中秋节个塌饼
沪语朗读：余晖
作者：余晖
上世纪七、八十年代，勒勒浦东个大部分人家中秋节是没月饼吃个，但是，聪明个本地主妇板要做一趟塌饼，拨一家老小尝尝。其实呢，最主要是为了祭祖宗，让祖先拉先过个中秋佳节。本地人是邪气敬重老祖宗个。所以呀！每逢中秋节，仙灶是最为重要个仪式。
伲娘大清老早碌起来，到小菜场里去买肉，斩馅子，再叫我伲几家头一道拿小红枣个核去拖，斩碎脱以后，用绵白糖、猪油拌匀。
包塌饼个手法搭仔现在个包月饼是一样个。必过不摆放油酥，是死酵头。
然后就是焓塌饼了，勒拉铁镬子里向倒点豆油，用镬铲勒镬子里拿油均匀个淋勒镬子四周围，再拿做好个塌饼轻轻叫摆上去，用小火慢慢个焓，并且完勿断个翻身，焓到两面侪上金黄颜色为止，最后再滂一小勺子好冷水，再马上盖好镬盖，焖伊个两到三分钟，等到香气扑鼻个辰光，塌饼就好，可以盛出了。
搿个辰光，母亲是勿让我伲吃个，必须先去敬老祖宗。所以呢，伊就开始忙起来了。点香、上香、再供上塌饼，还叫我伲几个轮流磕头、，搿个辰光，伲娘会得勒嘴巴里向勿停个祷告，最后，焚烧锡箔。等到香烧尽了，锡箔个火星也灭尽了，再拿装满塌饼个盆子端到灶头浪向，摆脱一歇辰光，挨下来，再会得让我伲几家头拿来吃。
搿个辰光，我伲常庄是饿得勿得了，吃相就覅讲了，难看得勿得了呀！
伲娘呢，却勒拉一边笑咪咪看牢仔，伊完成了祭祖，香头又烧得不蛮好，没七歪八千个，心里向就邪气个满足搭仔舒畅，忘记拖了一日天个辛劳。
肉塌饼虽然没现在买个鲜肉月饼搿能香酥，伊有点硬，必过，伊是有鲜肉汁水个，是搿能个鲜香、多汁，吃起来先要唆口肉汁，真是满面孔个幸福呀！枣子馅个塌饼是更加好吃！咬一口就是枣香裹勒猪油个香，满嘴巴侪是香个，还会得流出香甜个汁水，哪能会得忘记呢？
所以，事实浪向，中秋节勒海阿拉小辰光个记忆里向，就是对祖先个怀念，以及祈求祖先个保佑。而塌饼裹勒海个，更家是孝道搭仔母爱呀！
图片来自网络
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号