故里春秋（十七）
作者：朱海洪
沪语改写：边秦翌
沪语讲述：施陈骅
为了解决文化艺人个困难，1956年10月，文化部向上海文化局发文《关于对国画界及特种工艺艺人救济和安排个通知》。随后，上海市文化局拟定了《关于对部分国画、连环画作者个救济性个补助方案》：1、本人生活费：一个号头20到25块；2、家属，大城市市区：每个人一个号头11块；中等城市：9块；小镇搭农村：5块；3、另外还有眼棉衣棉被费咾啥。
1957年，60本《三国演义》小人书个出版，成为老连环画最后个风光。
六十年代是新连环画个天下，也有老老多个优秀作品，像刘继卣个《鸡毛信》，华三川个《白毛女》，丁斌曾、韩和平个《铁道游击队》，张乐平个《三毛流浪记》咾啥。特别是连环画泰斗贺友直个《山乡巨变》，拨称之为中国连环画史浪里程碑式个杰作。
必过，新连环画慢慢叫就有了一眼通病：脸谱化、符号化，千遍一律个形式，导致连环画业越来越走下坡路了。
徐一鸣邪气迷茫，也邪气郁闷，常庄借酒浇愁。1976年，孤独个徐一鸣瘫勒床浪向，因为吃香烟，勿当心引发火灾，勿幸葬身于大火之中。
名享一时个连环画到八十年代终于步入末路；九十年代，连环画以进入收藏市场个姿态，留拨大家最后一眼眼“记忆”。
勿晓得从阿里一天开始，“鲁智深”个小人书摊头从我个眼门前也消失了。
也勿晓得从阿里一天开始，空地浪只看到“鲁大妈” 孤单个身影，鬓脚高头还插了一朵小白花。伊斜挎勒一只长方形个小木箱，往矮凳高头一坐，“啪、啪、啪”个敲小木块：“棒冰吃伐，光明牌赤豆棒冰”
“鲁智深”个小人书看勿到了，小朋友就来吃“鲁大妈”个“光明牌”赤豆棒冰。棒冰其实是舶来品。
20世纪初，有个叫法兰克-爱柏森个老外，伊11 岁个辰光，有一趟拿苏打水忘勒后廊里，一夜天过去，全部结勒搅冰棒高头。20年之后，伊突然想起来搿桩事体，就用苏打水加一眼甜味道炮制成棒冰，拿到市场浪卖，居然卖脱6000多万根，还赚进一大笔个专利费。
1911年，一个美国人到上海开了一家海宁洋行，垄断了上海个冷饮市场，伊拉个当家产品就是棒冰，牌子叫“美女”。后首来海宁洋行变成了上海益民食品一厂，赤豆棒冰就开始勒勒上海滩风行起来了，当然调了一只牌子，从“美女”变成功了一只光芒万丈个火炬。
热天介，棒冰是老上海人个大众情人。
消暑个冷饮其实邪气多，除脱棒冰之外，还有得雪糕、冰砖、汽水、刨冰咾啥，但是棒冰搭老百姓最亲近。呒没啥个特别理由，就是因为便宜呀。一根棒冰4分洋钿，有辰光运道好，碰到一根断棒冰，3分洋钿就搞定了；雪糕呐8分洋钿一根，还有一种大雪糕1角2分一根，翻了好几只跟头了；一块小冰砖2角1分，5只跟斗；中冰砖4角4分，开始腾空翻了；大冰砖几钿忘记脱了，反正跟斗翻得停勿下来。所以，普通老百姓还是喜欢吃棒冰。
棒冰花色一般有得三种：赤豆、绿豆搭仔盐水；赤豆棒冰最吸引人，红彤彤个赤豆密密麻麻个挤勒顶端，一般至少要占到棒冰个1/4；有辰光额角头碰到天花板，赤豆轧到棒冰个半打横里。因为是机器罐装个，赤豆个分布有多有少，搿种勿确定性会得带来惊喜，也会得惹来麻烦。
有一趟，两个五、六岁个小姑娘从“鲁大妈”手浪向选了一支棒冰，眼睛巴登巴登盯勒海，剥开棒冰纸头一看，一个赤豆多，一个赤豆少。赤豆少个妹妹要搭姐姐调，姐姐当然勿肯啰，乃末妹妹就拿棒冰往地浪向一掼，“哇哇”大哭。“鲁大妈”哄勿牢小姑娘，只好从箱子里向再拣出一支赤豆稍微多一眼个拨伊，搿能介再太平。
看到伐，世界高头最最麻烦个事体就是资源分配。小朋友也懂得攀比，人个天性，呒没例外个。老祖宗老早就明白迭个道理：“不患寡而患不均”。“寡”勿一定让人勿开心，问题就出勒比较高头。一比较，有人就胸闷：“我为啥比伊少？勿开心！”就算勒勒吃肉，讲勿定伊也会得“端起碗来吃肉，放下筷子骂娘”；因为，旁边正好有人勒勒吃红烧蹄膀啊。
朗读者
往期回顾：
图：网络 / 编辑：渺渺