陕南村搭仔克莱门公寓（上）
沪语朗读：边秦翌
作者：薛理勇
沪语改写,讲述：边秦翌
上海人民广播电台个著名主持人淳子是张爱玲个研究者，已经出版了好几本关于张爱玲个专著，我还为伊个一本书写过序。前一抢，伊又勒勒历史文献里向发现，张爱玲曾经搭仔伊姆妈一道住勒上海个“宝隆花园”，搿桩事体还得到了张爱玲胞弟个证实。但是，淳子查阅了老老多个档案，还看了交关历史文献，侪呒没寻到“宝隆花园”，伊猜想，所谓个“宝隆花园”说勿定就是搿歇个“陕南村”。伊个判断还是有眼道理个。
先来讲讲宝隆花园个典故。
八国联军个辰光，有一个德国个随军医生到了中国，伊个姓用中文讲就叫宝隆。1902年，八国联军刚刚遣散，有一批剩下来个医疗器械搭仔药品，拨迭个宝隆弄到了，伊就勒上海公共租界个白克路，也就是搿歇个凤阳路浪，办了爿医院，叫同济医院。位置相当于今朝个长征医院。1909年宝隆过世，为了纪念伊，就拿医院名字改为 “宝隆医院”。
搿搭要插一句。勒勒1907年，旅沪德侨个“医生协会”搭仔中国政府合作创办了“同济医学堂”，学堂就设勒同济医院里向，宝隆是校长。开始辰光，只开两科：德文、医学，第二年，学堂改名字，叫“上海同济德文医学堂”。学生侪是从南京陆军师范、陆军学堂，还有广东嘉应五华教会里选出来个，实际浪，学堂相当于是中国政府选派到德国留学个预科。开始学生只有30个，几年之后，人数明显增加，学堂就显得小了呀。学堂董事会为了增加招生数量，决定寻新只个位置。
新个校址邪气快就确定了，选勒上海个西郊。1912年，新校舍建成启用了。为了方便进出，还勒校舍东面修了条马路，搿就是宝隆路。
1914年4月8号，沪海道尹兼特派江苏交涉员杨晟搭仔法国驻沪总领事甘世东签订了《上海法租界推广条约》，里向规定，法租界“不得用为阴谋内乱反抗之根据地，也不得为乱党之逋逃薮，如有上项事情，法国警察应严行设法查办拘禁，或逐出租界”咾啥，介长个闲话，简单点讲，就是北洋政府以法租界查办、拘禁、镇压、引渡租界内反政府力量为条件，同意法租界个扩张。乃么，法租界个南界搭西界就延伸到了今朝个肇嘉浜路搭仔华山路，当然咾，同济医学堂搭宝隆路也就统统划到法租界里向了。
故事到此地还呒没结束，后头还会得讲到迭只学堂。
搿搭又要插句闲话，迭个甘世东，伊个名字也曾经用来命名过马路个，就是搿歇个嘉善路。
1914年，第一次世界大战爆发，德国搭法国打仗，互为敌对国，乃么，法租界公董局就拿“宝隆路”改脱，叫“亚尔培路”了。新路名是比利时个国王亚尔培一世个，伊是弗兰德伯爵菲利普个儿子，1909年继承王位。1942年，亚尔培路再更名，叫做陕西南路。
陕西南路151-187号个“陕南村”，是邪气有名个住宅小区。迭个名字一看就晓得是根据陕西南路来个；老底子叫做“亚尔培公寓”，也是因亚尔培路而得名个；葛么，再往前头推，亚尔培路曾经叫“宝隆路”，所以淳子猜想，历史文献里向讲到个“宝隆花园”，讲勿定就是“亚尔培公寓”了。
“圣母圣心会”是天主教勒中国创立个传教修会，总部勒比利时布律兹西郊个司各特，比利时神父南怀仁勒1862年创立个，所以又叫“司各特传教会”。1865年，南怀仁带领第一批传教士到中国，开始主要勒东北地区活动，建立教堂，开办学堂、医院诊所，还有育婴堂、养老院咾啥，侪取得蛮好个成绩，后首来，上海就成为了伊拉个主要个根据地。无论传教，还是开展慈善活动，侪需要大量经费。经费从啥地方来呢？还是靠教会个拨款搭社会个捐赠。
近代以后，大部分天主教教会有自家个“账房”，既要负责征募捐款，又要拿所有经费管理好。为让钞票保值增值，伊拉也会得搞眼投资。勒上海大多数是投资不动产，所以，旧上海个教会多多少少会有眼房地产个。高头讲到，教会账房叫“普爱堂”，勒海格路135号，也就是今朝个华山路浪向。亚尔培公寓是“普爱堂”个产业，大约摸勒1930年建成，设计单位是赖安工程师行。
赖安是个法国建筑师。自从1914年法租界扩展之后，拿同济医学堂也并到法租界了，当然就拨法租界公董局接管了，名字也改成为“中法通惠工商学院”；赖安就接受了邀请，到迭只学堂当老师了；课余辰光，伊也搞眼建筑设计。1923年，伊搭仔同事一道佮伙创办“赖安工程师行”，专门承接建筑设计、工程营造、测绘检验、装饰工程，当然咾，也顺带便做房地产托管、代理业务咾啥，有勿少优秀作品留下来。譬如，茂名南路58号法国总会，就是今朝个花园饭店、淮海中路449-479号培恩公寓、伊个底楼是妇女用品商店，建国西路394号道斐南公寓，淮海中路1202-1220号盖思康公寓、现在叫淮海公寓，河南南路16号中汇大楼、老底子个上海博物馆，金陵东路174号麦兰捕房、现在是公安局黄浦分局，侪是赖安工程师行承接个，由赖安负责建筑设计个。
朗读者
往期回顾：
图：网络 / 编辑：渺渺