忘年会，既然青春留不住 / 开普饭

沪语朗读：蔡锡琴

朗读者

忘年会，既然青春留不住

作者：何菲

沪语改写：郭莉

朗读：蔡锡琴

推荐：丁迪蒙

要勿是搿日天，勒富士山脚下头看到“忘新年会予约”个广告牌，我还呒没反应过来，一年又要过去了。猪年来得勿早勿晏，翻过元旦，第一桩事体就是过年……

从旧年12月到新年春节前几日，侪是各条线浪个年末碰头，一直要持续到小年夜，乃末回乡个、出国旅游个，大家侪各奔东西，上海末，倒是一记头空下来了。

每年从小年夜到年初三，我侪是雷打勿动，蜷勒屋里向陪爷娘跟屋里人，迓到年初四年初五，开始凑局了，有几个算几个。跨过年以后，大家重新聚会，其实呢，也并没隔了几天，倒是像分别长远一样了，大家又归队了！

过只年，就是让一切侪归零，再让一切重新开始。

从腊月到正月，是上海最冷个季节，爸爸勒北阳台挂勒风鳗、腊味咾啥传统食材，囥勒海个干贝花胶末，也从罐头里掀（xiao）开盖头放风了，祭祖个物事侪已经老早就准备妥当。姆妈搭仔香港个姨妈视频聊天，展示一只只的的刮刮个鲍、参、发菜咾啥。

沪港双城个文化是蛮值得细细叫品味个，香港人过个是中国式个西方生活。家庭主妇看个是TVB大戏，煲汤倒是要参考《本草纲目》个；上海人呢，过个是西方式个中国生活，生煎馒头配杯咖啡，去听一场老克勒爵士音乐。但是，勿关侬是阿里一种模式，过年辰光个中国人只分两种：重视过年搭仔勿重视过年个。

每年腊月，闺蜜会得送拨我山西大红枣，伊关照我每日天吃两只。有个师友，是温州人，一过小年就要做眼蟹生、白鳝生咾啥家乡风味个物事。迭眼用红曲跟白酒腌出来个小海鲜，是春节辰光顶顶解腻开胃个别致好物事。对北方人来讲呢，勿吃饺子勿算团圆。湘西个同胞是觉着有一块黑赤赤个腊肉再叫故乡个。

呒没乘过深夜火车个朋友，勿好搭伊讲啥个“乡愁”；呒没乘过红眼航班个朋友，也勿大好搭伊谈啥个“人生”个。

农耕文明越是发达个地方，过年个气氛就越浓，一直到乃，北方人过年还是邪气讲究个。

正月十二了，勒国企集团上班个，还是寥寥无几。就是来了，也是上半日点只卯，吃吃瓜子，发发前抢巴漏脱个拜年私信，再约几场各种朋友个饭局。中饭呢，照牌头是要回转去吃个。中饭以后，是北方漫长个午休辰光，大冷天，日头邪气短，阳光个线脚照勒暖气片浪一眼眼移动，当然，伊拉是用勿着再回去上班了……

年过到迭歇辰光，就有了一种懒洋洋个适意，搿能介个懒散闲适，是定规要持续到元宵节个，就是过了元宵，也要再懒洋洋滑脱几日，板要到过脱仔正月，乃末，一切再会得重新抖擞起来。

大家侪嫌比年假忒短，身体回来了，心还勒勒年里向。又有啥要紧呢，生活本来就应该跟天地个节奏合拍，跟阴阳个规律振动，体会生命个有起有伏，迭个，就是“年”个魅力所在啊。

我真个老欢喜台北个迪化街搭仔香港个上环个，搿两条侪是著名个年货大街，南北货、药材、海味个气味，即使有岁月神偷，也偷勿脱个旧风情古味道个，传承勒开埠一直到今朝个业态搭仔社会潮流。真个，置办年货，是比吃年货本身更加能够爆发生活情感搭仔乡土情意个。迭眼仪式是闪现出旧日微光，让侬回忆起从前日脚祖辈、父辈，还有阿拉自家，是哪能为生活搏斗过个。当然咾，还有来自生活个温柔搭仔各种挫折，乃末叫侬真个是缠绵悱恻。留牢搿眼，也就是留牢了情感，一块有乡愁个土地，再好叫做“家园”。

“人多情欲衰颓易，树却全真内不伤”。勒时间个面前，所有绚烂、求索；所有勿合时宜个蠢动，侪是虚妄。日月往复，唯有“年”，再是时间个刻度，伊，永远立勒此地。