上海个桥
沪语朗读：冯蓉
来源：随笔集《上海本色》
作者：孔曦
沪语改写：冯济民
朗读：冯蓉
贾宝玉讲，男人是烂泥做个，女人是清水做个。假使按照金木水火土五行搭城市分类，上海肯定是属水个。老里八早，上海大大小小个河、浜、泾、沟、汊，交交关关。小河浜合起来，聚成塘搭汇、湾搭浦；大河分道，分成功泾高浜、汊搭沟。有个地方也就此有了名字，比方三林塘、蒲汇塘、肇家浜、陆家浜，又比方漕河泾、北新泾、徐家汇、潘家湾。再比方黄浦搭杨浦、张江搭东沟。
当年个上海有交关唔无名字个小河浜，通向每一家人家。再小个村庄，也至少有一座水桥。搿是江南特有个桥——从河岸浪朝下头搭起一级一级个石头台阶，最下头个一级又宽又长，伸到河浜个水面高头。春汛个辰光、夏天落过雨之后，河浜个水面涨上来，拿下头几级石板淹忒。小囡就立勒有水个桥面浪向白相，捉鱼，摸螺蛳。姑娘家高年轻少妇，蹲勒宽宽个石板浪淘米，汏衣裳。奶白颜色个淘米水漾开来，漾到河浜个清水里向；蓝花布衫褪忒一眼靛蓝，漾进透明个河浜里；轻轻叫个笑声搭闲话滑到静静叫个河浜里，碎成一圈一圈个水圈，漂得老远，老远。河面浪向看得到蓝颜色个天，雪雪白个云，看得到姑娘们个酒窝。河浜对面，烟囱浪向有得烟冒出来了，西村个凤珠勒辣喊鸭群归棚。夜快头，水根朝河浜对面望过去，两个有情意个人，隔仔岸，眼光里向有故事，要好得勿得了。
有河浜，就会得有渡口。水根撑仔小船去高凤珠约会，伊棵系小船个老杨树，讲勿定，就是上海个第一个渡口。上海个渡，曾经有交交关，现在还有曹家渡、周家渡搿类地名。有河就有桥，凤珠走过小桥来看水根。上海个桥，曾经多得来数也数勿清。搿些竹桥、木桥搭石板桥，有交关用村庄宅院个名字起名。后首来，桥个名字就代替了村庄个名字，最后变成功格个地方个名字。翻开现在个上海地图，南面有康桥、颛桥，北面有高桥、凌桥，东面有金桥、张桥，西面有虹桥、程家桥。雅许眼个，有香花桥、绿杨桥、八仙桥；实在一眼个，有提篮桥、五里桥、长桥、斜桥……长宁区法华镇路格搭，还有一条种德桥路。想起来，造桥个老祖宗，是要拿好生之德、助人为乐之德，长长远远个种下去，保佑子子孙孙。
凤珠搭水根种仔一辈子田，伊拉个儿子孙子也种了一代又一代个田。突然之间，有一天，格个家族个一个小青年，撑仔船去做生意了。外省来个、搭外国来个商船，前后脚开进了黄浦江。江边，新造仔交关码头。今朝，假使侬勒中山南路、董家渡路搿搭走走，还可以看到王家码头、竹行码头、公义码头、烂泥码头之类个路牌。
造桥，造渡口，一开始是为了进出便当。桥梁搭渡口，勿单单让大家进进出出，还使得物资交流、文化搭思想个传播也通畅起来。大大小小个桥梁、大大小小个渡口，搭大大小小个码头，连通了江搭河，连通了海搭洋，拿上海搭全国、全世界连勒一道。众多个桥梁搭渡口，使得上海拥有海一样宽广个胸襟，为上海迎接了全国，乃至全世界能干个人才。博采众长、融会贯通、乐于学习、善于沟通，也成为上海人最了勿起个优点。上海，终于勒20世纪30年代，成为闻名世界个东方大都会，又勒20世纪90年代，重新确立了国际大都市个地位。
搿介许多个桥，介许多个渡口，随着过去个时光，一道勿看见了，只留下来一个一个叫人想念、浮想联翩个名字。有个名字老好听，有个名字老实在。从洋泾浜浪个木板桥、苏州河浪个外白渡桥到黄浦江浪个南浦大桥，桥个变化，记录了搿座城市个变化。小河浜浪个桥、大河浜浪个桥、从上海人心里向伸出去个桥，使得上海人走出村庄，走出城市，走向世界。
现在，拥有许许多多桥个名字个上海人，开始想念当年田里向密密麻麻个小沟小汊，开始重视现在还了嗨个河浜，开始起劲个治理搿些已经拨污染个水系。黑臭个苏州河变清了，黄浦江里，鱼侪回来了，江鸥也回来了。水根搭凤珠个后代，心里向老清爽个：水，是文明个源头，就像小毛头要吃个奶。现在还了嗨个大河浜、小河浜，是上海个血管，是泄洪水、防水灾个通道。为了上海个母亲河苏州河清爽、好看，上海人必须珍惜伊。作为水个儿子囡五，上海人一定能够让苏州河水重新变清。上海个水，一定能够恢复清秀个面孔；上海个桥，也会得更加雄伟，更加了勿起。
朗读者
往期回顾：
图：网络 / 编辑：渺渺如胭