【宁海话】赔钿箍

钿箍（丘）

敬请聆听小包车讲述故事

泗洲堂

续老早箇且，茶山脚下庉了两尊菩萨，一尊了土地菩萨，一尊了泗洲菩萨。土地庙前香火旺得猛，泗洲堂却冰冷水清。

箇一日，泗洲菩萨去拜访土地，问起土地庙为何物香火介旺。土地菩萨笑笑讲：

“我亦呒不何物法道，只有一只钿箍（丘）。”

“何物钿箍？”

“赚铜钿个箍。”

“怎信赚法呢？”

“只要过路人碰着箇只箍，限板会头热脚痛， 其便会来烧香拜佛。箇弗是有香火受了吗？”

泗洲听嗷，好话讲了一百担，求土地把箍借两得其用两日。见土地头督督，泗洲摇头扼脑，高兴䫲来，佗了钿箍飞风样归家来。

第二日，泗洲菩萨起早睏醒便到庙堂门前等得，望着呆呆远一个解白马个人过来。朆等其走到眼头前，泗洲便来弗洎把钿箍擐过去。哪会晓得，马纵得快，人到朆擐着，只听闻“啪”一声，马脚弹把箇只钿箍弹嗷两架架。

偷鸡弗成蚀把米，泗洲倒楣死来，佗着碎嗷两架架个钿箍向土地菩萨去赔罪。土地听闻，气得差点厥过去，肚肠膯悔青嗷来，怪来怪去都怪自家好甮把箇只饭碗头借搭人家。一声接一声要泗洲“赔钿箍”。泗洲晓得自家理亏，头插了脚夹迭侯其咄爽快，答应赔搭其还。

谢箇回过，宁海箇带便流传“赔钿箍”个噢法，意思把人家东西装歪嗷，赔得其还都弗讨好。

又《篇海》去鸠切，音丘。箍也。

参考书目：

《 中国民间文学集成·宁海卷》

鸣谢：

三福青竹编杨维炉先生提供竹箍照片