老上海人穿着上头“做人家”
作者：申涛
朗读：仇蔚菁
推荐：丁迪蒙
前两日刚买来的袜子，着了两趟脚节头就露出来了，只好厾勒垃圾桶里。迭双破袜子使我想起老早上海人交关“做人家”个往事来。
记得上海刚解放个头两年，搿辰光大家脚浪着个侪是纱袜，勿像后来有啥个尼龙袜、弹力袜、锦纶袜、羊毛袜，花式品种多得来眼花绿花。老早大家个手头侪是紧绷绷个，连买双袜子也是要算算个。要晓得，纱袜是勿大经着个，乃末上海个家庭主妇就勒勒刚刚买来个新袜子浪动脑筋，要叫搿双袜子经着，着出本钿来。侬问啥个办法啊？就是勒勒袜头、袜跟，甚至整只袜底浪用零碎布头先打补丁。搿能一来，袜子容易破个地方就多了一层保险，迭个统称叫“托袜底”。要是袜子着出洞洞眼了，再去补，迭个叫“补袜子”。侬看，老早就是一双袜子，上海人也有交关“做人家”个办法。要是小囡勿懂事体，新袜子买来就着，保证要拨伊发娘臭骂一顿。
回想起解放前头上海马路浪个老克勒，侪是头戴丝绒铜盆帽，洋装笔笔挺，皮鞋锃锃亮，司的克一拎，派头一落，呒没闲话来！侬要是叫伊皮鞋脱下来，里向个袜子弄勿好就是托过袜底个，甚至汗衫也是破个。侬想，上海是个开放个城市，老早搿些职员勿“做人家”，勿打扮得山青水绿，哪能上写字间养一家老小？
记得勒勒计划经济年代，买衣裳料作是要凭布票个。上海个家庭主妇一想，衣裳袖口顶顶会得坏脱，要是袖口坏脱了，搿件衣裳就拜拜了。葛末，有啥办法让衣裳经穿点呢？嗨嗨，上海女人勿要忒聪明哦！脑筋一转，去买块领头布，缝纫机一踏，宽紧带一串，好了！结果上海滩浪无论大人小囡，男男女女，人手一副袖套。不过上海人邪气注意出客个形象，走勒马路浪是绝对勿会忘记拿袖套脱下来囥囥好个。
现在戴袖套个人有伐？邪气少。要么是小菜场个卖菜阿姨、崭肉师傅，别个地方恐怕是看勿到了。要是有个白领小姐上班辰光鲜格格戴副袖套伸出兰花手节头打电脑，别人要么当伊是出土文物，要么横看竖看搔头皮弄勿懂，阿是法国时装发布会浪新流行个行头啊？乃末刮三唻！
上海人“做人家”个办法多来西，再譬如讲，蛮好一件棉毛衫，可惜松紧袖口勩（yi）脱了，总勿见得再去套副袖套咾！或许侬会得讲，勿要忒节约了，再去买一件新个算唻！喂，朋友！侬阿是叫我吃药啊？阿拉工钿连带布票侪克勒老婆手里，想也勿要想。喏，喊隔壁小裁缝帮帮忙，旧个袖口拆下来，换一副赤刮辣新个袖口，哪能？挺刮伐！
“做人家”是上海人传统个生活态度。一百多年来，上海人就像鲁迅先生讲个，吃个是草，挤出来个是牛奶。勿崇尚浮华，勿夸夸其谈，踏踏实实“做人家”，硬碰硬“做”出了大上海搿份大人家！
作者
朗读者
往期回顾：
图：网络 / 编辑：渺渺