小火车、甜芦粟脱仔珍珠米
海宁
甜芦粟、珍珠米，现在已经不属于小朋友咯零食了，有点年轻人啥叫“甜芦粟”可能也不晓得了。勒辣阿拉少年时代，讲起搿两样物事是要流馋吐水咯！
阿拉屋里是宁波镇海人，除了宁波亲眷，就呒没乡下头朋友了！六十年代中期，姆妈咯大妹妹尼阿姨要结婚了，姨夫是北海舰队航空兵军官，嘀嘀呱呱咯上海川沙人，我开心勒不得了，终于可以到乡下头去白相，有搭甜芦粟脱仔珍珠米喫勒。
记得一年初秋，尼阿姨、姨夫带我一道去川沙。早浪向一早出发，从江苏路、愚园路赶到杨浦区定海桥摆渡，黄浦江对岸是浦东高庙，换乘上川线小火车。小火车与绿皮火车几乎一模一样，只是小忒一壳落，车厢里咯木头长条椅是直摆咯，像现在地铁一样。小窗子开开，冷风吹吹适意了不得了！小火车勒一片“绿色咯海洋”里开，到处侪是丰收景象！太阳从车窗里照进来，也不觉着热，看看周围咯人大包小包侪是去走亲戚咯样子。姨夫勒烟台当兵，交关辰光呒没回来了，看伊咯面孔老严肃，肯定勒想念年迈咯父母脱仔交关小辰光咯事体！
阿拉乘小火车是从始发站庆宁寺上车，要到终点川沙站咯前一站暮紫桥下车，车票好像两角五分一张，埃歇辰光搿算蛮贵咯！
到了姨夫屋里闹猛了不得了，邻里隔壁侪是亲眷，大家叫尼阿姨“新嫂嫂”。大人忙应酬，我就脱仔差不多大咯小朋友们一道白相。房子前面是一个晒谷场，围牢晒谷场咯家家户户可以随便进出，再靠外面有一条不晓得名字咯大护塘。过了一歇歇，一个长辈叫阿拉回去，勒姨夫咯新房子门前已经放了一圈小矮凳，地上一只大竹匾里摆满了已经斩成段咯甜芦粟，还有一只大钢盅镬子里向是热气腾腾咯珍珠米。一圈小朋友围勒一道喫甜芦粟，一根接一根，喫得不亦乐乎！我喫起来不老鬼，就慢慢学。轻轻咬牢没有结头地方咯表皮，一点点拉下来……然后像喫甘蔗一样！甜芦粟咯芯子又脆又甜，而且汁多，几根下去就够了！一个小朋友不小心拨甜芦粟硬皮划破了手，血出来了，旁边小朋友帮忙从甜芦粟硬皮上刮点白粉下来涂勒伤口浪，一歇歇就止血了。甜芦粟喫好，阿拉每人再拿甜芦粟硬皮弯过来，做成一只只小灯笼，拎勒手里白相！
镬子里咯珍珠米已经勿烫了，阿拉又开始啃了起来。川沙咯珍珠米圆滚滚，长得勿大，粒粒饱满，一只手正好捏牢，吃口有点脆，细细品味，又软糯又香甜，我一口气喫勒两只。
中饭满满一台子菜，我一点也喫不落。下半日，姨夫带我乘一站小火车，到川沙镇浪去白相，记得又喫了一碗馄饨……
如今姨夫已经八十岁了，我问伊现在暮紫桥咯地理位置，伊也讲不清爽了。伊只告诉我，浦东上川路路基下面掩埋了一段百年铁路咯历史。
小火车、甜芦粟脱仔珍珠米……可惜当年咯各种体验只有到记忆里去寻找了！
朗读者
往期回顾：
图：网络 / 编辑：渺渺