手背浪。乃末伊优雅个搭我示意，先拿盐快速个吸到嘴巴里，再拿一杯伏特加一记头吃进去，但是呢，要让酒液勒嘴巴里向含脱一歇，再慢慢叫个咽下去。迭个辰光，伏特加就发生了神奇个变化，变得唻邪气醇厚，又邪气甘甜！
现在，几乎勒世界个任何一只角落，侪好吃到中国菜，迭个是市场需求决定个。中国向全世界食品供应商打开大门，也是积极个回应。吃到嘴巴里，可以享受物资流通带来个满足，也体会了饮食文化交流所产生出来个的美妙。就像盐是咸个，但是伊跟酒精结合了，乃末就好引渡阿拉抵达甜蜜个乐园。
往期回顾：
图片来自网络